قصة مقتل عبيد بن حميد والثأر له

[المزحمي]

السلام عليكم ورحمة الله وبركاته :


كانت غارات عتيبة على قحطان لزحزحتهم من جنوب نجد لا تتوقف

وفي يوم من الأيام جهز محمد بن هندي غزية الحمده وقادها وصبحوا قحطان وصبوا غارتهم على الخنافره قوم شالح بن هدلان وأخذوا أبلهم وركبوا القحاطين ليستردوا أبلهم وكان أخو شالح الفديع أرمد فصبت أمه على عيونه ماء حار لكي يرى جيداً فركب فرسه ولحق بقومه لكي يسترد معهم الأبل وألتقوا بهضبة خفا المكان المعروف في نجد واقتتلوا قتالاً شديداً وعمد سلطان ابا الروس ابن هندي إلى الفديع بن هدلان بالرمح فضربه على رأسه فأخترق الرمح رأسه وخر صريعاً وانهزمت قحطان

وذهب المقطه بالأبل ورثى شالح أخيه الفديع بهذه الأبيات :

أمس الضحى عَدّيت روس الطويلات
وهيضت في راس الجحا ما طرا لي

وتسابقن دمـوع عينـي غزيـرات
وصفقت بالكـف اليميـن الشمالـي

وجَرِّيت من خافي المعاليـق ونـات
والقلب من بيـن الصناديـق جالـي

واخوي ياللي يم قارة ـخفا ـفـات
من عاد من عقبـه بيستـر خمالـي

ليته كفانـي سـوّ بقعـا ولا مـات
وانـا كفيتـه سـوّ قبـر هيـالـي

وليته مع الحيين راعـي الجمـالات
ونا فـدا لـه مـن غبـون الليالـي

واخوي ياللي يوم الاخـوان فـلات
من خلقته ماقـال ذا لـك وذا لـي

تبكيه هجـنٍ تالـي الليـل عجـلات
ترقب وعدها يـوم غـاب الهلالـي

وتبكي على شوفـه بنـيّ عفيفـات
مـن عقـب فقـده حرمـن الـدلال

عوق العديم إن جا نهـار المثـارات
والخيل من حسـه يجيهـن جفالـي

وتعرف هذا الكون بكون خفا


بعد هذه المعركه تعهد مبارك بن غنيم بن هدلان بالثأر للفديع في مقتله والتقوا الكرزان من المقطه والقحاطين وصوب مبارك عبيد بن حميد فقتله فكبرت مصيبة الكرزان والمقطه كلهم لفقدهم عبيد فقال العفار أخو عبيد يرثيه :

ياونتـي ونـة كسيـر الجـبـارة
إلى وقف ماحتال وليـا قعـد ون

عليـك ياشبـاب ضـو المـنـارة
عليـك ترفـات الصبايـا ينوحـن

من مات عقب عبيـد قِلنـا ِودَاره
لاباكـيٍ عقبـه وَلاَقَـايـل مــن

تبكيـك صِفـرٍ البسوهـا غيـاره
تبكيـك يـوم ان السبايـا ينـعـن

وتبكيك وُضـحٍ ربَّعـت بالزبـارة
اليـا قِـزن مـن خايـع مايـردن

الخيل غقب عبيد مـا بـه نمـاره
وش عاد لو راحن وش عاد لو جن

يا شيـخ ما تامـر عليهـم بغـارة
كود الجروح اللي على القلب يبرن

يقطع صبـي مـا ينـادي بثـاره
إلى اقبلن ذولـى وذوليـك قفـن

يااهل الرمك كل يعَسِّـف مهـاره
والمنع مانطريـه لاهـم ولاحـن

فأجابه شالح بن هدلان بقصيدة قال فيها :

ضيف الله اشرب ماشربنـا مـرارة
إصبر وكنـك شالـحٍ يـوم حـزن

وراح الفديع اللـي علينـا خسـارة
واخذ قضـاه عبيـد حامـي ثِقلْهـن

يمنى رمت بـه ماتجيهـا الجبـارة
اللي رمـت بعبيـد فـي معتلجهـن

من نسل ابوي وضـاريٍ للشطـاره
يصيب رمحه يوم الارماح يخطـن

وعبيـد خللِّـي طايـح بالمـغـارة
عليـه عكفـان المخالـب يحومـن

وعادتنـا بالصيـد ناخـذ خـيـاره
ثلاثة الجذعـان غصبـن بـلا مـن

مانـي بِقَـصَّـادٍ بلـيـا نـمـاره
أجدع نطيحي بالسهـل وإن تلاقـن

من حـل دار النـاس حلـو ديـاره
لابـد ماتسكـن ديــاره ويغـبـن

ومن شق ستر الناس شقـوا ستـاره
ومن ضحك بالثرمان يضحك بلا سن

وان كان ضيف الله يعسـف مهـاره
فمهارنا من عصـر الاول يطيعـن

وكانت قحطان عندما قتلة عبيد قاموا يرزفون ويغنون على عبيد

ويقولون :

( ياذيب صدعان دوك عبيد ** وصوت لذيب الحوميه )
( الى ان قال ** صم الرمك داجن عليه )

كان مع القحاطين رجل اسمه فهاد الحشيشي من الروسان المراوحه عليه دم في قبيلته الروسان من عتيبه وجالي عند آل هدلان ويشوف المنظر وعرف ذباح عبيد اسمه ( مبارك بن غنيم بن هدلان ) بالنسبه لدم فهاد فقد تنازلوا عنه ربعه وجالس عند القحاطين فقال لشالح بن هدلان ابا اعود الى قبيلتي عتيبه واباك ترسل معي رجل يطلعني من ديار قحطان وفعل شالح ومشى فهاد على طول الى محمد بن هندى وقال قحطان يرزفون على ذبحت عبيد 0 وانا اعرف ذباح عبيد 0
(فهاد) كان معه فرس وحصان فقال ضيف الله الفرس راحت بثلاثين من المغاتير فرفض (فهاد) وقال ضيف الله الحصان راح بخمسة عشر من المغاتير فباعه واخذ ضيف الله الحصان 00

تجهزت الغزيه وقادها ابن هندي يتلونه فرسان المقطه0

يقول أحد فرسان قحطان يحذرهم بقدوم الغزو :

جوكم الكرزان يتلون ابن هندي *** آلاد الكريزي مطوعة كل جاهل

وقد اقسم ضيف الله ان من قتل (مبارك) اني لاقتله وقال ضيف الله لفهاد الحشيشي ورني مبارك وعند التحمت المعركه قال فهاد هذا مبارك وصار ماهوب هو صار اخوه يشبه له بالملامح 0

ضيف الله صل الحصان عليه وضربه بالرمح على الصدر وقتله
اما فهاد عرف انه ليس هو وشاف مبارك على بعد ولحقه على الفرس
لأن فرس فهاد سبوق وقتله بالرمح وأخذ حصانه

فهاد ذل من ضيف الله يقتله وقال انت الي ذبحته يالامير ولم يعلم ضيف الله أن الذي قتله هو أخو مبارك بن غنيم بن هدلان.

وقتل ضيف الله 13 فارس في نفس اليوم ولم يقتل مبارك كما يتوهم البعض


الذي قتل مبارك فهاد الحشيشي الرويس.


ويقولون الرواه أن ضيف الله شال حمله على قحطان وصارت مغازيه عليهم باستمرار ومافيه منع لمدة خمس سنوات والشاهد بيت العفار :

ياهل الرمك كلن يعسف مهاره 0 0 0 والمنــــع مــا نطريه لاهم ولا حن

رحمهم الله وموتى المسلمين


وسلامتكم

[فيصل بن حجرف]

موضوع جميل تنسيق رائع اخي المزحمي
والله يرحمهم جميع
وقحطان وعتيبة من اشجع القبائل في نجد وتاريخهم معروف ومثل هذي السوالف تجدها في كل قبيلة

[راكان اليامي]

لاهنت يالمزحمي واشهد اني اسمتعت بقراءاة الموضوع يالغالي

ونعم في عتيبه وقحطان

[العماني]

لاهنت يالمزحمي على الموضوع الطيب والسرد الأطيب وهذا حال الأولين.

تقبل تحياتي،،،

[ابوتركى]

الحمدالله على نعمة الاسلام والامان

وكانو خلفنا اروع مثال بالشجاعة والشرف وهى تعم جميع ابناء قبائل الجزيره وليست

حكرا على احد

لاهنت المزحمى على ماوردت

[ابو محمد]

لاهنــت يالمزحمي ونعم في عتـيبه وقحطـان