صفرين تسعه وسته سته تموني ++ الرقم هذا فتح خط السعوديّه

[الـريـم]

يا مرحبا

يا مرحبا يا مغلط في تلفوني ..=مسموح مسموح والغلطات عفويه

صفرين تسعه وسته سته تموني ..=الرقم هذا فتح خط السعوديه

ان قلت لبيك امر هذي عيوني ..=فتحت ذا القلب والنيه على النيه

يا صاحبي وان نشدني طيفك شلوني ..=اقول طيب وطيفك فيه ماريّه

مارية يوم تقبل تجذب لحوني ..=واجر له من لحون الشوق قافيّه

بيحت ياقاصد الغضات مكنوني ..=وانا رومانسي احب هل الرومانسيّه

من دونك اعيش وانت تعيش من دوني ..=الين اوحيت صوتك لعنبو حيّه

ضجت زوايا خفوقي وانشد ركوني ..=وانا ولد شيخ لي هيبه وشخصيه

الارض ارضي وكون المرجله كوني ..=لكنه الحب والعاشق و طاريّه

تكفون بالله ياناس لا تلوموني ..=الصدفه اللي بلا ميعاد جبريّه

يا نجد ودي اغني بك على هوني ..=حورية الارض فوق الارض نجديّه

يامرحبا يامغلط في تلفوني ..=مسموح مسموح والغلطات عفويّه

صفرين تسعه وسته سته تموني ..=الرقم هذا فتح خط السعوديّه

حمدان بن محمد بن راشد ( فزّاع )

اتمنى ان تنال اعجابكم