مقحم النجدي يفك ابله من شمر

[الفتى المعيضي]

بسم الله والصلاة والسلام على رسول الله

السلام عليكم ورحمة الله وبركاته

سالفتي هذي عن فارس من فريس الجزيره وبتحدي من عنزه وهو مقحم النجدي من الصقور من بطون العمارات من عنزه وهو صاحب القصيده المشهوره الملقبه بالشيخه
الي هي يالله ياقادر يابا القدار000انت الذي مدات جودك لطيفه ايضا القصيده هذي خذة كل اعجاب ابن رشيد ولما سمع البيت الي يقول فيه النجدي

نرفي خماله رفية العش بالغار000 ونودع له النفس القويه ضعيفه000 وهو يقصد هنا الجار

لما سمعه بن رشيد قال تكفون ياشمر محد قال هالبيت قبل النجدي عزالله انه غلب اهل الشعر كلهم

المهم غزى بو خوذه عبد الكريم الجربا ومعه ابا الميخ وبن طواله غزو على ابل مقحم ولا كان معه

الى عياله جبر وجبار والي قال فيهم ترعى بضف الله ثم جبرن وجبار 00خيالتن يوم الملاقا عنيفه

وعيال جبر وجبار وهم سته وفكو ابلهم من شمر بعد مجزره صارت عند عراقيب الابل وستبسل حتى احفاد مقحم رغم صغر سنهم وفنهايه نصرهم الله رغم قلتهم العدديه ورجعو شمر وهم لم يظفرو شيئ من النجدي ثم قال النجدي قصيده يصف بها المعركه ويمدح فيها شمر ويثني بها بالمدح على الولاده واحفاده بس القصيده ماتحضرني الحين وانشاء الله راح اجيبها لكم لاكن عندي بعض الابيات ومنها

شمر نهار الكون بلشو بشامان000طال النهار وكملة هبت الريح

والشطر هذى يصف عددهم وثم يقول00من دون زرفات العشاير ذوابيح

طبعا هذي ماهي غريبه على النجدي ولا على اولاده واحفاده فهو ذكر في قصيدته الشيخه انهم لايوبالون من كثرة اعداد اعدائم وقال 0

حنا شوي ولانغبي سنا النار 000ولاننزل الى بالديار المخيفه

وانتظرو قصيدته في مدح ابنائه ونفسه وهو كفو قريبا انشاء الله

[المطلقي]

لاهنت يالمعيضي على هذا الموضوع الجيد ولك كل التحيه

[الـجـبـل]

الفتى المعيضي

أبدعت فتألقت

ألف شكر على سردك لرواية مقحم الصقري

لا هنت يالغالي

بإنتظار جديدك

[عقااب]

لاهنت يامعيضى على السالفه الطيبه

[النجدي]

الفتى المعيضي

قصة وقصائد مشهورات من تاريخ قبيلة يشار لها بالبنان ونعم بأهل التسعة ولاهو قصور بغيرهم . ونعم بالمسمين كلهم من عنزة وشمر .

والقصائد هذه كاملة ...


شيخة القصيد تعتبر من عيون الشعر الشعبي وأحدى معلقاته لما فيها من حكم ومواعظ جمة:

من البارحة بالقلب هجـس ٍ وتعبـار = هجـس ٍ وهاجـوس ٍ تعاقـب نـكـيـفــه

الصبر مفتاح الفـرج هـو والاذكـار = من لاصبر تصبـح حـوالــه كـسـيـفــه

يالله يالمـطـلــوب يـــاوال الاقـــدار = انــت الــذي مــدات جــودك لـطـيـفــه

يالله يالـمـعـبــود عــاون هــل الكـــار = تــحــل شـــدات عـلـيـهـم كـلـيــفــه

اللـي مجالسهـم بهـا بـن وبهـار = ونـجــر ٍ يـصــوت لـلـمـسـيــر رجـيـفــه

ومكارم ٍ للضيـف عجـلات وكبـار = ومـفـطـحــات فــي صـحــون نـظـيــفــه

تقليطهـم للضيـف قعـدان وبـكـار = وحيل الـغـنـم وقـت السنيـن الـحـفـيـفــه

اكرام ضيـف البيـت حـق وتعبــار = والـكــل مـنــا يـفـتـخــر فـيــه ضـيــفــه

يا مزنةٍ غــرّا مـن الـوســم مــبـدار = اللـي جـذبـنــي مــن بـعـيــدٍ رفـيــفــه

هلت مـن القبلـه هماليـل الأمطـار = مـن سـيلهـا الــوادي غـدالـه وحـيـفــه

تمطر من الهدرى اليـا خشـم سنـار = وتسقـي ديـار مـحـقـبــه والـحـتـيــفــه

وتضفي على كل المفالـي والاقطـار = وتصبح بهـا خــدان ربـعــي مـريـفــه

عقب الحيا فاحت بها ريـح الازهـار = وتعاقـب الـنــوار مــثــل الـقـطـيــفــه

وترعا بها الغرا وتبنـي لهـا طـار = عقب الضعــف راحــت ردوم مـنـيـفـــه

اذوادنــا مـايـرتـعــن دمــنــة الـــدار = ولا يـرعــن الا بـالـفـيـاض النظيـفــه

يرعـن بضف الله ثم وجـبــر ٍ وجــبــار = خـيــالــة يـــوم الـمــلاقــا عـنـيــفـــه

ترعـى بها الوضحا من الذود معطـار = غبوقـة الخطـار عـجــلٍ عـطـيــفـــه

يبنـي عليهـا بنيـة اللُّبْـن لجــدار = عـقـب الـضـعــف راحــت ردومٍ مـنـيـفــه

اذوادنـا يرعـن بنـا سـر وجهـار = من دونـهـن نــروي الـغـلــب والـرديـفــه

ترعى بضف الغوش بقصاف الاعمار = تقطف زهر مرباعهـا مـع مصيفـه

ما هي سوالف مسرد ٍ عقب ما نـار = اللي هرب واطراف رمحـه نـظـيـفــه

إن سوهجوا عنهـا قليليـن الابصـار = من دونها نـروي السيـوف الرهـيـفــه

ان سوهجوا عنها معاميس الابصـار = حنـا نـرد اللـي يـبـيــهــا نـكـيــفـــه

خطو الولد مثـل البليهـي اليـا ثـار = زود ٍ على حمله نـقــل حـمــل ألـيـفـــه

بشدا هديب الشـام شيّـال الاقطـار = واليـا كـبــر حـمـلــه تــزاود زفـيـفـــه

وخطو الولد مثل النداوي اليـا طـار = صيده من الجزلات ماهـي ضعـيفـــه

ترجي العشا من مخلبه وقـع وطيـار = حسه على صيد الخـلا لـه وحــيـفــه

وخطو الولد يصبر على موتـة النـار = صفـر علـى عـود تضـبــه كــتـيـفـــه

وخطو الولد يامال قصـاف الاعـمــار = لانـافــع ٍ نـفســه ولا مـنـه خــيــفـــه

ورجل ٍ بلا ربعه على الغبن صبــار = يمنـى بلا يـسـرى تـراهـا ضــعـيـفـــــه

واليا بخصته ماسـوى ربـع دينـار = مع العـرب يشبـه خـطــاة الـهـــديـفــه

حنا فريـق ولا نغبـي سـنــا الـنــار = مـا نـنــزل الا بــالــديــار الــمـخـيــفــه

ودار ٍ به الحقـران ماهـي لنـا دار = حتيش لو صــارت خـصــاب مـريــفـــه

وحنا لك الله مـن بعيديـن الاخبـار = والنفس مـا نلحـق هواهــا حـسـيــفـــه

حلويـن للصاحـب وللخصيمين قهــار = وعـدونــا لــو هــو بـعـيــد نـخــيــفـــه

حنا كما المشخص عن الصرف ما بار = بالوزن يرجـح والمصـاري خفـيفــه

وتلقـى منازلنـا رفيعـات واخـيـار = والرجل عن دوس القصايـر حـفـيــفــه

لابـد مـا نـسجـلهـا تواريـخ واذكـار = وتبقـى لـدسميـن الشـوارب وظــيـفــه

الا ومـع ذلـك لــك الله لـنــا كـــار = عــن جـارنــا ماقـط نخفـي الـطـريـفــه

نرفا خمال الجار لو هـو بنـا بـار = ونضحك حجاجـه بـالـعـلــوم الـلـطـيـفــه

ولا نبدي الخافي لاصار مـا صـار = وندمح خمال الـجـار لــو بــان حـيـفــه

ونرفا خمالـه رفيـه العـش بالغـار = ونودع لـه النـفــس الـقـويــه ضـعـيـفــه

والجار له قيمـة وحشمـة واعتبـار = وجارتـنــا عــن كــل عـايــز عـفـيـفــه

ما زارهن مـن يـبـغــي الحـيــف زوار = الا ولا عـنــهــن نـــدس الـغـريــفــه

نـبـيــه إلـيــا بــدل الـــدار بــديـــار = وكــل بـجـيـرانــه يــعــد الـوصـيــفــه

نكرم سبال الضيـف حــقٍ وتـعـْبــار = لا مــن ولــد الـعـفــن شــح بـرغـيـفــه

أحد ٍ علـى جـاره بختـري ونــوار = و احـدٍ عـلـى جــاره صـفــاتٍ مـحـيـفــه

وصلاة ربي عـد ماخضـر الاشجــار = على الرسول اللـي عـلـومــه شـريـفــه





القصيدة الثانية :

ياركبا من عندنا بنت شقـــــــــران = مافوقها الا الخرج هو واللواليـــــح
لاجيت عبد وعبدين الاخــــــــــوان = وعبدالكريم اللي كسب هبة الريح
هل الندم من خاطر هل غــــدران = غبقة وصبحة ريّ ما هو تناشيــــح
جونا السيافا والعجرش وحدبـــــان = وابن مصيول وابن راجح وابا الميــخ
يتلون ******** الغوى نسل فرحــــــان = من ماكر تبعه يصيد المجاويــــــــخ
وحنا جنبنا بس تسعة ووغــــــدان = ومن دون زرفات العشاير ذوابيــــح
عن الكمي ما رددوهن بالارســـان = يروون عطشان القنا من المجاويخ
من نقرة الصيقال الى نقرة الخان = والخيل عزم بالوجيه المفاليــــــــح
وفرسان تالي الخيل نارت بشامان = طال النهار وكملت هبة الريــــــــح
وعن السهل ياطن شخانيم ضلعان = وغطى قطي الخيل مثل الشماريخ
وأما بيات الليل ما عنه جحـــــــدان = لحقوا طلب شقح عليهن شراشيح
رطين مرزات العجم باوسط الخــــان = سمعوا حنين مطربات السواريــــــح

ورواية أخرى للقصيدة :

جونا السيافا والعجرش وحدبـــــان = وابن مصيول وابن راجح وابا الميــخ
يتلون فرز الخيل من عقب فرحـــان = من ماكر تبعه يصيد المجاويــــــــخ
وحنا فزعنا بس تسعة وشبـــــــان = ومن دون زرفات العشاير ذوابيــــح
عن الكمي ما رددوهن بالارســـــان = يروون عطشان القنا من المجاويخ
من نقرة الصيقار الى مفـرش الخان = الخـــيل أقفــت بالقــروم الطخاطيخ
وفرسان تالي الخيل نــــارت بشامان = ودون العشاير صيدنا هامة الشيــخ
وعن السهل ياطـــن شخانيم ضلعان = وغطى قطي الخيل مثل الشماريـــخ
وأما بيــات الليل ما عنه جحـــــــدان = لحقوا طلب شقح عليهن شراشيــح
رطين مرزات العجم باوسط الخــــان = سمعوا حنين مطربات السواريــــــح

وقفة مع بيت ..

يتلون فرز الخيل من عقب فرحـــان = من ماكر تبعه يصيد المجاويــــــــخ

فرز الخيل عقب فرحان المقصود هنا هو الجربا , من ماكر تبعه : أي أن الصقر يعقب ثلاث طيور بالترتيب (الأول يسمى النادر , الثاني يسمى الشاهين على ما أظن , أما الثالث وهو المقصود يسمى التبع ) فهذا التبع يصيد المجاويخ ؟؟ أنظر إلى الوصف البليغ في مدح العدو .يالها من أخلاق تمتعوا بها أجدادنا الاوائل .

[الفتى المعيضي]

الله لايهينك