جميع قصائد الشاعر مبارك بن عبدالله آل خليفة

[الخالدية]

قصيدة يا ناقش الحنا

يا ناقش الحنّا على كفـك الزيـن
كفك عذاب قلوب من غيـر حنّـا
اخلفت عقّال العـرب والمجانيـن
خلـق الله تباريـك منّـا ومنّـا
وعادك تمشّى في المحلات ببزين
وتغريف وبرموش عينـك تجنّـا
بنظرتك ترسلهم يسـار ويميـن
احد ٍ تبنّـج معـك واحـد ٍ معنّـا
يدبك وحظّه خابره دايمـا ً شيـن
ما قد خبرته فـي المدابـك تهنّـا
يشكي على الادنين منّك والاقصين
وشكا علينـا منـك حتـى فتنّـا
وجينا نتفرج مثل باقـي المعنّيـن
اللي شكـا واللـي لعينـاك غنّـا
حتى اجتمعنا فوق سته وعشرين
وكل ٍ يجهّز جيش غـزوة مهنّـا
وجنّا البني المترفـات المزاييـن
ولا التفتنا صوبهـن يـوم جنّـا
الناس مثلك فيهم رجيل وايديـن
بس انت غير ومنوة اللـي تمنّـا
كفك لحاله يجعل القاسـي يليـن
تومي على البزران ونطيح حنّا !!
شي ٍ جرى صاحين والا خباليـن
لكن عسى الله يرفع الذنـب عنّـا

****

قصيدة كم حاجة ٍ ضاعت وانا اطرد وراها !!


دام الخبر ما هـو موكّـد وموثـوق
خل العرب تطحـن وتـدرج رحاهـا
مانت بوكيل الناس سارق ومسروق
اللـي فقدهـا خابـر اللـي خذاهـا
يعلمـك بالطـاق والطـاق مطبـوق
وكم لقمة ٍ مـن قبـل هـذي كلاهـا
لكن ترى مالك على العالـم حقـوق
لا عـاد تزعجهـا وتبحـث خفاهـا
واخبارك اللي تبهج القلب وتشـوق
قلهـا ترانـي محتـري ٍ مبتـداهـا
اخذت لي شهرين وانا ارجي وفـوق
والسالفـه مـا وصّلـت منتهـاهـا
راحت حياتك كلها شوق في شـوق
كلمه ,, لكنك مـا عرفـت معناهـا
لو ان قلبك من عنا الشوق محـروق
يمدي عيونك وقّـف الشـوق ماهـا
لكنك تخوّع مـن السـوق للسـوق
تطرد ورى الشلّه .. معااها معااهـا
ناس ٍ ماغير وجيه وعيون وحلـوق
الله يعافيهـا مـن الـلـي بـلاهـا
وما هو صحيح ان كل مطرود ملحوق
كم حاجة ٍ ضاعت وأنا اطرد وراهـا

****

قصيدة حقيقة الامر

علـى الله اتكالـي واعتمـادي وانا مانيـب افكـر بالـدوادي
ولا من بينـي وبينـك عـدواه ولا به معرفه يا احمد نجـادي
اعرفك ريّـس ايـران المفـدى وانا مواطن وعايش في بـلادي
خليجي والخليجـي مـا تعـدد ولانا متحّـد حضـر وبـوادي
قطر داري وفي البحرين ربعـي ولا فيها غرابه شـي عـادي !!
مع الايام تلقـى نـاس غيـري يلعّبها الزمن مـع كـل نـادي
لكني محتـرف مانيـب هـاوي حسب رايي وظنـي واعتقـادي
ما دام ان حكم جدّي لابن عمّي فقطع الهرج اخير من التمـادي
انا مسلم واحيـي كـل مسلـم لو ان جنسيته واصله تشـادي
ما دامه مسلـم ويتبـع محمـد فالابيض مثل الاسود والرمادي
لكن اللي يسـوي مـا يسـوّي من الالحاد والشـرك العقـادي
رفض بعد النبي نهج الصحابـه واذاع الشتم في كـل الـروادي
وحرم بعـض ممـا حلـل الله وأحل الكـذب وأحـل الرقـادي
عليه مـن الله اللـي يستحقـه ما دام انـه بغيـر الله ينـادي
وحقيقة الامر انا مانيب صوبك انا افنّـد الالاف مـن الاحـادي
قذونا النـاس حتـى وزعونـا وضاع العقل والراي السـدادي
وصار اسلامنا سبعـون شعبـه وجات الحرب بالقتـل الابـادي
لفوا عدواننا مـن كـل بقعـه وساد الظلم والتعذيـب سـادي
بلاد المسلمين اضحت خرايـب تولاها الزمن صبـح وهجـادي
نشوف المسجد الاقصى تهـوّد وحماس وفتح في حرب وعنادي
ولبنـان الجميلـه شوهـوهـا وصارت ملعب لكـل النـوادي
ومصر وسوريا واحسب وعـدد بلاد المغـرب وعـاد العتـادي
يجهّز للعرب خطـوه بخطـوه بعد بغـداد تـو ّ الليـل بـادي
وخلق الله من شيعي لصوفـي لضايع دين ما يهديـه هـادي
كذا حال العـرب داخـل وبـرّا وضاعوا كلهم فـدوى وفـادي
وجانـا فالخليـج آفـة زمنّـا توزعنا بـلا عـرف و مبـادي
وجا غير السلـف تبليـغ والا من الاخوان والبعـد ازديـادي
تخالفنـا وضيعـنـا بعضـنـا وباقي الشعب ليبرالي وغـادي
يشوف الغرب ويسوي سواتـه يهز الراس ويصفـق الايـادي
لا شاف الاحمر الاشقر تجهّـز وقـال اقاسمـك ملحـي وزادي
ليا غنّا بصوتـه جـر صوتـه خلافـه فالمقـام وفالقـعـادي
وليا منه دخل ٍ له جحر ضـب ٍ دخل ف أية جحر ف أياة وادي
وصرنا عايشيـن بـلا هويـه مع انّا كثرنـا كثـر الجـرادي
كـذا التقليـد فكـك مجتمعنـا وساوينـا الرفاقـه بالاعـادي
وزاد السحـر والادمـان فينـا وزاد الكـذب والتهريـب زادي
وجا الارهاب والتكفيـر حتـى ما ندري من نصاحب من نعادي
ليا منـه بلـغ بـزر ٍ فطامـه تجـرّا بالفتـاوي والجـهـادي
وجاك يكفّـر ويذبـح ويصلـخ ولا يعرف بيـاض ولا سـوادي
وحكومات العـرب يالله ترحـم تقبّض كـل منهـم فالشـدادي
وش نوصف وش نخلي ولكـن عسـى الله يهداهـم للرشـادي
ننادي للعرب فـي كـل ديـره ولكن لا حياة لمـن تنـادي !!
وصلى الله على محمـد وسلـم وعز الدين مـن رب العبـادي

[الخالدية]

قصيدة هدايا


لا عاد تنشد ويـش وسـط الحنايـا
صدرالشقـاوي بالتشـوّق مشـقّـا
شوّقت قلبـي مـن جميـع النحايـا
اذنيـن وبطينيـن والـلـي تبـقّـا
حتى الريايا مـا بقـى بـي ريايـا
حطيتها لك فـرش وامـش وتوقّـا
اخاف من شوقي تحوشـك شظايـا
ماهوب شوق وبس ,, شوقي ترقّـا
ورّدتني لا اخطـر حيـاض المنايـا
واثرك على الميراد للمـوت سقّـا !!
الله حسيبـك يـا خبيـث النـوايـا
تضحـك لـي ونيّـات قلبـك تتقّـا
ترسل لـي سهـوم المنايـا هدايـا
وعادك من اهدائـات روحـي تلقّـا
و-ما زلت- تسأل ويش وسط الحنايا
لكن -ما زلت- اقول ,, طب وتنقّا !!

****

قصيدة الصوره الفنيّه

يا مشجعيـن الصـوره الفنيّـه ياما جـرى للـوزن والقافيّـه
الجزل سمـي عندكـم تقليـدي وتقريـري وقصيدتـه عاديـه
سهل القصيد الزين ما يقنعكـم اما المعقّـد حالـه ابداعيـه !!
حالة مرض يلعن ابوهـا حالـه مابـه دوا للعقـده النفسـيـه
اجل يجوز ان الكذاب يصـدق؟؟ وتكذبون الصـدق والعفويـه؟؟
خربتوا افكار الجميـع وخربـت اراء كـل الساحـه الشعبـيـه
كل ٍ رسم له في خياله صـوره واهتم في المنظر وفي الخلفيـه
يلطـخ الالـوان وردي وازرق ولا شفتها واليا انهـا بنيّـه !!
الغيم فيها والجبـل والشاطـي والفـرد والرشـاش والجنبيـه
آيه تعب جدا وجـاب جهـوده واضفا عليها الخلطه السحريـه
ولا جيت بتحلل بعـض مافيهـا أوعدك ما تلقـى بهـا ماريّـه
لو تسأله هذي وشنهي؟ جـاوب هذي سبب للصـوره الرمزيـه
طيب وهذي ؟ قال هذي مـدري لكنهـا تصلـح مـع هاذيـه !!
يشوف خبلان البشر وش سووا وكلٍ على ماقيـل مثـل أخيّـه
اوحى الموسيقى عاليه واطربته حامض حلو لومي وهاي وهيّـه
وشاف العرب غنوا وقام وغنّـا ويجيبهـا شامـيـة ٍ عامـيـه
خبلان خلق الله قذوا خلـق الله والناس لا رحمـه ولا ماويّـه
مع الجديد ان بان قالـوا مثلـه على عماها صوب كـل نحيّـه
معه معه حتى لو انـه ضايـع وتعممـت نظـراتـه الذاتـيـه
ضيعه عقل ضيعة عمر الا اكبر ضيعة وجود وطمس للشخصيه
ما يعرف المتبوع هو والتابـع وتساوت الحسنه بجنب السيّـه
ما اخص موضوع الشعر بلحاله الا بكـل الكـوره الارضـيّـه
الا الجميـل نشجعـه ونحـبـه اللي على الصدق وصفاة النيـه
في الدين والدنيا يا طيب الطيّب واهل الوفا واجد ما هم بشويـه
والشعر زينه زين والا الامحـق ماهوب كفو الوقفـه المسميـه
سوالفـه مسفوطـه ومتروكـه ماهيب مسموعـه ولا مرئيـه
واهل الجزاله شانهـم ماينـزل لو كثرت المجموعه الشمسيـه
الجزل يبقـى جـزل ويمتعنـا وياحي راعي الطيبه يـا حيـه
وانا على رايي كتبـت بيوتـي وقناعتي مـا خذتهـا عاريـه
لا اصحابنا مثل العسل والا احلى وسم ٍ على أهل الصوره الفنيـه

****

قصيدة يفداك القصيد


يقول وش سويت فيّ من القصيد؟؟
واقـول يفـداك القصيـد وقايلـه
ابشر على خشمي وهاك آخر جديد
ياللـي مورينـي نجـوم القايلـه
غلاه يثعى في وريد وفـي وريـد
وحبـه بقلبـي عامـلٍ عمايـلـه
احيان احس اني من احساسي بليد
واحيان احس ان المشاعر هايلـه
واحيان احس انه عن عروقي بعيد
واحيان احس انه من ادنى العايله
يعني مخبّل بي وانا عقلي رشيـد
والله ولا بعض الظـروف المايلـه
يحطني في سيـد والدنيـا بسيـد
وخزّن حياتـي كلهـا فـي فايلـه
وان شافني منهك من الوقت الشديد
ميّـل وناولنـي طـرف جدايلـه
ويقول لي ذا الليل عندك ليل عيـد
تبغي تشوف الحب لك؟؟ ها خايله
شفه هنيّا بين ضلع وبيـن جيـد
في قطعـةٍ بيـن الحنايـا مايلـه

[الخالدية]

قصيدة هات ما عندك

كل ما مديت وصلـي تجازينـي صـدود واتعذر عنك واقول مـدري وش جـرى ؟
ما طرى لي غير حبك وانا ماني جحـود وانت مدري وش طرى لك لكنّ اللي طرى:
بيت حبٍ مـس حبلـه وشيّـده العمـود ولك خفوقي فرش والصدر وضلوعه ذرى
مستلم صـك المشاعـر وثبّـت القيـود وانقطع قلبي وصدري من الشـوق انفـرا
دايمٍ تخطي واسامحـك مـن قلـب ودود وادمح الغلطه ليا جات كـن محـد ٍ درى
اتغاضـى عنـك لكـن تعديـت الحـدود ويش اسوي معك والصد والهجـر جهـرا
كل ما ظنيت بي ظن يرقـى بـك سنـود وانت ظنـي فيـك قـدام وتعـوّد ورى؟؟
لا متى وانـا اترجّـا الوعايـد والعهـود لا تشالا الجرح الاول تبيعـه مـا بـرى
وانت توعدني وتقفي وتخلـف بالوعـود والمولع بانتظـارك سـرى ليلـه سـرى
دام في سوق العشاشيق ما تقـدر تجـود سوق حبي معك ما فيـه بيـع ومشتـرى
هات ما عندك من الصد وانا اللـي بـزود لين تدري ويش معنـاة مـردود البـرا !!

***

قصيدة ان جيتني صفقت وارن رحت صفقت


لا تقول لي مشتاق ماهو بمعقول؟؟
يعني بعد فرقاي حنيت واشتقت!!
هذاك لو انك تبيني على طول
يمكن تلاحق شي كانك تلاحقت
اللي بقا لي فصل من خمسة فصول
اعيش به ذكراك من وقت لوقت
مقدر على وصلك من الحول للحول
دامك مع سكة غيابك تعلقت
وماعاد عندي قلب يصبر ولا حول
صبّرت نفسي صبر من فوق ماطقت
وعرفت معنى الهم بالفعل والقول
وشبعت من طعمه كثر ماتذوقت
وشربت حزن وصرت بالحزن مثمول
وللحين في سكرة حزن ما بعد فقت
لا تحسب ان الجرح في لحظه يزول
ولا تحسب اني لازرق الدمع صدقت
هذااااك الاول عادني فيك مذهول
ياما على شانك زعلت وتضايقت
واكتب قصيدي بك يا غالي يا مجمول
وان جيتني صفقت .. وان رحت صفقت!!
وذلحين عن الاشواق والحب مشغول
من بعد ما شفت الخبايا وبرقت
حتى دريت ان الزمن كله يقول
لا تامن الدنيا لو انك تفوقت
وانا ترى ماني عن البعد مسؤول
حلمتني حلم الفراق وتحققت
وارسلت لي مرسول وارسلت مرسول
علقت ما علقت ما كنك علقت
ان جيتني (( منقول)) وان رحت ((مقبول))
اما الهوى شبعت منه ,, وغلّقت




*****


قصيدة الدمعه


انا فدا عينك و نظرتك والدمعه
اللي على ناعم الديباج تنثرها
الدمعه اللي ورى رمشك لها لمعه
ان كانها من غيابي لا تكررها
يا غاية الشف والمقصود والطمعه
لا يلحقك شك .. والزلات مررها
اليوم ولع على شان اللقاء شمعه
وسمعني الكلمة اللي كنت ذاخرها
ابعدت عنك من الجمعه الى الجمعه
مشغول واشغالي الواجب تقدرها !!
غديت انا وانت (( مثل اللغز والرمعه ))
احدٍ يخبي علومه واحد ينشرها
والعالم اللي على الاخبار مجتمعه
لا عاد تسمع لها ولا تعاشرها
وكلام عذالنا لا عاد تستمعه
شفني لا جابوا علوم ٍ قلت خابرها !!
اهم مابه بياض الوجه والسمعه
والا العرب لامتى وانا بسايرها ؟؟

***


قصيدة جو الخيال


عيشتني في جو من جو الخيال
واعطيتني فرصة فرح ,, ومحاوله


في طرد همٍ عشته ايام وليال
الا مسوي لي شغل ومقاوله


عيّفني الفرقا وعيّفني الوصال
واصبحت مدمن من كثر تناوله


و وقت اللقا قبل العشا بعد الزوال
خلاني انسى بورصة تداوله


في الموقع الاول مواجه واتصال
وفي الموقع الثاني لعب ومناوله


طربه وفرحه وانبساطه واحتفال
وجلسه ومن بيني وبينك طاوله



وان جيت اوصّف ما حصل فابسط مثال
فراوله تشرب لها فراوله

[الخالدية]

قصيدة ثلاث


ثلاث كلمات مابي منك اسمعها
بحروفها اللي على الاعذار مستنه

لا اغلطت لك غلطه وودك ترقعها
تقول مدري واحسبنه ويمكنه

مدري واحسبه ويمكن عني اقلعها
مخي خلاياه من ذا اللفظ منجنه

دور لغيري وسولف له ووزعها
دوّر لمنهو يحنّك كذب وتحنه

ياللي توزع علومك قبل تجمعها
لاصن صاحبك فالعب وايته بصنه

واترك طبوعٍ بلا داعي تطبعها
وارجع على اصلك بلا شكر وبلا منه

لا تخلف الهقوه اللي فيك مطمعها
ماعاد ينفع معك لكن ولكنه

شف موقعك والعرب وشلون موقعها
والناس نظراتها سكين منسنه

ما فيه كلمه تنزلها وترفعها
لا تخلط الصوت بين البح والخنه

والمعركه لاجهلك اللي مولعها
شف برقها لاح والرعاد له دنه

ان كان عندك علومٍ خافيه ذعها
ما فيه تكتيم دام الحرب منشنه

وان غشتك صنعةٍ كلٍ تصنعها
ماتوك الا عذاب القلب والونه

وان غرتك لقمةٍ في البطن تبلعها
بذكرك في كلام الشرع والسنه

الركعه اللي على الانظار تركعها
هي تدخل النار والا تدخل الجنه؟؟!!

خل الدعاوي لشاريها وبايعها
كلٍ على مهنته ويكيفه فنه

ابعد عن اللي ضعيفاتٍ روابعها
دام المقهوي يبهر هيله وبنه

والفزعه اللي نويت العام تفزعها
لا تحسب انها بوسط الصدر منكنه

انا عزومي تشجعني واشجعها
واشجع اللي يجي ظني على ظنه

وانت انتبه من علومٍ ماتوقعها
ولسانك افطن لهرجٍ ينطلق منه

ثلاث كلمات مابي منه اسمعها
كلمات مدري واحسبنه ويمكنه



*****

قصيدة راجع حساباتك


يا طول صبري عليك وكثر غلطاتك
ويا قو قلبك على هجراني وصدي

ياليت قلبي يعرف يسوي سواتك
وياليت عيني تطيع لقولتي لدي

مع ان عيني نظرها شوف نظراتك
لكنْ قد لي سنه ما ني بمتقدي

ومع ان نبضات قلبي لاجل نبضاتك
خليت قلبي يجيب اشواق ويودي

ومع انك تعرف وش يعني لي سكاتك
سكت ,, كنّك معاند لي ومتحدي

حتى على اذني بخلت بحس همساتك
ما تسمع الا صدى دمعي على خدي

بخلت بمواجهك وبهمس كلماتك
وخليتني للهموم وبيّحت سدي

خلتني اشك في حبك وفي ذاتك
وخلتني ارجع ورى من كنت متعدي

لكنها وضحت لي ويش نياتك
وخلتني اعرف غلاي بقلبك و ودي

لو كنت غالي ؟ ما صرت آخر عباراتك
اللي تسولف بها من باب .. شف ردي

ولو كان لي ود ؟ ما قصرت خطواتك
واصبحت تمشي ثلاث امتار وتهدي

وقفّيت وانا ارقبك وارجي تلفاتك
واخفيت زولك وانا خدي على يدي

ومن كثر ماني بسامح كل هفواتك
اقول: أزمه تمر شوي وتعدي

لكنك تحدني وتزيد سياتك
وحديتني لين ما وصلتني حدي

والله ما كان لي نيّة مجازاتك
لكن تعال ونبيّن مدك ومدي

راجع حساباتي وراجع حساباتك
واهدى وركز وميّز مزحي و جدي

انا موفّي غلاك وكسب مرضاتك
والا انت مخطي .. ومتردي .. ومتردي

كنك تباهي بظلمك واعتدائاتك
وكنك تقول اذبحه واحييه .. من قدي؟

وكنك تجاهلني لتحقيق رغباتك
مع انك تعرف ابوي وخالي وجدي

وانا بعد كل ما جا من حكاياتك
ماعاد عندي مجال اعيد لك عدي

هذي ملفاتي وهذي ملفاتك
وبروح ما قلت ميد اوراقي اسوّدي

صحيح احبك .. وعمري رهن لحظاتك
لكن تماديت في بنياني وهدي

انا انتهى وقتي وذي كلمه وجاتك
والا انت لا صرت تبغي وقتك يمدي؟؟

تعااااااال .. يمديك تمحي كل زلاتك
صحيح قفّيت لكن ما هو بودي

بوقف شوي ,, والحق كل ما فاتك
والا تراني نويت اروح من جدي
*****
قصيدة محمد نبي


يـا صـاحـبـي فـي الـنـاس مـعـطـى ومـحـروم
مـن عــاد خـلــق الله فــي غــزو وسـبــي

والـيـوم نـفـس الـحــال والـحـكـمــه تــدوم
مـن خـالـق الـدنـيـا عـلـى مـا هــو يـبــي

الـشـيـخ يـبـقـى شـيـخ .. حـاكـم ومـحـكـوم
والا الـصـبـي طـول الـزمـن يـبـقـى صـبــي

ولا صــرت مــن نــاس يـســدون الــلــزوم
لا تـنـخـضـع لاهـل الـمـشـالــح والـعـبــي

ارفــع مـقـامــك لا تـشــبّــه بـالــرخــوم
الـطـيّـب اتـعــب مـعــه والــلاش يـهـبــي

ولا تـحـسـب انــي مــن رديـيــن الـعــزوم
الـلـي عـلـى درب الـوفــا تـحـبــي حـبــي

الـكـسـب مـن يـمـنـاي والـعــز مـحـســوم
والـحـمــد لـلــه ورث مــن جــدّي وابـــي

ولا شـكـيـت مــن الـزمــان ابــا الـهـمــوم
ولا ذرف دمــعـــي ولا بـــــل هـــدبـــي

ولانــي بـاطــوّف كــل لـيــل وكــل يـــوم
ايـات كـلـمــه طـايـشــه مــن صـاحـبــي

الاولــه مــن صـاحـبــي عـنـهــا بـشــوم
ومـاهـو عـلـى شـانـه عـلـى شـان شـنـبــي

بــه شــاربٍ لازل ,, غــالــي ومـحــشــوم
وبــه شــاربٍ مـاهــو بـكـفــوٍ لـتـعـبــي

والـثـانـيــه والـثـالـثــه لاجــل الـسـلــوم
وان طـوّلــت بـشــب نـــاري بـحـطــبــي

يـعـنـي الـعـلـوم الـلـي تـقـفـاهـا عـلـوم؟؟!!
تـعـمـي عـيـونـي خـص لا ثــار غـضـبــي

ومـا عـاد امـيّـز فـي الـدفـاع وفـي الـهـجــوم
لا جـات كــورة لـعـبـهــم فــي مـلـعـبــي

اشـوتــهــا قـــدام والـقــايــم يــقـــوم
الـيـا وصـلـت الـظـامـيـه قـلــت اشـربــي

والا انـت مـدري وش تـبـيــع و وش تـســوم؟
مـن يـوم خـلـيـت الـذكــي مـثــل الـغـبــي

راحـت عـلـيــك ام الـمـخـابــي والـكـمــوم
والـيـعـربــي يـعــرف كــلام الـيـعــربــي

والـيـا بـغـيـت تـعـرف تـفـسـيـر الـحـلـوم
مـسـيـلـمــه كــذاب ... ومـحـمــد نـبــي

[الخالدية]

قصيدة اخلاقك واخلاقي

يعني ما صدقت ومـن الله تدورهـا
طريت فرقاك .. وتسابقني فراقـي!!

ياخـي تأكـد وحللهـا وفسـرهـا
يمكن تغلي وحدتنـي لـه اشواقـي

لا تكسر الصوره اللي صعب نكسرها
ولا تخلف الهقوه اللي كنت بك هاقي

اما لـو انـك مصمـل لا تأخرهـا
مادام حبك تمكـن صـح باعماقـي

اخـاف لا تكبـر القصـه واكبرهـا
واخاف لا اكرهك باقي عمري الباقي

الله وكيلـك عيونـي لا تسهـرهـا
ولا تخلي الناس تكشف خافي اوراقي

عطيتـك علومـي اولهـا وأخرهـا
واخلاقك اخلاقك وأخلاقـي اخلاقـي

****

قصيدة ((( كوكب الأرض )))

حبيبتي من يسمع بوصفها مرض!!!
ومن شافها في جلسته ما برحها

اللي تعم الارض بالطول والعرض
مرح ليا منه تزايد مرحها

تامر على طبع الزعل لا رضيت ارض
والارض تفرح من سبايب فرحها

والزين يقرض من حلا وصفها قرض
حتى لو انه بالتشبه شرحها

اصفا صفا بالزين والذكر والعرض
حتى الخيال اللي سرح ما سرحها

وابختصر .. وصفي لها باخر العرض
بفكرةٍ عبدالله اللي طرحها

هديةٍ ماهي بسنه ولا فرض
لكن غلاها زاد .. يوم اقترحها

(( حوريةٍ تمشي على كوكب الارض
لو ذعذع الغربي عليها جرحها ))

*****

قصيدة المتهم والخصم والقاضي

لا والله الا قضا صبري على الفاضي
ومليت وانا ارسم الصوره واعدلها

واتعبني الحاضر اللي كنّه الماضي
وتالي رسوم المحبه تشبه اولها

يا سبة امراضي وسبة شفا امراضي
ياعالج الروح والا لا تطولها

الصبر ما عاد له لازم ولا حاضي
ورسالتك واصلتني قبل ترسلها

لا تحسب اني على طول المدى راضي
صابر ومقهور في القصه بكاملها

نور الوعايد على مر الزمن ياضي
وتطفي شموع الملاقى قبل لا اشعلها

وتشفي بقلب الجويع بجمرك اللاضي
وتشوي له اللقمه ويصبر .. وتاكلها !!؟

الصبر زلزالي اللي شتت انقاضي
ونهايةٍ للبدايه قبل لا اصلها

تخيّل الصبر لو يقضي وهو قاضي؟؟
واطباعك وجملة احكامك .. تخيّلها

ما دامك المتهم والخصم والقاضي
اخذ القضيه على كيفك ,, وحللها

[دايم اهذريبكـ]

يعطيك العافيه على النقل
ولاهنتي وصح لسانش ولا لسان مبارك

[لبى خوالش]

السلام عليكم ورحمة الله وبركاتة

الخالديه

تسلم يمينش ع النقل الرائع

صح لشان الشاعر مبارك

تقبلي تحياااااااااااااااااااااااتي

[الخالدية]

المشاركة الأصلية كتبت بواسطة H T L R

يعطيك العافيه على النقل

ولاهنتي وصح لسانش ولا لسان مبارك

اللهــ يعافيكــ
هتــلر
اشكركــ على مروركــ الكريمــ
وتعليقكــ الــرائــعــ

[الخالدية]

المشاركة الأصلية كتبت بواسطة لبى خوالش

السلام عليكم ورحمة الله وبركاتة

الخالديه

تسلم يمينش ع النقل الرائع

صح لشان الشاعر مبارك

تقبلي تحياااااااااااااااااااااااتي

وعليكم السلام ورحمة الله وبركاتهـــ
لبى خوالشــ
اسعدنيــ مروركــ وتعليقكــ