همــهـــمــات سعد . . !

[سعد الصميل]

قبل شهر تقريبا بدت المدارس والروضه . . وكالعاده البزران خسروا اطنان من الدموع في اول الايام . .

لكن اكيد الحين تعودوا

يقال لي لأني طبعا ماكنت اذكر احداث العمر ذاك . .


اني كنت متحمس على الروضه . . وقبل لا يوصل العمر اللي يسمح لي بالدخول للروضه . .

كنت ابكي ابي اروح للروضه !! << طفل نشيط ومتحمس مو مثل بزرانكم

المهم . . قاموا يبون يسكتوني الصبح . . لبسوني لبس واحد من البزران حق الروضه وعطوني جنطته . . يبوني اسكت ومارضيت . . اصريت على الروحه !!

قالو خلاص وقف عند الباب وبيجي الباص ياخذك . . وكان يومها خميس مافيه روضه ولا مدارس . . فـ قالو خلوه ينلطع عند الباب شوي لين يمل ويعود . .

الحاصل انه جاء باص حق العمال قدام الملاحق اللي مقابلنا وركب معاه العمال . . وركبت معاهم انا وجنطتي !!

ههههههههههههههههه

وراح الباص يودي العمال لدواماتهم لين فضى الباص !!!


وبدت ررحلة البحث عني لين الحمدلله عقلني الله على اهلي ورجعني راعي الباص من المكان اللي خذاني منه . . !!


بعدها . . تابو يدخلون الشي في راسي حتى لو كذب

[سعد الصميل]

الكويتيين يهود الخليج !! << ياساتر !!


اكبر تجار الخليج كويتيين !!!


الصقر مره قال مو كل من عنده 70 مليون دينار قال انا تاجر !!! << هايط علي اكثر !!


تجار الكويت هم اللي عمروا دبي ترى وبنوا الناطحات اللي تشوفون !! << بالله عليك ؟؟


تجار الكويت يتحكمون في اسواق العالم !!


كثر الكلام عن تجار الكويت والهياط فيهم .. طبعا هالكلام نسمعه من ربعنا .. وكنا نحسبه صدق

الصدق بالتقرير اللي طلع امس بالصحف الاقتصاديه ان اثرياء الشرق الاوسط هم السعوديون بـ 227 مليار وبعدهم الاماراتيين ..


والكويتيين مو موجودين بالحسبه !!


عايشين وهم ونشوف انفسنا الاحسن دايم

[سعد الصميل]

في الزمان الغابر .. بالتحديد سنة 1997 كنت مصيف في باريس .. << طبعاْ المقصود هنا الوادي المقدس

وكان الوقت الساعه 1000 الظهر << زدت الرقم لأن الجو كان يخليك انك تحس ان الساعه كذا !


جانا اتصال من الكويت يقول بشروا سعد بهديه .. ترى هديته كمبيوتر !!!

ياإلهي .. ماصدقت الخبر من الفرحه .. اخيرا بطلق كافيهات الانترنت اللي زلغت وجهي ذاك الحين .. الساعه بـ دينارين !

على طوول رحت ارتب الجنطه والهمااام الى الكويت .. وداعا الوادي .. وداعا باريس ..

رجعت لقيت الكمبيوتر وحضنته .. بس الصدمه ان فيه شخص فرض نفسه شريك معاي بالكمبيوتر بالغصب !! بحكم فارق السن طبعا .. واني اخاف منه ثانيا .. وكان يقعد على الجهاز 23 ساعه والساعه الباقيه لي انا !

الله على الايام ذيك .. لالا اسف .. جعل امحق ايام اللي مافيها العم قوقل

كان الياهو هو سيد العالم وقتها ! وماينفع بعد !

احلى شي بالموضوع اني لقيت ورقة على طاولة الكمبيوتر ومكتوب فيها :

برب = يعني بروح وبرجع
باك = يعني رجعت لكم
ولكم = تنقال للي رجع بعد ماقال باك
لووول = يعني ضحكه !!

ههههههههههههههههه

الخ الخ من الرموز

ايام قبيحه بجد .. بس حلوه برضوو

[سعد الصميل]

اكثر ناس تسب امريكا العرب ..

اكثر ناس معجبه بديمقراطيه امريكا العرب ..





اكثر ناس تدعي على امريكا في صلاة الجمعه العرب ..

اكثر ناس تدعي ربها انه يرزقها الهجره لأمريكا العرب !!




اكثر ناس تعادي ثقافة امريكا العرب ..

اكثر ناس تضرب المثل في نجاح امريكا العرب .. !





اكثر ناس مأذين أمريكا العرب ..

اكثر ناس مستفيدين من اعانات امريكا او حمايتها .. العرب !!



اكثر ناس معقدين ومرضى نفسيين ومتناقضين هم العرب .. هذا اللي وصلت له بالنهايه

[سعد الصميل]

الله ياخذ فلان .. والله عليه سوالف توسع الصدر !!


الله يقلع فلان .. شفت وش سوى فينا بالضحك ؟؟



الله يلعن فلان .. والله ياهو ونيس !!


الله يرج فلان .. عزالله انه اضحكنا اضحك الله سنه !!


انا بعرف .. حنا ليش نسب بقصد المدح ؟؟

مع اني اعرف ان لغتنا غنيه ماهي ضحله علشان نسوي كذا


لا واذا جاك يمدح الشخص يقول ذيب واذا يذمه يقول كلب .. مع اني اشوف ان الذيب ماوراه الا الشر لأنه اصلا عدو للانسان


والكلب الله يعزكم .. فوايده اكثر من اي حيوان على الارض


يصير نخليها من الحين اذا نبي نمدح احد نقول فلان كلب ؟


والا فيها قبايل ؟

[سعد الصميل]

انتخابات .. فرعيات .. تشاوريات .. تصويت .. انبطاح .. انشكاح ..

هذا مايدور في كل مكان حاليا ..

في البيت .. الدوام .. الدوانيه .. المخيم ..

في كل محل مافيه غير سوالف الانتخابات .. لكن في الهمهمات ان شاء الله انها مو موجوده . .


بسم الله ..

[سعد الصميل]

التلفزيون ماهو صندوق وفيه ناس مثل مايراه الناس قبل .. ولا هو مجرد جهاز تشوف فيه الاخبار وغيرها وخلاص ..

التلفزيون صار مهم في الوقت هذا لدرجة انه صار يربي الاجيال !

في اليابان في الثمانينيات .. يوم بغوا يوجهون الشعب لكرة القدم ويواكبون العالم .. حطوا مسلسلات كارتونيه عن كرة القدم الكل يذكرها .. ابطال الملاعب .. الكابتن ماجد .. الهداف . . وغيرها ..

فـ صار فعلا توجه الاطفال عندهم على كرة القدم وبعد ماكانت البيسبول اللعبه الشعبيه الاولى في اليابان .. اخذت مكانها كرة القدم .. وتطوروا وصار جيل الثمانينات هم اول من نهض في كرة القدم باليابان .. وشفناهم وصلوا الى دور الثمانية او دور الـ 16 في كأس العالم 2002 على ما اعتقد ..

عندنا في بداية التسعينات طلعت مسلسلات تريزا ومدري وش .. المسلسلات المكسيكيه ..

وربت جيل كامل على ان الواحد لازم يعيش مع حبيب .. ولازم يكون علاقه !!

والناتج ؟ مايحتاج اشرح لكم .. عسى الله يستر على المسلمين

الكلام .. بالنهايه ..

ان التلفزيون صار شريك في التربيه .. من غير المقبول انك تترك التلفزيون يربي البزران على كيفه ..

كلامي صحيح .. رجاء لحد يشكك فيه

[سعد الصميل]

خلونا بالاجهزه ..

التلفون النقال ..

في البدايه كان الهدف منه ان التلفون يكون معاك في كل مكان .. تطور وصار انك تكلم منه وترسل رسايل بدال شغل المصخره قبل رساله ومكتوب وتلحس الظرف علشان محد يفتح رسالتك

تطور الوضع وصار فيه العاب .. بعدها الة حاسبه .. منبه .. رزنامه .. !!

زادت الميزات وصار فيه كاميرا !! .. ارسال صور !! ارسال فيديو !!


بالنهايه .. صار مكتب كامل في مخباك .. وكل تطور يصير فيه ينسيك التطور اللي قبله ..

الله يخلي لنا بلاد العم سام .. ياكثر ماخدمتنا .. وياكثر مانستهلك !

[سعد الصميل]

خدمة اكسبرس .. توصيل اكسبرس .. مطعم اكسبرس ..


طيب اسمعوا مني .. نصايح اكسبرس !!


تفضلوا 10 نصايح سريعه ..

1- لا تاكل في مطعم يفتح 24 ساعه ! ( ماعنده وقت يسكر وينظف )

2- لا تروح البر وماتكون ماخذ جاكيت ! ( مو شي يغشك البرد )

3- لا تنام بدري ! ( علشان ماتصحى بدري وتوهق نفسك )

4- لا تعطي البزران وجه ( علشان تحافظ على كرامتك )

5- لا تخلي بانزين السياره يصفّر وتكون راسم على محطه معينه ( علشان ماتجيها تلقاها مسكره للصيانه )

6- لا تبحث عن الحلول السريعه دائما ( لأنها بالغالب تكون سيئه )

7- لا تاخذ اجازه وماتسافر ( علشان ماتحس انك ماكو شغل )

8- لا تعطي احد اكبر من حجمه حتى لو كان الشخص هو انت ( علشان ماتاخذ مقلب بنفسك )

9- لا تحضر مباراه لمنتخب الكويت بالكويت ( علشان ماترجع البيت ضايق خلقك من الخساره )

10- لا تسمع ولا شي من النصايح اللي فاتت .. كلها ضاربه الرصيف !


طيب مالاحظتوا ان النصايح كلها .. لا ؟

[سعد الصميل]

امريكا .. الكل يسبها .. الكل يكرهها

الكل يتهمها .. الكل يبغضها .. الكل يطلع كلام عليها ..


الخليجي يكرهها لأنها طامعه في النفط .. المصري يكرهها لأنها تبي تحمي اسرائيل منهم .. المغربي يكرهها لأنها تبي تستعمرهم .. الايراني يكرهها لأنها تهدد ثورة الولي السفيه .. الافغاني يكرهها لأنها حاربت طالبان .. العراقي يكرهها لأنها نهبت بلده وثرواتها .. الصيني يكرهها لأنها تحارب الشيوعيه .. الروسي يكرهها لأنها دقت خشمه بالقاع .. الخ الخ

لكن بالمقابل ؟

كل ماذكرت من اللي فوق .. يتمنون يروحون لها ويعيشون فيها !

بإختصار .. بلد فرص .. بلد منفتحه على شعبها وعلى العالم .. اتركوا منكم الحكي الفاضي .. والله انها ديره وبس


الكل يكرهها .. والكل يبيها ..


علشان كذا طلع المثل الشعبي .. ياويلي منه وياويلي عليه !!