آل زنيفر شيوخ آل عوض من آل شامر في لقاء حصري لشبكة العجمان

[ابو راكان]

السلام عليكم ورحمة الله وبركاته
اخي العزيز صبي الملازيم
الله لا يهينك ويطول في عمرك اما بخصوص ناصر ابن حزام خيال العشاير غني عن التعريف وانا ما الشكك لا في شجاعته والا في مواقفه مع ربعه وربعه فيهم مثله مثير اما انك تقول صاحب سعد فا انا اقول مالك لوى
والا والف لا
وكانك ماتعرف تاريخ جدانك اسئل اهل العرف الي هم اكبر منك في السن وفي المعرفه
واما بخصوص .ختم مطلق ابن حزام فهو ختم تعريف على ال حزام فقط والاهوب ختم اماره
والا يزال تعريف فقط .
واما ال حزام ونعم فيهم
بس مالهم شداد شيخه شداد الشيخه اللمحمد ابن زنيفر
هاذي الحقيقه الي لازم تعرفها ويعرفونها كل زوار هذا الموقع
واظن ان كلامي واضح . وترى الحقيقه وانا اخيك ما احد يزعل منها
ولك تحياتي
اخوك ابو راكان

[صبي الملازيم]

اهلا اخي العزيز ابو راكان سوف اقطع شكك باليقين وسيظهر ختم الشيخ مطلق بن حزام بن زنيفر على الموقع وبمسماه امير هجره سعد ولكي تتبين الحقيقة لك ولزوار الموقع وشكرا للجميع

[فهد11]

يبو راكان صبحت بالخير كلامك يالحيت الغانمة اختلط فيه حق وباطل
اما الحق فقولك يوم تقول الحقيقة لازم تبين ويعرفها زوار الموقع
واما الباطل يومك تقول اشداد الامارة عند ال محمد بن زنيفر وتجاهل ال حزام بن زنيفر خيالة الحرشا لامورن في نفسك الله يهديك وهم عوال رجالن واحد ال محمد وال حزام واخير مني ومنك لا شيبانهم الاولين ولا الي فيه خيرن لربعه من التالين!!
الاوله في الاولات يومك تبي تعد الحق وشقومك تجاهلون شيخة زنيفر بن حشان اخو فهد وكبارته يوم اجمعوا عليها ال ضيف الله ال مخلص وهم اول من عطا زنيفر اخو فهد زمام الشيخة, والشيخت ذاك الحين وانا اخيك تراها مجمع علم وخبر وفصلن في الامور ويوم جات مشكلتن عند ال مخلص وهم في علية عارض نجد فقدموا زنيفر بن حشان يفصل واول من قدمه هم ال ضيف الله ال مخلص يوم تشبحوا الى ان مابه اعرف منه وقدموه لعرفه وكرمه وفصل بينهم واستمر ذا العلم . وعقبه ان كانك تجهلك ذا الامور فانشد الي يعرف ويحفظ من الشيبان معن ماعاد به احدن من الشيبان الي يعدون ويحفظون! هذا الي خذيته عليك وعلا مطلق بن حجرف في لقاه انه مهوب يحجمها علا محمد بن زنيفر والله قد وسعها على يمنا زنيفر ومبارك بن زنيفر وحزام بن زنيفر!
وان كانه مادرى بشيخت جده الاول زنيفر بن حشان اخو فهد ولا عاد به كبار سن عراف ينشدهم , وش قومه الله يهديه تجاهل شيخة الامير الصدق والشيخ الي يفصل القبايل من القبايل
مبارك بن زنيفر , وشيخت مبارك بن زنيفرمعروفة وكلن خابرها ماتحتاج نشده كبير ولاعرافت عارف ال مخلص وال شامر والعجمان وسبيع وعتبة وقحطان بيشهدون على كلامي ذا وال سعود انفسهم , فوش قوم مطلق بن حجرف يتجاهل ذا الامور !!! هذا ماهوب المتجب منه وهو والي مثله يشره عليه والواجب منه يعد الحق
خطروا لمبارك ياهل العنايا
جعل بيت القرم ماتهدم ركونه


ومبارك في ذا القصيدة هو مبارك بن زنيفر
وبيت مبارك اهنا في ذا القصيدة يبو راكان , ان كانك تعرف السوالف, فهو بيت الاماره وراع ذا القصيدت انت خابرها ماودنا نذكرها ما استثنا الا الامير في ذاك الوقت مبارك بن زنيفر

هذا الباطل الي لقيته في كلامك - وتقوم تجيب امورن مالها سنع والدلايل عندنا واضحة حتى صبي الملازيم ذا في بعض حكيه غادي الله يهديه -

[فهد11]

واما سعد وقبل البره فهم ثلاثت اخوان مبارك بن زنيفر واخيه محمد واخيه حزام وعلمهم واحد وعاد محمد وحزام اخوانن من مرة ورجال ومبارك اخيهم من ابيهم ويوم كبروا الشيبان وعطا الملك عبد العزيز البرة لمطلق بن محمد بن زنيفر راحوا للبرة وقعد ناصر بن حزام بن زنيفر على سعد يفصل بين اهله وهو ومطلق بن محمد علمهم واحد حتى يوم نشد ه سلمان العرايف من المبايعة قال يكفينا مطلق- مثل ما قد كتب في ذا الموقع- والبرة تراها مهيب لحجرف ولا لمحمد غار لحيات مطلق بن محمد ويوم مات مطلق خيال العشاير والى عياله صغار فتقدم حيات حجرف اخيه من ابيه على البرة اما - سعد - واموره فلا لاحدن فيها مجال الا ناصر بن حزام وعياله
فعقب ناصر بن حزام وكبره فتقدم ولده حزام بن ناصر وقدموه اخوانه وهم ايد وحده وطردوا الدواسر يوم حن خابرين وعقبه حيات اخوانه الباقين محمد وعرار وعبدالله وولده مطلق بن حزام بن ناصر وطردوا هم والدامر حيات عبدالله الدامر كلهم طردوا الدواسر الدواسر من امتلاك اراضي شمال خريص , الله الله فهنا يبو راكان الله يهداك - استوى امر سعد على عيال ناصر بن حزام وا ستوى امر البرة على عيال حجرف بن محمد - وعيال مطلق بن محمد في الرياض
والى يومك ذا علم سعد وخبره عند عيال ناصر بن حزام بن زنيفر
ولابه شداد اماره مثل ماتقول عقب عبد العزيز
نعم شاخ زنيفر ثم شاخ مبارك ثم شاخ محمد ثم شاخ مطلق بن محمد ثم حكم عبد العزيز وعقب عبد العزيز ماعاد به امارة شداد ان كانك تعرف العلم يبو راكان - امارة الشداد قبل الحكم وعقب الحكم مابه شيخة شداد لا عند ال زنيفر ولا غيرهم شيخة الشداد والملك عند ابو تركي راع العوجا واما القبايل فنزلهم عبد العزيز على هجر وعطا مطلق البرة مثل ماقد وضحت وناصر وعواله الخمسة قعدوا على سعد وعلم سعد عندهم عقب ابيهم وهم المعروفين فيه ولا سمحوا لاحدن ينزل فيه من الربوع الي انت خابر وكلنا خابرين وخالهم حيات مطلق بن محمد وحجرف في البرة ومن السوالف الي حصلت وناصر على سعد ان به عرب من ال عوض وال مخلص صارت بينهم مشكلة وراحوا لحيات مطلق بن محمد على البرة ويوم جاوه قال جاييني وناصر خلافكم روحوا لناصر - هظالاك العرب الصدق يا بو راكان والا اليوم اختلط سيلها والابطح

المهم اليوم كلن امره لحال ال حجرف على البرة وامرهم عليها وال ناصر بن حزام امرهم على سعد
حتى حيات محمد بن حجرف يوم جا يبي يحط المخطط وهو بس مخطط وذا العلوم كلنا حاضرينها وخابرينها - عيوا عليه عوال ناصر بن حزام عيا عليه حيات مطلق وعبدالله وعرار وولد حزام مطلق ولا نزل مخططه , وراح للبرة وحصل الي حصل وخلصوا العرب وصفت سعد لال ناصر بن حزام والبره لال حجرف بن محمد

هذا الصحيح اما امارة شداد فمابه امارة شداد عقب عبد العزيز ذا الحين فيه رياسة مراكز وكبارة على الهجر فقط لاغير وكثار الحكي ماله سنع

[صبي الملازيم]

شكرا اخي العزيز فهد 11والله يعطيك العافية وكفيت ووفيت

[حي^بقيق]

شكرا للاْدارة على هذا اللقاء المتميز مع هذه الحمولة الطيبة ال زنيفر الكرام ادام الله عزهم
فهم اهل للمد يح والثنا ويستاهلون فرحم الله شيبانهم الفرسان الذي خلد التاريخ اسمائهم بحروف من ذهب في صفحات المجد والسؤدد فطالما روو لنا اباْنا قصص فرسان العجمان واعجبتنا سيرة الشيوخ الاخوان وهم الشيخ مبارك بن زنيفر والشيخ محمد بن زنيفر والشيخ حزام بن زنيفر وابنه الشيخ ناصر بن حزام بن زنيفر فقد قيل من هول شجاعتهم انه يغزو معهم ملائكة لاْنهم اهل دين قوي واهل صلاة رحمهم الله واحسن مدخلهم وغفر الله لنا ولهم
وامابالنسبة للنقاش الاخوان فلقد ساْلت كبار السن من ال سفران وال شامر والناجعة
فوجدت ان البرة هبة من الملك عبدالعزيز طيب الله ثراه للشيخ مطلق بن محمد بن زنيفر وبعد وفاته صار عليها اخيه حجرف وبعده ابنائه الكرام اما هجره سعد عليها الشيخ ناصر بن حزام بن زنيفر وبعده ابنائه واكبرهم ابنه حزام ومن ثم ابنائه الكرام واهفى الله من اراد ان يهفي الحقائق وشكرا للجميع

[ابو خالد العجمي]

السلام عيكم ورحمة الله وبركاته

احب اشكر الاخوان الادارة ادارة الشبكة ومن معها على هذا القا الاكثر من ممتاز الذي اجريتوه مع ال زنيفر شيوخ ال شامر والله لايهينكم وهذا الامر بصراحة هو اللي خلاني اسجل في الموقع واشارك والا انا اسمع بجهودكم الطيبة في هذا الموقع من وقت
وبهذه المناسية الطيبة احب ان اهدي لكم هذي القصيدة التاريخية من رجال معروف ولعلنا نغير الموضوع من الامور اللي اثارها ناس ماهوب راضيين لهم ال زنيفر اهل اللقا

[ابو خالد العجمي]

احب أهديكم قصيدة سالم البديوي ال خزما ال مخلص ال شامر العجمي وحيث كان- الله يرحمه مريضا في المستشفى ويوم جاه خبر كون حياة - ابو ناصر -الشيخ عرار بن ناصر بن حزام بن زنيفر في العراق فقال لولده يزهمه ظهرني من ذا البلاد وودني للربع ويوم وصل عرار بن ناصر من العراق جاه سالم البديوي يسلم ويغني بذا القصيدة الي تصف فعول القبيلة في سعد وعلى راسهم عيال ناصر بن حزام بن زنيفر وطردهم للدواسر فذكر فعل طرد حزام بن ناصر لابن بلعوس من روضة عليا جنوب سعد وذكر ايضا طرد اخيه عرار بن ناصر للدواسر من الدهنا ومواقع تابعه لدبدبة والصمان وهم ابن وقيان شيخ الغييثات الدواسر ومن معه وذكر فعله في العراق ورده لحلال ابن سعود ,,, وهو الامر اللي اثار البديوي الى قول
هذي قصيدة اللي تذكر بعض أفعال القبيلة في سعد وتخص هل الحرشا ابناء ناصر بن حزام بن زنيفر اللي اشتهر بخيال الحرشا

** يافهد مالي بمقعاد البلادي
ـــــــــــــــــــ ابغي المحواز في مقطع نفوده
** دار ربعن مايدانون المعادي
ـــــــــــــــــــ ومن عداهم لازمن تلطم خدوده
** مثل ابن بلعوس جا للجو عادي
ـــــــــــــــــــــــــ ماقنع لينه يلفــــــــــع في خدوده
** يوم جاه حزام مثل الذيب عادي
ـــــــــــــــــــــــ لين يلعن من تعرض من جدوده
** وثنوا القيفان في راع الشدادي
ـــــــــــــــــــــــــ ابو ناصر جعل بقعـــــا ما تروده
** درعنا لاصار به علم وكـــــادي
ــــــــــــــــــــــــــ وسيفنا اللي في هل البصرة وروده
** فمسندي ياعرار ياطير الهدادي
ــــــــــــــــــــــــ مارضى بالدوســـــري ياتي حدوده
** يلطمون الشره من جدا وعادي
ــــــــــــــــــــــــ يلطمونه قبل يثـــــــعا في بـــــــدوده
** هم هل الحرشا معيـّــلـْـت الطرادي
ـــــــــــــــــــــــ هم مــقاودنـــا وحـنا لــه جـــنــوده
** قال ابن خزما كلام ٍ في وكـادي
ــــــــــــــــــــــــ مايهمه نقص من هو كـــــبر زوده
** مايفك الـدار في كثر السوادي
ـــــــــــــــــــــــــ كود من هو حربته في راس عوده
** فان حدرنا صوب عجمان وكادي
ـــــــــــــــــــــــــــ وان سندنا ذي علـيــــّـة من حـدوده

[حي^بقيق]

ابو خالد الله يرحم شيبانا وشيبانك من النار وبيض الله وجهك

[صبي الملازيم]

اخواني الاعزاء اقدم لكم قصيدة عبدالهادي ابن قروش في حزام بن ناصر بن زنيفر امير سعد عندما كان متجهاً للكويت لاْنها مشكلة وقعت عند البطاح من ال خضير بني عمه فلما كانو بمحاذاة هجرة سعد قال لمن معه نبي نسلم على حزام لن نتعدى سعد وحنا ماجيناه وكان الشيخ حزام وقتهاهو وجماعته مربعين شمال الدهناء فعندما اتى اليهم ابن قروش ولم يجدهم تهيض وانشد قائلاٍ
ذب ابن قروش عاليات الشناتير&&& وابدى بصوته في طويل اللياحي
ياحمس قلبي كنه يصلى على كير&&& وياجرح كبدي جرح سيل البطاحي
على بني عمٍ قرومً مناعير&&& مدهالهم تذرى عليه الياحي
حولت وسط ارسومهم واشبح البير&&& تد فنت من عقب ماهي صحاحي
عيا عليه حزام يبني المقاصير&&& متذكرٍعصرٍ مضى وين راحي
عقب صبيً مايحب المحادير&&& لامن تقافى النو والوسم طاحي
معا بني عمه على الكره والخير&&& مدهالهم سعدٍ وماه القراحي
هم ستر زينات البني الغنادير&&& من فوق صفراًلاذعرها الصياحي
ببن الدواسر والجمالين ومطير&&& خيالة الحرشا طيور الفلاحي
شوامرًتنطح جموع الطوابير&&& كسابة الناموس لاجا الصباحي

هذه قصيدة ابن قروش رحمه الله وهي اطول من ذلك وهذا الذي يحضرني وشكرا للجميع
اخوكم صبي الملازيم