كما يتوق من الشياهين قرناس ..... يتوق قلبي للجديد ويجيدة
مانيب في العرف اتهجس تهجاس .... ابيع واشري في العلوم الوكيدة
ولحتجت راي انصا بديهين الحساس .... واستد بريا اصحاب لريا السديدة
الي لهم في العرف ساسأ ومغراس .... الجيدين اهل السدود الجويدة
الراي خير وشر من الراس نبراس .... ما هوب من روس القلوب البليدة
واعوذ بالرحمن من كل وسواس .... واهبي الشيطان واشرار كيدة
الله هو الي في فضايلة غطاس .... ونفسن تجاهد في سبيلة شهيدة
اليسر يجلي العسر كتام الانفاس .... وتبدل الروح الشقية سعيدة
عيد ارمضان الي مضى طير الباس .... الخير في هلالة وفي هلال عيدة
طاح المطر ما عاد يعتاز عساس .... كلن يربع ما الربيع ابجيدة
قامت محاحيل المرس تضرس اضراس ....صلب وصلبت الشمال الشديدة
صلفن هواها ما هواها بنسناس .... هوا نفيضن من ديارن بعيدة
اهل النجور ادنها دن لجراس .... الرمث يحرق والمباني صميدة
وين انت يا ناصر ترا الوقت حساس .... لشهرتطارد بين يوم وطريدة
مثلك بغيت انعس ولا جاني انعاس .... افرد بي التفكير بشيا عديدة
في عازتك كاتب وموقد وحماس .... مابة عضيدن مغتني من عضيدة
النوم لوم وشبت النار نوماس .... لحق على نارك حطبها وزيدة
اجمع لنا جرومن من الرمث يباس .... نطرد بها سبر البطين وجليدة
وليا قربت من المعاميل لا باس .... انتاش من صندوقها الي تريدة
مطرافتين ودلتين ومحماس .... والشت والملقاط والنجر وايدة
وعويدين يطرد خوا كل رماس .... وحساوين فردة خلاصة فريدة
والما تلقا لة من السحب بطياس .... من السحابة للمعاميل سيدة
الدلة ماناشها هجار وشماس .... بالنار والبن اليماني عهيدة
كاري وكيف الراس مفتاح الاوناس .... انا وهي مثل الصغير وديدة
احمس ودق ولا يجي فيك هوجاس .... تنوش محماسك لهبت الوقيدة
لقم وزل وحط للهيل حباس .... الليفة الي جلد جذع وجريدة
وليا تقهوينا وطار التعوماس .... الفصل الاول عيد نارة وعيدة
والقط جمر من مجمرن لة تقيباس .... ساوة على المدخن وحيدة وحيدة
واشقر من الجاوي كبر سلة الفاس .... شقر العصا لا تكسرة كسر حيدة
وجب السحال من المصاغير تراس .... الي لبنها حلو نيلة وعيدة
واسحب لنا من بتري الجيب كباس .... حطة علية وشنكرة في الحديدة
وحضر قلم يا نوم عيني وقرطاس .... شرد المثايل تنقبض قبض صيدة
ان ما صخرت بليس عن كل بلاس .... مابي القصيدة تعترضها النقيدة
والشاعر الي في المثايل لة رماس ....ايفيدني في بعض الاشياء وافيدة
قصيدة الشاعر لها وزن وقياس .... ومدح المديح يزود ملح القصيدة
بمدح مديح اصخى كف وقوي باس .... ومن خيرة الاسلام دين وعقيدة
زعيم ولباس الزعامة لة الباس .... توفرت فية المزايا الحميدة
ابو ثنين الي تسولف بة الناس .... مقدم شمل ما هوب مقدم بديدة
لة الزعامة من قديمأ على ساس .... اعلم الي يحسب انها جديدة
انكان شيخ الشمل ران فهو راس .... منهو كنيد ابو ثنين ونديدة
روسن تروس الروس ما هيب تراس .... روس الجمالين الكبار العنيدة
خيالهم يا خذ على الخيل مرواس .... يوم القنا ذخر الكنيد لكنيدة
فرسان لركبو على قب لفراس .... وكرمان يوم ان المراجل مكيدة
واليوم عاد الماس ما عود نحاس .... كبيرهم شيخ وولدهم وليدة
في مجلس الحاكم لبو ثنين مجلاس .... مسلط خوي ابن سعود وقعيدة
راية يدوس اريا ولا هوب ينداس .... ننشد من الجيد وندري بجيدة
ماهيب عرضأ للغنيم ولفلاس .... والي محمد وامتة من عبيدة
شعاري جداد جمايلة دراس .... وهدوة مسح ديني وهدوي قصيدة
اهدا على كومن من المال بكياس .... رصيدي الي راصدة من رصيدة
اوفيت منة ناس ومسلفن ناس .... وعطيت ناس وعاد منة شريدة
بين الرجا يا مسامر البرق والياس .... ما واعد الله بة يجي في الوعيدة
وما ضاع غير الحق تدفنة الاطعاس .... وما فقد غير الدين ماهو فقيدة
والي طمسها الوقت والوقت طماس .... وبغت تبيد بها السنين المبيدة
كانت تصور لي عواكيس ونحاس .... وتشيل في نفسي لنفسي حقيدة
وبلعكس صارت حض ما هوب عوكاس .... الله وفقها النوايا الرشيدة
وفيت يا حلال مفتول لمراس .... ومديت يا مال الغناة المديدة
لو حط لهل المد كاس من الماس .... ويحط كاس المد في راس ميدة
ابن شعيفان المرشح على الكاس .... هو راعي الجزلة ماهي الزهيدة
ايقض حمل الي شكا ضيم الاتعاس .... ويحيل قيد الي يدفدف بقيدة
قلتة وانا اقابل في العطا مالة اجناس .... سولف يا رادو واكتبي يا جريدة
الـــشـــاعـــر : مطلق بن طايع الهاجري
عـــــــــــيـــــدكــــــم
مــــــــبـــــــاركـ
وكــــــــــــــل
عــــــــــام
وانـــتــم
بخير
اخيكم : شـــــــــــاركــــم .....
29-09-2008, 04:09 AM
العرض العادي
