عوى الذيب

[ولد مرزوق]

السلام عليكم
ومساكم الله بالخير جميعاً كلن بأسمه

وهذا اول مشارك لي في ديوان قصه وقصيده
وانشالله انها ما تكون الاخيره وانشالله انها تعجبكم

وهذه القصه قصيره بس انشالله تعجبكم


القصه :

هذي قصه واحد ماني عارف اسمه ولا قبيلته بس ان قصته عجبتني فحبيت انكم تعرفونها


هذي القصه تحكي عن رجال فارق زوجته بسبب خلافات بين قبيلته وبين قبيلة زوجته فجاو اهل زوجته ووخذو بنتهم
الي هي زوجته وفي يوم من الايام اشتاق الزوج لزوجته وحب انه يشوفها فأرسل لها حرمه تبلغها انه بيجي في اخر الليل عند ديارها وراح يقلد عوى الذيب وبيعوي ثلاث عويات وهذي كانت الاشاره بينهم فلما تسمعها تروح له وتقابله
فجا الزوج وعوى وطلعت له زوجته ويوم خلص لقائهم << الزوجي >> سرى الرجال عند اهله وهي سرت عند اهلها
فحملت المره من زوجها ويوم درو اهلها انها حامل شوكو فيها لانها ما شافت زوجها من اشهر فبلغتهم ان زوجها جاها وبلغتهم بالي صار كله
فما صدقوها وحلفت لهم وسوت المستحيلات عشان يصدقونها لكن مع كل هذا ما صدقوها
فقالت روحو لزوجي واسألوه وشوفو وش بيقول
وعشان يقطعون دابر الشك راح احد اخوانها لمجلس زوجها
ومسك الربابه ونشد ذي القصيده :

ياذيب يالي تالي الليل اعويــت --- ثلاث عوياتٍ على ساق وصلاب
سايلك بالله عقبها ويش سويت --- يوم الثريا راوست والقمر غــاب

فرد عليه الزوج بهذه الابيات فقال :

انشهد اني عقب جوعي تعشيت --- واخذت شاه الذيب من بين الاطناب
على النقا والا الردى ما تهقويت --- ادوا حلالي يــاعريبين الانســاب

فبعد الي صار هذا كله ردت الزوجه لزوها .


وانشالله تكون القصه عجبتكم وانها حازت على رضاكم






اخيكم : ولد مرزوق

[راكان اليامي]

ارحب يابن مرزوق

واشكرك على القصه المعروفه

وتسلم يمينك

تحياتي

[فيصل بن حجرف]

السلام عليكم

لاهنت يا ولد مرزوق
وقصه مشهوره ومعروفه
لكن والله مادري منهي له
انشالله احد من الاخوان يكون عنده خبر

تحياتي

[الخويطري]

هـلأ ومرحبا يــ ولد مرزوق


ويامرحبا بك في منتدى القصه والقصيده خاصه ومنتدى العجمان عـامـه


وشكرا لك على القصه والقصيده المعروفه والطيبه

ولأهنت مليون , ووننتظر مشاركتك وقصصك وقصيدك انشالله

وتقبل تحياتي

الخويطري

[cool]

السلاااام عليكم ورحمة الله وبركااااته

اول شي حياااااك الله في منتداااك بين جماااعتك وربعك ولد مرزوق .

وان شاء الله يستمر تواااصلك ومشاااركااتك معنا .

تسلم على القصه والقصيده اللي معهاا ولا هنت الغااالي .


كـووول

[ولد مرزوق]

لا هنتوا يالربع كلكم على المرور

ويعطيكم الف عافيه

[Ajmi]

وعليكم السلام ورحمة الله وبركاته

يا سلام يا ولد مروزق على ها السالفه و القصيده

تسلم يمناك ,, ولا هنت يا الطيب