|
ملحمة ابن غشام توضخ تاريخ دولة بني خالد ملوكهم, فخوذهم,فرسانهم,معاركهم,شعرائهم,
اخواني اضع بينكم هاذي الملحمه التاريخيه لابن غشام اللتي تغني عن كثير من الكتب والكلام حيث انها تشمل كل شي عن دوله بني خالد اللتي دامت ثلاث قرون ملوك بني خالد وافخوذهم وفرسانهم ومعاركهم وشعرائهم ومشايخهم اهل العلم بالدين.
اخواني لا اطيل عليكم اليكم القصيده.
بسم منـزل الأعـراف والطّـور والفرقـان=جعل محكـم الآيـات فـي محكـم سورهـا
تباركـت يالرحـمـن يالمعـطـي المـنّـان=وباسمـك بديـت أبيـات شعـرٍ مصادرهـا
من الهاجس اللـي لا انفجـر كنـه البركـان=يذوّب صخـور الأرض ويرمّـد أخضرهـا
ولامـن تنهّـد فـاح فوحـه كمـا الدخّـان=مـن علـوم صـدرٍ قـام يكثـر تسعّـرهـا
ولامـن تهيّـض للشّعـر مايجـي عجـلان=يصـفّ المعانـي صـفّ ثــم يتخيـرهـا
فـلا يانديبـي فــوق خطّـافـة الأعـيـان=لهـا صـورةٍ بالشّعْـر مـا احـدٍ يصوّرهـا
لطـيّ الأراضـي جهّزوهـا هـل اليـابـان=وجـت مثـل مـا أرادوا وزادت تبختـرهـا
بعد جمّعـت بأوصافهـا الجيـب والسيـدان=أنا مـا هقيـت أحـدٍ يبـا يجهـل جررهـا
عليها نديبـي يسـرح الصبـح مـن شامـان=قبـل ماتبيـن الشّمـس والأرض تسفـرهـا
من أرض القويعية سرح لأجل شانـه شـان=وللعاصـمـة وجّــه ذلـولـه وسيّـرهـا
عطيـت النّديـب الخـطّ وإلا تـرا العنـوان=يعرفـه كمـنّ الشمـس ماعـيـن تنكـرهـا
توجّـه لـدار معـزّب الرّبـع والضيـفـان=سليل الرّجـال اللـي فَخَرْهـا مـن سيرهـا
توجّه لـدار الشيـخ و اقلـط معـه يافـلان=وبـلّـغ سـلامـي والتحـيـات كـررهـا
تحيّـات فيهـا المسـك والشيـح والريحـان=وبـالـورد والـكـادي ثنـاهـا معطّـرهـا
وبعد ما تسلّـم لـي عليـه أعطـه القيفـان=وقـل لـه تـرا هـذي القصيـدة محررهـا
محمد ولـد غشّـام وأصلـه مـن الجنحـان=وقـل ماعليكـم زود والـقـاف صـدّرهـا
لشيخ البديـدة طيـر حـوران ابـن حـوران=وشيخة بنـي خالـد بقـت فـي عريعرهـا
وهوخالد السرحـان ابـن نايـف السرحـان=أميرالخوالـد حَضْـر وضعـون وأشهرهـا
كريـمٍ كمـا الهـدّاج للبـدو والحـضـران=ذهـيـنٍ فهـيـمٍ والمعـاديـن يقـهـرهـا
سلالـة رجـالٍ حكمهـا فالجزيـرة بــان=ميـات السنيـن ومااحْـد يقـدر يقهقـرهـا
رضت ورضخت للواقع التـرك والسلطـان=بعد عجـزت تزيـح الخوالـد عـن ديرهـا
وعجزت تناوشهـم يـد الحَضْـر والبـدوان=ياكيـف يتنـاوش طايـل القـوم قاصـرهـا
بني خالـد اللـي كـل مـا ميّـل الميـزان=رسوا مثل مـا ترسـي البسيطـة عناقرهـا
لهم دولـةٍ تـدري بهـا التـرك والرومـان=وأبفخر بها وأذكـر طـرف مـن مفاخرهـا
ضناهبس حبس الدار عن طمعة إنس وجـان=ما احـد غيرنـا بيـض الحبـاري يحيّرهـا
من عمان إلى عمّـان مـع نجـد والصمّـان=من السِّيف إلـى قلـب الجزيـرة نسيطرهـا
علوم الخوالد فعـل مـا هـي قلـم ولسـان=علـوم الخوالـد تتعـب الـلـي يـزوّرهـا
علوم الخوالـد كيـف يطـرا لهـا النسيـان=ومـن يدّعـي نسيانهـا غصـب يذكـرهـا
بـدا حكمنـا باللـي لهـم هيبـة وسلـطـان=بـدا بالجبوراللـي هـل الديـن تشكـرهـا
حموا ديرة الإسـلام عـن سربـة الصلبـان=تجيهـا الأساطـيـل الكثـيـرة ونحشـرهـا
من البرتغـال جيـوش تاتـي بـلا حسبـان=لَكَـنَّ الخـوالـد بالمراهـيـف تحصـرهـا
ويا كمّ راهب طـرْح راسـه عـن الأمتـان=يحسْـبَ الجزيـرة تحتـري لـه ينصّـرهـا
ولـو يعلـم أنّـه تحتـري شوفـه الظفـران=تراجـع علـى صلبانـه العـوج يكسـرهـا
لَكَـنَّ الله أرسلنـا كمـا المـوت للرهـبـان=والأقـدار مـا تقـدر تخـالـف مقـدّرهـا
وياكم ردّينـا النصـارى عـن أرض عمـان=بحـدب النّمَـش ماهـوب بأمـوال نهدرهـا
100عـام وأكثـر دولـةٍ تحكـم البـلـدان=وتنحّت ولكـنّ أختهـا جـت علـى أثرهـا
وعمر أختها قرنيـن وجـا جمعهـا وكـدان=ثلاثـة قـرون وربّـي الـلـي معمّـرهـا
بدا حكمها زامـل وهـو مخْلـي المرحـان=صميـدع ونيبـانـه لخصـمـه مكشّـرهـا
زحف للدواسـر وآل عايـذ علـى الغـدران=بجيشـه وحـاز الـدّار وأستـاق أباعـرهـا
وجـاهـا بواديـهـا وراضـتـه بالـذيـدان=وبالخـيـل والأمــوال حـتّـاه يعـذرهـا
وصبّح علىالعتـش الفضـول ومـن الدمّـان=ماعاد تعرف ويش أخضرالأرض وأحمرهـا
وأباد الزّعوب ومن فزع مـن هـل الزبـلان=تبـي تـفـزع ودارت عليـهـا دوايـرهـا
وغزا سبيـع وآل مغيـرة وخذهـم كحيـلان=وطـفّـى منايـرهـا ولا نــار نـايـرهـا
وبعده حكـم سيـف ابنـه الفـارس الطعّـان=وجـيـهٍ يــهللها و وجـيـهٍ يمـعّـرهـا
وأخوه أجود المعروف كاسرجيـوش إيـران=وتَعَرْفـه ديارالـخـرج وإيّــا دواسـرهـا
وهو اللي لفَتْـه آل المغيـرة تبـي الغفـران=وياكـمّ زلّـة وأجــود الـقـرم يغفـرهـا
ونشر سنّـة آخـر مرسـلٍ بآخـر الأديـان=نشر سنّـة المختـار فـي هجـر وهجرهـا
وهو في ثـواب الخالـق المعتلـي طمعـان=وعسـاه بجنـان الخلـد مغمـوس بأنهرهـا
وبعده ولـده محمـد علـى الوغـى شفقـان=دروبٍ يسـهّـلـهـا ودروبٍ يـوعّـرهــا
وجا بعدهـم مقـرن وهـو كاسـر العـدوان=هو اللي حمـى سيـف الجزيـرة وسوّرهـا
وأغاث الشريف بجيـش مثـل الرّعـد دنّـان=ونصرسربـة الأشـراف مقـرن وصاهرهـا
وكسرمن جيوش الـروم أساطيـل ماتنهـان=حمـى ديـرة الإسـلام لأنـه غضنفـرهـا
مجاهـد معـاهـد واثــقٍ بالله الرّحـمـن=شهيـدٍ شـرى الجنّـة بنفـسـه ودوّرهــا
وذبحنا فدى لمقـرن ملـك هرمـزٍ طـوران=هو الشاه شـاه الفـرس ثـم عـوّد أحقرهـا
وبعده حكـم عمّـه علـي وأوقـد الضيّـان=وإذا قربـت العـدوان بالسّيـف شطّـرهـا
وبعـده حكـم ناصـر حكيـمٍ وسيـع بطـان=و ناصـر ثـلاث سنيـن بالديـن ناصرهـا
وبعده حكـم قطـن المسمـى بحـدّ الـزان=ربوعـه تنـام بخيـر وعــداه يسهـرهـا
وقطن أحتمـى الدولـة بسيفـه وبالحيطـان=وبعـده غصيـب اللـي حكمهـا بأواخرهـا
لكـنّ الخوالـد طبعـهـا تـوفـي الـديـان=تفـرّ وتكـرّ وتنـحـر الـلـي يناحـرهـا
وشاعر بني خالد قحـص وأعلـن الإعـلان=وجتْه الشيـوخ اللـي الزمـن مـا يغيّرهـا
ولفى الشيخ براك الغريـر ومعـه خطـلان=الأيـمـان قــومٍ مرهـفـاتٍ شواطـرهـا
وبـرّاك هجّـد جيـش دولـة بنـي عثمـان=وفرض نفسه بسيفه علـى التـرك وأجبرهـا
تهـوّن عـن مناطحْـه فالبحـر والـبـرّان=كمـنّ البحـر ربعـي حمـتـه ببواخـرهـا
وبـرّاك مابـه شـك نـاره علـى النيـران=لـه أفعـال لـو كانـت لغيـره تكاثـرهـا
قطع راس أميـر المنتفـق يـوم حكمـه زان=وهوراشـد بـن مغامـس أقـوى عناترهـا
وأمير الظفيـر أسيـر عنـده بـلا جحـدان=سلامـة بـن سويـط المحابيـل جرجرهـا
ونازل بني سهـل برمـاح ونصـى قحطـان=علـى الحرمليّـة وأعتـرك مـع جحادرهـا
وشاعـر تميـم الشاعـر الماهـر رميـزان=مـدح فعـل بـرّاك بهنـاديـب سطّـرهـا
وجـا محمـد بـن غريـر وأعطـى الديـار=أمان ولـن عاندتـه النّـاس هجّـد مثوّرهـا
مثل مافعل "بالخـرج فـي سربـة العثمـان=ومعها الفضول ومـن فـزع يـوم خسّرهـا
وكسرسربة العسّـاف مـع سربـة النبهـان=بحايـر سديـر وعـادة الشيـخ يمخـرهـا
وسعدون بعـده شـدّ محزَمْـه أبـد مـا لان=وشاعـره راعـي البيـر قيفانـه أظهـرهـا
أخذ زعب في هيّـة و ودّب هـل العصيـان=وفالحجـرة جمـوع الظفيـري محجّـرهـا
وبتـرا نفـود السـرّ تشهـد نـهـارٍ ثــان=به"فضول"وجمـوع الظفـيـري تضافـرهـا
وشال المدافـع وسـط جيشـه عيـان بيـان=ودكـدك بهـا آل كثيـر واللـي يقاصرهـا
وبعـده علـيّ أخُـوه ثـمّ أخْـوه سليـمـان=وهواللـي مـع الحكّـام مـن قبـل سعّرهـا
تحسّـب حسابـه نجـد واللـي بهـا سكّـان=وعـان العيينـة يسمـع أمــره معَمَّـرهـا
وبعض العرب ظن العـرب تعبـد الأوثـان=وقـومٍ تجـي ضـده علـى الفـور كفّرهـا
وبالفعل هـذا زاد فأهـل الطغـى الطغيـان=وبالفعـل هـذا عــن مقـاصـدْه نفّـرهـا
وجا راعـي الهدلاعريعـر وهـو المزبـان=وإذا صرّت العـدوان هـو فاتـق صررهـا
هو اللـي غـزا الدرعيـة وهـدّم السيسـان=ولا تصمـد السيسـان لاجــت قنابـرهـا
وهواللي تواعد مع رجال من أهـل نجـران=وفـكّ الله أقــوامٍ نصـاهـا وحاصـرهـا
قبل مايجي خطّوا علـى الطّـرس بالكتمـان=مـع لمكرمـي واستخلـص القـوم ماكرهـا
وبعد مـا اكتفينـا منهـم وشامـت العقبـان=مشيـنـا وعـذاراهـا تمـشّـش عبايـرهـا
وبوقتـه منـاخ العرمـة مشيّـب الـولـدان=بـوادي الجنـوب تريـد تشمـل وحـدّرهـا
وفي وقتـه بجيشـه خـذ بريـدة القصمـان=وبـه نـاس ياسرهـا ونــاسٍ يوسّـرهـا
وجا بطيـن ولـد عريعـر ونـازل العربـان=وبعـده دجيـن أخـوه وأذكــى منايـرهـا
وسعدون ولـد عريعراللـي كمـا الشيهـان=ليـا هـدّ بالحالـه دمــا الـقـوم نثّـرهـا
و فالعتش قوم الوشـم وسديـر مـع ديقـان=تلاحم بـن عريعـر مـع القـوم وأعثرهـا
و وصلت كبار الـرّوس ماهيـب فالذّرعـان=والأبيـات مـا تحـتـاج قــولٍ يفسّـرهـا
وجيش الخوالـد لاوطـى مارجـع خسـران=وياكثر ناسٍ فـي ضحـى الكـون ناسرهـا
وفي عيون الأحسـا جيشنـا فـرّق الخـلاّن=وخلّـى هـل الدرعـيّـة تبـكّـي عتـرهـا
وقدّامنـا اللـي ترتجـف منـهـم الأبــدان=ومـن قابـل الحكّـام صـعـبٍ ينـاورهـا
وفزعنا مع جديـع بـن هـذّال بـن حبـلان=ونــاسٍ نجسّـرهـا ونــاسٍ نسجّـرهـا
وإذا حامت صقور السّمـا تقصـر الغربـان=كمـنّ الصقـور لهـا صقـورٍ تصاقـرهـا
وجا دويحس بـن عريعـر مـروّع الأذهـان=وبوقعة سويقـة خـاف خصمـه وغادرهـا
بعد غـادر الميـدان خصمـه وهـو مشتـان=وهـوّن عـن دروبٍ مـن أوّل تجاسـرهـا
وسبب وقعة غريميـل لأهـل العقـول يبـان=مـا فـلّ الحديـدة غيـر شـيٍّ يناضـرهـا
وهي خطّـةٍ يقصـد بهـا طيحـة العمـدان=ألا ما أخبث علـوم الخديعـة ومـا أقذرهـا
وجا أخوه زيـد اللـي كريـمٍ كمـا الهتّـان=والأوضـاع مشحـونـة بـشـيٍّ ينغبـرهـا
وبـرّاك بعـده لاضـرب يضـرب النيشـان=والأفعـال يظهرهـا ولاهـوب يضمـرهـا
ولاهوب من قوم الـردى والقشـر خجـلان=يعسف الروافض عسـف ماشـاف خطّرهـا
وعزالله أن حكمـه بهـذي الصّفـة مـزدان=وخـل الروافـض تستغـيـث بجعافـرهـا
وعلى أرض اللصافة ناطح بجيشـه السبعـان=و فالشّيـط أهـل نجـد العذيّـة وفاطـرهـا
وجا ماجد بـن عريعـر الفـارس وسرعـان=ماثـوّر علـى العـدوان حربـه ودهورهـا
وماجد مدحـه القـرم شيـخ عنـزة مشعـان=بقيفان من جـزل البحـور ومـن أغزرهـا
وماجد مدحـه الشاعرجريـس بـن جلبـان=بعـد مـا قيـوده مـا لقـت مـن يفزّرهـا
ونهارالسبيّـة مثـل مـا أنّـا نعيـن نـعـان=وعدواننـا فـي نصرهـا الشـكّ سـاورهـا
وجتنا القبايـل سبـع كنْهـا جيـوش ألمـان=طوابير تملا الشـوف تحـت أمـر هتلرهـا
وصار اجتـوال الخيـل هـو سيّـد الميـدان=ولا عـاد يوحـى إلا مهـابـد حوافـرهـا
والأرواح والأرمـاح كنْهـا دلـي وأشطـان=وهــذا يـورّدهـا والآخــر يصـدّرهـا
وقلنا:ارحبي يالحـرب كلّـش ولا الإذعـان=ومـوت المعـزّة خـيـر لـلّـي يقـدّرهـا
كذا العـزّة العليـا غريبـة علـى الرّديـان=وحنّـا أهْلهـا يـوم ان عدانـا تقاصـرهـا
وعجاج الرّمـك طيّـر كمـا ديمـة و ودّان=وفي ساعـةٍ عـوّد حمرهـا كمـا أسمرهـا
عليهـم تجمّعنـا وكـلْ زيـنٍ لهـم شــان=وأحطناهـم سـوات المعاصـم وأسـاورهـا
ودنياك يا ابن آدم لهـا أشكـال ولْهـا ألـوان=ومـن عايـن أزينهـا فـلا يامـن أودرهـا
ومنّـا الرّكـب لامـنّ ناطحتـه الركـبـان=ثبـت وأعتلاهـا بـإذن ربّــي وبعثـرهـا
سوات العوارض يوم جا خصمهـم فرهـان=ثلاثـة رجـالٍ قدْمـهـا الـلـي يدثّـرهـا
وصـدّت عداهـا بضـربٍ يواسـي النّقيـان=ياليـن ذلفـت عنهـا العـدا وقطْـع دابرهـا
ومثل ماحصل في مريخ مع سربة العجمـان=ولا بـه عصـى إلا يخـلـق الله شاقـرهـا
وجمعٍ مـن المـرة تحـت شيخـة جهيمـان=ذبـح شيخـه ولاهـوب تالـي خسايـرهـا
ومقاماتنـا معروفـةٍ مـا جهلـهـا إنـسـان=رجـالٍ تلحّـق شوفهـا تـطـرح غتـرهـا
ومواقيف ربعـي راسيـاتٍ مـدى الأزمـان=فياجاهـل اعرفـهـا ويانـاسـي اذكـرهـا
ليا النّصف راح أربـاع والرّبـع راح أثمـان=حـرار الخـوالـد ماتـزحـزح نـوادرهـا
شديدين لو ناطـى علـى الأمعـز الصـوّان=شظايـاه تقـدح يــوم تشـبـح تطايـرهـا
ويسيـر الجمـل ماهمّتـه كثـرة الـقـردان=فعـولٍ عرفهـا مـن يـجـاور مجـاورهـا
ذكرت الملوك فكيف عـاد أذكـر الفرسـان=يبـا يتعـب اللـي راد بالشّـعـر يذكـرهـا
كمـا مدفّـن الحييـن وإلا البطـل شـامـان=أو القـرم ذبّــاح العـرافـه ومذعـرهـا
أو اللي يقطّ الرّوس في ريـع أبـا الجرفـان=وهوجـراش ابـن شعـلان فالوشـم بتّرهـا
وذي نقطـةٍ مـن بحـر للـي لهـا ظميـان=ولا أنا بعجـز أسـرد فالأقـوال وأمسرهـا
ومن أوّل وإلى ذا الحين فينـا مـن الأعيـان=رجـالٍ تعـلّـت ورفعتـهـا محاضـرهـا
وإذا عـوّدت للشّعـر حنّـا هــل الأوزان=لنا به قسـم مـن خيـر الأقسـام وأوفرهـا
كما برغـش وجبـر بـن سيّـار وحميـدان=فحولٍ تجيـب مـن أيسرالقـاف وأعسرهـا
وزيـد الخشيـم وشاعرالكسـب و الرّبحـان=مهنّـا أبْوعنقاالـلـي لـلأتـراك كـدّرهـا
وذي نبـذةٍ عـن سالـف العـصـر والأوان=ولا أطنبـت لأنّ النـاس تعـرف معاصرهـا
وإذا عـوّدت للحـرب حنّـا هـل الأكـوان=ويا قلّ هيّة في ضحـى الحـرب نخسرهـا
وإذا عوّدت للعـزّ تـرا مـا خالـديٍّ هـان=وإذا جـت بـوادر شـرّ جيـنـا نبـادرهـا
وإذا عـوّدت للديـن حنّـا هــل الـقـرآن=وخـيـر المسـاجـد عارفتـنـا منابـرهـا
إمـام الحـرم منّـا وهـو العالـم اليقظـان=ولا يُجْهَـل ابـن حُميـد منْـور دياجـرهـا
وحمـود بـن عقـلا للسفينـة كمـا الربّـان=سفينـة فتـاوى الديـن فـي غبّـة أبحرهـا
ولا أنسى العمر ناصر ولا مفتـي الشيشـان=يجاهـد جهـاد الحـقّ والنـفـس ينـذرهـا
أبوعْمَرسليل السيـف راسـي كمـا ثهـلان=تشـاوره ربـعـه فالجـهـاد ويشـاورهـا
ولا أنسى فَخَرْنـا العالـم المعتبـر سلمـان=ابـن عودةاللـي جـرّة الـحـقّ يبصـرهـا
مشايخ علـى روس الخوالـد كمـا التيجـان=وبـه غيرهـا وأطلـب مـن الله يكثّـرهـا
وأنـا مدْمـنٍ حـبّ القبيلـة وأزيـد إدمـان=والإدمـان ذا يحيـي العـرب مـا يخدّرهـا
وأبفخـر بربعـي صبـحٍ وليـل ومسـيّـان=ماهـي عنصريّـة يـوم أعـدد عناصـرهـا
لها أربع طعش ركـنٍ ولا تفـرق الأركـان=وتـرا الـدّار ماتثـبـت بلـيّـا عوايـرهـا
من أركانها آل حُميـد وأكـرم بهـم شيخـان=هـم شيوخناوأرفـع بهاالصـوت وأجهرهـا
وركن الجبورإن صار سيـف وقنـا وعنـان=عداهـا تجيهـا كسـرةٍ مـا أحْـد يجبرهـا
وركـن الجنـاح للابتـي كنّـه الجنـحـان=ولا حـام حـرٍّ دون جنـحـان يشهـرهـا
ومن أركانها دعـومٍ دعايـم ظفرهـا متـان=دعـومٍ جميـع القـوم بالحـيـل تحـذرهـا
وركن السّحـوب ونعـم ياسربـة السحبـان=سحـوبٍ تذيّـر مـا بـه أحْــدٍ يذيّـرهـا
ومن أركانها قـومٍ بقاصـي الزّمـن والـدّان=شبلـةٍ نهـار الكـون مـاعـاش زاجـرهـا
ومـن أركانهـا اللـي للقبيلـة كمـا النيبـان=صبيحات خاب اللي ضحى الكـون شاجرهـا
وركـن العمايـر فعلهـم مايبـي بـرهـان=مـا خابـت قبيلـة والعمـايـر عمايـرهـا
وركن العمور اللـي ماتحتـاج لأي أعـوان=تضـد الضديـد وماتبـي مـن يناصـرهـا
ومن أركانهـا قـومٍ لهـم صولـة وسفطـان=قرشـةٍ ياويـل اللـي تنـوشـه بواتـرهـا
ومن أركانها ركـن المطـر واثـق البنيـان=وبالمـوت الأحمـر جملـة عـداه يمطرهـا
وركـن آل مقـدام الصناديـد لامـن حـان=وغى هم ترا فـرز الوغـى هـم كواسرهـا
ومـن أركانهـا قـومٍ لكفّتهـم الرجـحـان=مهاشير تكسرخصمهـا لـو طغـى وأرهـا
ومن أركانها قـومٍ نهـار الوغـى شجعـان=بنـي نهـد لاجـا الهـوش تدفـر مدافرهـا
وبني خالـد لْهـا عـزّ مـا جابـه الخـذلان=خَذَتْـه بخناجرهـا مـاهـوب بحناجـرهـا
ولامـن تصاغـر لابتـي واحـدٍ خـبـلان=فنجـوم السمـا للّـي مايـدري يتصاغرهـا
قبيلـة مهيلـة راسيـة كنّـهـا الضلـعـان=وإذا باحرت ما أحـدٍ مـن القـوم باحرهـا
هم أهل السموت وهم كبارالبخـوت وصـان=سيرهـا مــع الأيــام عــزٍّ يعمّـرهـا
ولو قمت أفاخـر مـا كفتنـي 100 ديـوان=لَكَـنَّ أختصـرت الـقـاف والله ميسّـرهـا
أبرضي بها الراضي وأبزعل بهـا الزّعـلان=وأبقهـر بهـا اللـي غـرّ نفسـه تكبّـرهـا
وترا النّخلة العوجا ولو هـي مـن البستـان=رطبهـا يـروّح مـا انتفـع منـه بـاذرهـا
وترا الكامـل الله والبشـر طبعهـا النقصـان=ويامال الشحـم زلّـة ولـد عمّـك استرهـا
ولاهمّنـي لــو زوّد الـغـلّ فالحـسـدان=عساهـا تعـذّب مـع هواجـس ضمايرهـا
ولابـط كبـدي غيـر فـرّاقـة الإخــوان=ياليـت الهـروج العـوج عـنّـا توفّـرهـا
تعـاف الرّطـب وتدنّـق تفتّـش الحيضـان=وتفـرح وتمـلا مـن حشفهـا محافـرهـا
وتولّـف هـل التوليـف وتطمّـر الجرفـان=كُتب زين مظهرهـا لَكَـنْ شيـن جوهرهـا
ومـن هــبّ وإلادبّ يكـتـب وبالمـجّـان=تجـيـه الكـواغـد والـمـاتٍ محابـرهـا
وشتّـان بيـن أصابعـك فـي يـدك شتّـان=ولاهو بطايل لـو بغـى الطّـول خنصرهـا
ولايجحـد الأفعـال غيـر الـرّدي الغلطـان=وقبايـل جزيرتـنـا مانجـهـل عشايـرهـا
من السِّيف إلى السِّيف ومن طريف إلى جيزان=ومـن ربعهـا الخالـي ليـا حـدّ عرعرهـا
وكـلٍّ لـه فعولـه ولا للـعـرب حـقـران=علـى الطيـب تخشرنـا عليـه ونخاشرهـا
وليس الفتـى مـن قـال كانـوا لنـا جـدّان=إذا كــان مايتـبـع خطـاهـا بحذافـرهـا
وزمان الجهـل ولّـى وقفّـى بـلا رجعـان=وصـار الوطـن شَجْـرة طريّـاتٍ أثمرهـا
وصرنا وقبايل نجد غصـنٍِ مـن الأغصـان=وعلاقاتنـا بالـدولـة مـتـان أواصـرهـا
وكنّا أفقر أهـل الأرض دنيـا لكـنْ سبحـان=إلـهٍ بنفـط الأرض عـوّد بـنـا أتجـرهـا
وعسى الله يطوّل عمركم يـا بنـي مرخـان=علـى خدمـة الأمـة ورفـعـة تطـوّرهـا
وألا وش تسـاوون ونسـاوي بـدون إيمـان=وكـم دولـةٍ يحفـر لهـا القبـر قيصرهـا
وعسى مـن يكيـد لديننـا ينحشـر عميـان=وكـم حفـرةٍ ماطبّـهـا غـيـر حافـرهـا
وعسـى الله يجنّـب عـن بطانتكـم الخـوّان=ويقـرب لهـا نـاسٍ سليـمـة بصايـرهـا
وعفنـاك يادنيـا الفنـا اللـي بـلا ثبـتـان=تقلّـب كمـا الأقـداح فـي كـفّ ياسرهـا
وتـرا العبـد ماتنفعـه كَنْـزَتْـه للذهـبـان=وحتى إيش لـو كبـرى القناطيـر قنطرهـا
وخذ لك عظـة ياللـي بدنيـاك ذي نشـوان=تَعَـيَّـن عمايـرهـا وعـايـن مقـابـرهـا
وتـرا العـزّ فالتقـوى وفالعلـم والإحسـان=ولافـرق مابيـن أسمـر الخلـق وأشقرهـا
وعلى ويش يا اللي مـن ورا دنيتـك لهفـان=شـوي وعظامـك دابـي الـدود ينخـرهـا
وترا العبد لامن طرح فـي داخـل الأكفـان=فلاتنفـعـه نفـسـه وزَمْــرة تفاخـرهـا
ودام ابـن آدم مسلـمٍ مـخـزي الشيـطـان=ونفسـه ليـا رادت خطـى الشـر يدحرهـا
فهـذا الـذي موعـود جنّـات ذات أفـنـان=وربّـك ليـا واعــد مخاليـقـه أقـررهـا
وعساني بهـذا القـاف فتّحـت لـي بيبـان=لشعّـار ربعـي لأجـل تُظْهـر مشاعـرهـا
أقولـه وأنـا مانـاب فـي موقفـي بحـلان=وماكـلّ شاعـر لابغـى القـاف يصخرهـا
وبإمكـان ابـن غشّـام زودٍ علـى مـاكـان=َكَـنْ بعـض الأشيـا بالخـدارة مخـدّرهـا
وتـرا الفضـل كلّـه لله الخـالـق الـديّـان=بدعـت البيـوت اللـي ينومـس تواتـرهـا
وتالـي كلامـي عـدّ مـا سالـت الوديـان=وعدد مـن لفـى مكّـة وطـاف بمشاعرهـا
صلاتي علـى المختـار ذروة بنـي عدنـان=على المصطفى خيـر المخاليـق وأطهرهـا
وسلامتكم
|
05-10-2006, 01:55 PM
العرض العادي
