السلام عليكم
حيا الله كل واحد باسمه اولاد وبنات << البنات الاخيرة عشان ماتقولون وين حقوق المرأة بمواضيعك
عالم الانترنت عالم مليء بالغرائب والمفاجأت .. يمكن يمثل كل انواع وأطياف المجتمع وعندما تغطس في عالم الانترنت راح يمر عليك كل انواع البشر العبقري والداج الملتزم والداشر.. الفكاهي والنكدي .. الرومانسي والمتبلد الحس يعني لاتستغرب من هالبشر وخــذ وخل والحيـــاة حلوة << (( بس نفهمها))
ندخل بالجد .. اكيد وانت تطقطق اصابعك بالكيبورد وتدخل هالمواقع والمنتديات والشات وغيره تصادف ناس << اجل وش تصادف؟؟؟!! .. فيه ناس من كتابتهم وروحهم تحس انهم اقرب لك من غيرهم وتحس انهم يفهمونك ويشاركونك افكارك ومافيه شك انك كونت علاقات صداقة واخوة مع البعض سواء خلف الشاشه أو من خلال الصداقة التي تربطك معهم من قبل لدرجة أنك نثرت اسرارك كلها بحضنه...(( تراني اقصد من نفس الجنس لحد يطب بحلقي ويقول انك تشجع على الفسق والمجون )) يمكن علاقاتكم تطورت من رسائل خاصة الى ماسنجر ثم الى مكالمة بالجوال ويمكن قابلتوهم على ارض الواقع ....... هنا مربط الفرس
طبعاً علاقتك مع الاشخاص اللي تعرفت عليهم من خلال الانترنت قد تكون سطحية مجرد سلام وكيف الحال ويمكن تصل الى مستوى تشوف انه تؤام روحك
بقولكم عن تجربتي .. انا تعرفت على ناس كثيرين قبل لا نعرف الانترنت وصادقتهم صداقة عمر وهالصداقة مالها غير طريقين ياأنها تنقطع بسبب او شيء آخر أو انها تستمر (( إلى أن يرث الله الارض ومن عليها)) وهاذي ولله الحمد اغلب صداقاتي,, وعشنا مع بعض الحلوة والمره....وناس عرفتهم وحبيتهم بعد ظهور الانترنت.....حبيتهم من كتاباتهم وأعجبت بمستوى افكارهم وأخلاقهم العالية لدرجة اني تحمست اني اشوفهم على الطبيعة ..
طبعاً .. انا مايهمني الشكل لأن الشباب السعودي مملوحين الله لايضرنا << ايه هين .. ومع جلوسي ومقابلتي مع اكثر من شخص استنتجت ان الانترنت غير الواقع .. يعني بالانترنت دائماً نظهر الشي الايجابي من شخصياتنا وتلقانا وش حليلنا .. لكن الواقع يختلف بقولكم ليش ؟؟
شخص اعرفه من كتاباته يظهر انه ملتزم وكل مواضيعه بالدين لدرجة اني تصورت شكل الشخص ان لحيته الى سره بس يوم شفته لقيته غير .. اول ماشفته انصدمت بحكم انه (حليق ) بصراحة وركبت معه بالسيارة وكان مشغل محمد عبده وانواع الردح بعدين وتخاوينا للمقهى واكتشفت انه صاحب كيف ( يعسل ) وسوالفه اكثرها خاثرة يعني انقلب تصوري عنه 180 درجة
شخص ثاني اذا قريت كتاباته تقول هذا ذابحته الرومانسية وخواطره تخلي حتى الرجال يذوب وشلون البنت .. قلت بس هذا لازم استفيد واتعلم منه كم كلمة حلوة وشلون اصفصف الحتسي واصير رومنسي
وقدر الله وتقابلنا ... لقيته انسان مختلف ماخذ الدنيا بكل سهاله وفال ابوها ,, كل سوالفه ضحك ووناسة....والله وراحت جلستنا كلها ضحك ووناسة والبلوتوث يدهر وخذ يا مقاطع لدرجة اني لطشت كل اللي بالميموري كارد حقته
يعني بصراحة .... الرومانسية بوادي وهو بوادي
وشخص ثالث قابلته وبالنت اعرفه مزوحي لأخر درجة... لدرجة اني اتسدح من الضحك انا وياه بالشات ... المهم يوم تواعدت انا وياه وتقابلنا لقيته ماغير ساكت يالله تسحب الكلمه منه وشكله يجيب الاكتئاب لدرجة اني انلحس مخي احسب اني مشبه على واحد ثاني مو خويي اللي اعرفه
(((((( الــــــــزبـــــــده ))))))
ماهو كل واحد بالانترنت يمثل شخصيته الحقيقية .. قد يكون يمثل الشخصية اللي يطمح يصير لها .. بعد هذا الدرس المفيد وش رايكم اطرح لكم بعض الاسئلة الخفيفة وهي من صلب الموضوع
هل قابلت واحد او قابلتي وحدة عرفته/ عرفتيها من خلال الانترنت ؟؟ واذا كان نعم وش كان انطباعك بعد ماشفته ؟؟
هل واجهت مشكلة او حرج معه لدرجة انك حسيت ودك تنهي علاقتك معه بعدما عرفت امور سلبيه كثيرة فيه يعني اكتشفت انه مايصلح يكون صديقك ؟؟
وش رايك بالصــداقة من خلال الانترنت ؟؟ وهل اذا طلب منك احد تعرفه بالانترنت مقابلتك شخصياً توافق وترحب بالفكرة ؟؟ ام تعتذر بشكل غير مباشر (( بالعربي تصرفه ))
ودمتم سالمين /// على فكره مانبي مرور وشكرا على الموضوع ( المرور والشكر معودينا عليها الله يحفظكم) نبي تعليقك الصريح على الموضوع المطروح.
10-11-2005, 08:37 PM
كيف لو تقابلنا خارج النت.....سجل تعليقك الله لا يهينك
العرض المتطور
