كون المبــاحيص

[العماني]

هذه معركة حصلت بين شيوخ مطير الدوشان والشيابين من عتيبة وكانو الشيابين بقيادة الشيخ هذال بن فهيد غازين على الدوشان في الصمان ودارت رحى المعركة وهزم الدوشان.
ويقول الشاعر في هالمعركة:

وهذال يومه على الدوشـان يدعابـه =مايندعيبه وبعـض النـاس يدعيبـه
يوم ان غضيب يزوغ العقل ضبضابه=عج الرمك وأشهب البارود يوضيبـه
وسمي المباحيص دربه يوم عشابـه=وخلا طعوس الزبار يساوي شعيبـه
وصبح زعيم العموم مطيـر ماهابـه=وحول بيته وخلـى مـن مواجيبـه
واخذوا ثياب البكار الشقح بأسبابـه=وهـذا جزلـه وماسـواه سويـبـه
واشتال بيت الدويش اللـي يحلابـه=لين دق في نجد اخو هملاء مناسيبـه
وهذا جزاء من فعله فعـل يجزابـه=يجزاء بمثلـه ومـع مثلـه نثاريبـه
وهذي أفعال أجداد الشيـخ وأحبابـه=واللي مشوبه خذاه ومعـه يمشيبـه
اخذ الظفر والسخاء ومشـرع بابـه=ويضحك حجاجه ومن زاره يهليبـه

[أبو الوليد]

لاهنت يا بومبارك

[ابو غالب]

لاهنت يابو مبارك

سمعت ان في هذه الغزوه كان الدويش و جماعته غازين على قوم ويوم جا هذال ابن فهيد ما لقا غير بيت الشعر الخاص بالدويش فاضي و عبيد الدويش يقومون بحراسة الشقح فقاتل عبيد الدويش الشيابين وقتلوا واخذ الشيابين الشقح و بيت الدويش لكي يتباهوا به

وعندما رجع الدويش من غزوته سمع بغزوة الشيابين فغزاهم واسترجع الشقح منهم

والله تعالى اعلم

[ابو فهد العتيبي]

الله لايهينك يا العماني
اما بالنسبه لابي ميار منين جبت المعلومات اللي تقولها والمعروف ان مطير تكره طاري ذا الحرب وبعدين انت تقول ان مطير ردت البل انا ان شاء الله بجيبلك محاوره صارت بين عبد الله بن سنان وبين العير المطيري وتثبت عكس اللي تقوله وشكرا مره اخرى لك يالدوسريز

[العماني]

أبو الوليد

حياك الله ولاهنت على المرور

تقبل تحياتي،،،

[واثق]

لا هنت يا العماني، وبيض الله وجهك على هذه المعلومات التي تتحفنا بها.
ترانا يا العماني نطالبك بالمزيد، مع كل موضوع تفيدنا به.

[العماني]

أبوميار

حياك الله على القصيدة وبخصوص كلامك اذا قريت القصيدة وتفهمت بمعانيها تعرف على طول انه لايطابق ما قلت.حيث يبين الشاعر ان غزوتهم هاذي ثأر لغزوة لمطير سابقه عليهم.

واخذوا ثياب البكار الشقح بأسبابـه=وهـذا جزلـه وماسـواه سويبـه

وبيت أخر قال:

وهذا جزاء من فعله فعـل يجزابـه=يجزاء بمثله ومـع مثلـه نثاريبـه

تقبل تحياتي،،،

[ابو غالب]

الاخ العماني

يعلم الله ما كان ودي اتكلم في هذا الموضوع

لاكن انتم تجيبون مواضيع ما منها فايده

وقبيلتين مطير و عتيبه عزيزتين علينا

فأما انت تجيبون السالفه كامله من كل الاطراف واتحرون الدقه والمصداقيه فلي تجيبونه او لا تجيبونها افضل على شان لا يزعل احد

وانا سأتكلم في هذا الموضوع معبرا عن أعجابي بالشيخ نايف بن سلطان بن شقير الدويش لكرم اخلاقه و نبله و شهامته

سمعت ان الشيخ نايف بن شقير الدويش غزا الروسان من برقا من عتيبه و كسبهم و غزا الشيابين من برقا من عتيبه و كسبهم

فردوا الشيابين بغزوه على الدوشان من الموهه من علوى من مطير فلم يجدوا سوا عبيد الدويش و بيت الدويش اللذي فيه ام نايف بن شقير و اخت نايف جوزاء و الدوشان كانوا غازين على قوم اثناء هجوم الشيابين

فقتلوا الشيابين عبيد الدويش و اخذوا بيته اللذي فيه امه و اخته جوزاء ( سلبوهن ) و سلبوا الشقح ايضا

فلما رجع الدوشان من غزوتهم ردوا الغزوه على الشيابين و ذبحوا مسلط بن هذال بن فهيد شيخ الشيابين و سلبوا اخت الشيخ هذال بن فهيد اللذي يعتزي بها اخو هملا

وقال شاعر من مطير

هملا سلبناها ومسلط ذبحناه ... لعيناك يالشقح وبيت الدويش

فلما علم الشيخ نايف بن شقير ان جماعته سلبوا هملا غضب غضب شديد و قال هذي ماهي سلوم مطير تسدنا كسيرتهم و ذبحة مسلط

وقالوا مطير لاكنهم سلبوا جوزا قال هذا عار عليهم واذا الناس اتقاضا بسلب الحريم ما عاد باقي بهالدنيا بنات حمايل

فردها الشيخ نايف بن شقير لاهلها بنفسه معتذرا عن ما فعل جماعته

هذا ما سمعته والله تعالى اعلم

[ابو محمد]

لاهنـــت يابو مبــارك

[الاشم]

للتوضيح بخصوص المباحيص

اولاً: اشكرك الاخ العماني على هذه المشاركة وعلى التوضيح والرد على ميار.

ثانياً: اشكر الاخ الذي ابلغني عما غالط به الاخ ميار حتى يجير هذا الكون لصالحه بإختلاق الاكاذيب , وقد طرح هذا الكون في بعض منتديات مطير , من بعض العتبان , وكانت ردود المطران على هذا الكون انه غير صحيح , وان الدويش لايستطيع احد غزوه في الصمان , والاخ ميار غير هذا المنوال , بالاعترف بالكون , وإختلاق بعض الجمل ليسوق بها كلامه , ولايهمنا في كلامه بشيئ , وسوف اوضح عن هذا الكون , وبعض مغالطاته.

التوضيح:

القصيدة التي اوردها الاخ المشرف العماني , هي قصيدة حمود بن عيد الدعجاني...


وهذا الكون ثأر لاحد العتبان غزو عليه الدوشان بغيابه , واخذو حلته , وارسلة احد النساء تنخى هذال , ويقول شاعر من الروقه , في هذه النخوه , وماتمخضت عنها:

وعلى درب المباحيـص التقينـا=وشيـوخ القـوم طفينـا بختهـا
لعيـن الـي تنـادي بالاسامـي=تثـاري للنخـاه الـى نختـهـا
وأخذنـا حلـت القـوم ودبشـهـم=جـزاءً لفعولهـا الـى فعلتـهـا
نجازيهـم بمـا مـدت يـداهـم=نكيل الصـاع والنـا راجحتهـا

والتي اخذت عطفتها , هي الدحملية وليس غيرها كما قال ميار (( وهذه غير سلبتها التي سلبوها القحاطين )) , وكان هناك احد المطران مرسل قصيدة لاحد العتبان , ويذكر فيها تحمسهم في القتال عندما تنخاهم صاحبة العطفه , وهي الدحملية , يقول المطيري في احد ابياته:

لعيون من يزهى ذراعه سواره=هيم البطون مزهيات الخواصير

فرد عليه شاعر العتبان , يذكره بسلبت العطفه في المباحيص, واين ذهب حماسهم:

تقـول مـن يزهـي ذراعـة ســواره=لعيونهـا دمـرتـو الـنـاس يامطـيـر
لكـن مـدري ويـن ذيك النـمـاره=عن ( الدحمليـة ) يـوم جينـا معاييـر
نجرهـا بـيـن الــذراء والـغـراره=من الهودج الـي كـن وسطـة نواويـر
عفـر وواشعهـا صـفـار بحـمـاره=وباقي الموضوع اريـش العيـن تفسيـر

وبعد رجوع الشيخ هذال وجماعته من هذا المغزاء , علم برجوع الشيخ الذي غزوه الدوشان بغيابه واخذو حلته , وعلم الشيخ هذال انه يرد الغزو للانتقام , فإرسل له الشيخ هذال العطفه , وابيات يقول فيها:

سلام ياشيخنا نزال الاطرافي=شيخنا اللي كل قاله يسويها
والله انا درعك اللي ضامنً وافي=عينً نضحكها وعينً نبكيها
احمد الله لابتي شربها الصافي=والحرايب حامياتً ظواميها

يقول ميار انهم ذبحو شيخ الشيابين مسلط بن هذال ابن فيهد وسلبو هملاء اخت هذال , وهذا غير صحيح لم يستلم أمارة الشيابين احد بهذا الاسم , فبعد الشيخ هذال استلم ابنه جهز الامارة , وبعد الشيخ جهز استلم الشيخ ماجد بن ضاوي ابن فهيد الامارة , واصبح احد الاخوان في عهد الامام الملك عبد العزيز , ولم يقتل المطران احد من الفهيدات امراء الشيابين , ولم يغزو المطران الشيابين لاقبل المباحيص ولابعده.


هذا كون المباحيص ومانتج عنه