وقعة (عقيلان) بين قحطان وعتيبه

[غدير الموووت]

إلى جميع الأخوان ارررحبوا تراحيب المطر
صبحكم الله بالخير
في هذا الموضوع يسرني أن انقل لكم إحدى المعارك التي دارت بين قبيلتي قحطان وعتيبه وإليكم التفاصيل بسم الله :
##اسم الوقعة : [ وقعة عقيلان].
##مكان الوقعة : [ في أطراف بيشه ] .
##اطراف الوقعة: [ من قحطان آل مسعود وآل الجرو ومن عتيبه قبائل برقا] .
##قادة الوقعة: [ آل مسعود شيخهم الشيخ الفارس جعفر بن منيس بن عبود وآل الجرو الشيخ الفارس ضويحي بن عبيد الله بن عريج وقبيلة عتيبه شيخهم الشيخ الفارس محمد بن هندي بن حميد ومعه القليل من سبيع ].
كانوا آل مسعود مربعين بأبلهم حول عقيلان بزعامة الشيخ الفارس جعفر بن منيس بن عبود شيخ آل مسعود وكانوا آل الجرو مربعين بأبلهم بزعامة الشيخ الفارس ضويحي بن عبيدالله بن عريج حولهم مابه بعد في هذه الأثناء كانت قبيلة عتيبه بزعامة الشيخ الفارس محمد بن هندي بن حميد قريبة منهم ومربعين بأبلهم في مكان يبعد عن مكان آل مسعود وآل الجرو مسافة يوم كامل .
في هذا الأثناء كان مع عتيبه واحد ٍ من عبيده [ يا هاجري وإلا فهري ] وكان قصير ٍ لهم .
المهم في هذا الوقت قرر الشيخ الفارس محمد بن هندي بن حميد إنه يغزي على آل مسعود وآل الجرو المهم سمع هذا الرجال كلام الشيخ محمد بن هندي بن حميد لربعه إن بيغزى فسرى من ليله ويوم وصل لآل الجرو وعلمهم بنية ابن هندي بالمغزى قاله الشيخ ضويحي بن عبيدالله بن عريج
:[عن آل مسعود على عقيلان رح وعلمهم بنية ابن هندي ] .
المهم استعدوا آل الجرو وآل مسعود لابن هندي وربعه .
قال الفارس ضويحي بن عبيدالله بن عريج آل الجرو للشيخ جعفر بن منيس بن عبود شيخ آل مسعود : [ يابو ذيب أنا يا ضويحي بتيّه بكاري على عقيلان واستدرج العتبان لين جاوا يبون الأبل دخلنا عليهم صفين حنا يآل الجرو وانتم يآل مسعود من يمين ومن يسار وخيالة ٍ يجون متفرقين يباغتونهم فجاءة ].
المهم بعدما وصلو العتبان لعقيلان ودارت المعركة الشرسه بين الطريفين وقتل خلق كثير من الحمده وغيرهم من عتيبه حتى تركوا عتيبه عقيلان ولاذوا بالفرار من الوقعة وانتهت المعركة بانتصار قحطان على عتيبه .
في الحقيقه برز في هذه المعركة فرسان واجد بان لهم فعل ٍ طيب ذاك اليوم ومنهم :
1)الشيخ الفارس جعفر بن منيس بن عبود شيخ آل مسعود.
2) الشيخ الفارس ضويحي بن عبيدالله بن عريج آل الجرو.
3) الفارس عروان بن منيشط آل جاهل آل مسعود.
المهم بعد هذه المعركة قال الشاعر عبدالهادي بن شعواء آل سبعان الخنافر هذه القصيده يذكر فيها ماجرى في وقعة عقيلان يقول ابن شعواء:



حر ٍ شهر من صوب نجد مطـاره
نوى المطار وقرّب الفطر الشيـب.

ثوّر من الصخـة تقّطـع شـراره
يتلاه من برقا أسوات العياسيـب .

وعلـى عقيـلان نوانـا بغـاره
وعما علينا مدنا مـن الأقاريـب

قلـط حشيفـان يـدور سـبـاره
متعليٍ فـي نايفـات المراقيـب .

كانوا علينا والدبش بنـت شـاره
لاد الكريزي ميبسين المشاريـب.

لحقوا قحاطين أسـوات النمـاره
والكل منهـم لفهـا بالعراقيـب.

ابشلف ٍ مظاربها أسوات الحجـاره
ترعى بها العرّا ويرقى بها الطيب

عاداتنا في الجلـب ننقـي خيـاره
ثلاثة الجذعان غصبٍ بلا طيـب .

اللي شرد خلّـى الحويـا ايسـاره
واللي نصا رنية يدور معازيـب .

عـز الله إنهـا حجـة ٍ بعتمـاره
نطاحت الوكحا انجوم المغاييـب .

يا مسوي الفنجـال كثّـر بهـاره
وعدّه على عروان واثنه لابو ذيب.

وعدّه على الشاوي متيـه بكـاره
ضويحي ياشوق البني الرعابيـب.





المقصود من [ حر ٍ شهر صوب نجد مطاره ] المقصود الشيخ الفارس محمد بن هندي بن حميد .
المقصود من [ يتلاه من برقا سوات العياسيب ] يقصد قبيلة برقا من عتيبه وذلك لكثرتهم ذاك اليوم .
المقصود من [ اللي شرد وخلى الحويا يساره ] هم قبيلة عتيبه عندما هربت من المعركة باتجاه الحويه .
المقصود من [ واللي نصى رنيه يدور معازيب] هم اللي مع بن هندي من سبيع عندما هربوا من المعركة.
المقصود من [ عروان ] هو الفارس عروان بن منيشط آل جاهل آل مسعود.
المقصود من [ أبو ذيب] هو الشيخ الفارس جعفر بن منيس بن عبود شيخ آل مسعود.
المقصود من [ ضويحي] هوالشيخ الفارس ضويحي بن عبيدالله بن عريج آل الجرو.
هذا ولكم خالص تحياتي

[تركي بن خالد]

ودي أصدقك بس .. قويه

أنتوا الله يرضى عليكم تختلقون معارك وهميه لا وجود لها وتصدقونها

يـام وذبحتوهم

عتيبه وذبحتوهم وكسرتوهم

ومطير وطردتوهم

والنتيجة هاذي القبايل الثلاث هي اللي سادت في الجزيرة العربيه نجداً وشرقاً وجنوباً

لا تكثر من قراءة منتديات قحطان

[غدير الموووت]

تركي بن خالد رح انشد شيبانك جعلك تحيا الحباب متولين يام وحط تحت كلمة الحباب الف خط

والجحادر حدرو طال عمرك من تهامه الين تولو مطير وتولو عتيبه ولا على قبايل قحطان زود

[غدير الموووت]

وترا دليل المعركه موجود وهو القصيد اعرف كيف ترد على الرجال ان كان عندك رد ماهو تلفيق كلام


انت من اي قبيله؟؟؟؟؟

[تركي بن خالد]

ياخوي أنت تعيش في أوهام ...

الحباب من متى متولين يـــام ؟؟؟! .. ياخوي في الأنترنت يمكن .. أما الواقع والتاريخ كلن يعرفه


يا رجال والله يا فيه حبابي يحكيلي ..عن فخذ واحد بس من الوعله .. اللي هم آل راكه .. يقول ويحلف والله ما فيه أحد من الحباب إلا وذابحين آل راكه له أخيه ولا ابيه ! .. خل عنك يـــام كلها

والحباب ونعم بهم وأظنك منت منهم.. ولكن يتولون يـام هذي ماقدر عليه حكام الجزيرة اللي يقودون القبايل كلها ومعهم قبيلتك يا سيت غيرهم

اللي يتولى يامر وينهى .. ويــام ومطير وعتيبه ... ما تزحزحت عن أراضيها ولا خضعت

أنت تنقل كلام ورعان صغار في منتدى قحطان ما يعرفون التاريخ ولا سلوم العرب كلن يضحك بهم

[سيف الدوله]

مشكور

[غدير الموووت]

تركي ابن خالد وشي فعول ال شنان وشي فعول ال سريع وشي فعول ابن زهره يوم خذا صبيان الحباب وراحوا بدر يبي يتقاضى لخاله ابن عايشه يوم ذبحوا خمسين رجال ووشي فعولالعنابس

وانت اظنك تعرف معركة القصب الي هي من اكبر المعارك الي صارت بين قحطان ويام ان لم تكن الاكبر ويقول فيها احد شعرا الحباب طبعا القصيده طويله لكن لايحضرني الاكم بيت واعذرني ان كان به اخطاء

ياجابر كان المغزي حدرا __صوب ابن عبود انعم الخياله

الي خذا الخانق وخرب بدرا__واوفى بعبد ......وعواله



الى ان يقول

هو مادرا ان سنحان ظون حمرا__قوم تقاظى حفها بفعاله

[قاصد الخير]

قحطان وعتيبه قبائل الجزيرة التي لها فضل ومكانه والناس تعلم مكانتهم وحجمهم وامور المغازي لاتقدم ولا تاخر ولاتزود ولا تنقص بل الكل منهم له مكانته واخذ حقه من التاريخ واليوم اخوان واحباب وجيران وانساب وفي اوطان واحدة ونعمه الله يديمها علينا وعليكم

[ساسي جنيه]

غدير الموووت

لاهنت على هالطرح

لكن أبغي أقولك إن قحطان كل يوم والثاني منزلين حرب جديده أول مره نسمع فيها

وكل الحروب هم المنتصرين فيها

وفيه حروب والله ثم والله مالها مكان بالواقع وخصوصاً الهواجر من قبيلة قحطان عليهم إختاراعات في الحروب مشاءالله تبارك الله شي عجيب

وأنا كنت في منتديات قحطان وشفت بعيني وكل ماصححت لهم في حروبهم وطلعت الحقيقه أحذفو الموضوع بكبره مايبون يحذفون ردي لأنهم يدرون أن ردي صح

وقحطان والنعممممم فيهم ماقلنا فيهم شي وهي قبيله معروفه ولاحد يقدر يعذرب فيها لا أنا ولا غيري

بس عيب إنكم تنقصون من حق القبايل الثانيه وهي لها تاريخها ومجدها واصالتها ومستحيل تقدر تثبت إن قحطان أحسن القبايل

لأن كل القبايل فيها المنتصر وفيها الخسران وفيها الزين وفيها الشين

بس أحب أقولك معلومه أنتو فاهمينها غلط يالقحاطين

أكثر من مره أشوف قحطاني يكتب كفايه إن كل القبايل يرجعون لنا .؟؟؟؟؟

شكلكم مضيعيين إن قبيلة قحطان تختلف عن قحطان الأب نفسه

ويعطيك العافيه

وتحيـــاتـي لك

[غدير الموووت]

ساسي جنيه وشي المعارك المغلوط فيها قلي