لكل عيال القبايل ؟؟ أرجو الأخذ فيها بجد قبل التعليق

[~ قـلـب الـذيـــب ~]

السلام عليكم ورحمه الله وبركاته

اللهم صلي وسلم على أشرف الانبياء والمرسلين سيدنا محمد صلى الله عليه وسلم....أما بعد

أخواني أول شي كل عام وأنتم بخير وصحه وسلامه

وعساكم من عواده والله يديم الأخووه والوصل بينكم وبين كلن وربعه

أولآ : كلامي هذا بصراحه لأني أشوووف بالنت خاصه من مؤرخين التاريخ مدح قبيلته وذم القبائل الآخرى وهذا مايقوله الا اللي أبوووه بصراحه ماعلمه وشلون يحسب للرجال ( ومن مايحسب للرجال محدن حسب لوه )

ثانيآ : ياخي محد قال لا توثق تاريخك لكن أبيك تعرف أن ( ابن خلدوون المؤرخ ) قبل 800 سنه ماكان يعرف بالقبايل لحد ماأضطر أنه ياأخذ باأقوال أخرى ومن كتب وروايات هذا شي

الشي الثاني ( كل قبيله لها حقها من رجالها )

وبصراحه أنا أشوووف بعض عيال قبايل يسب ويشتم قبائل اخرى سطرت التاريخ ( بفعل يمناها )

ياأخوان هذا تاريخ ووقت راح بما حواه من أحداث ( دون تاريخك ولكن تجنب ذم القبائل الاخرى وقبل لاتدون تاريخك حط براسك شي واحد أن هاللي تدونه لاتحطه أبد بذمتك )

ثالثا : أنا بالنسبه لي والله أني حاسب حساب لكل قبيله بهالسعوديه سوى من حرب ووالله ونعم اللابه ورجال مايلحقهم شك والا شمر اللي طيبهم يسبق يمينهم ورجال معروفين بكرمهم وشلفاء ذيابه والا عتيبه اللي من رافقهم مايضام ورجال يسند بهم الظهر والا قحطان اللي مايختلف عليهم اثنين بذكرهم للطيب ورجال لهم يحسب لهم والا عنزه اللي علومهم وافيه وغانمه وفعلهم مذكور وطيبهم سابق وأهل نخوه وكرم والا مطير اللي صيتهم يذكرهم بالفعل الوافي ورجال مايلحقهم قصور والا جهينه اللي علومهم تدسم الشوارب وإن مالحقك منه طيب مالحقك شر والا العجمان اللي فعلهم غانم مو بشهادتي الا بشهاده التاريخ ورجال يروون تسبد الطيب ونعم اللابه والا بني هاجر اللي الكرم عندهم شي مقدس ورجال شلفاء ذيابه بهم من الطيب مايغني عن الكلام والا آل مره عاد هالقبيله أخبر انهم أجوديه وراعيين هجن آصايل ولاعليهم قصور ينشد بهم الظهر والا الياميه اللي ذكرهم واصل للشمال أنشهد انهم صقور ماينخاف عليهم ورجال لا أعتزيت بهم مايضيع لك حق
والا بني خالد كبار البخوت أهل السموت ورجال بهم نحوه وانشهد انهم عزوه لبعضهم ( وقوم تعاونو ماذلو ) والا الشرارات اللي فيهم من الكرم والطيب مايقطع الشك باليقين فيهم ورجال ونعم بهم فعلهم مخبووور ولابوه شك والا الحويطات اللي ضيفهم مايشتكي ورجال ماتقصر يمينهم لاجت المواقف دون العلووم والا الظفير اللي فعلهم وافي والطيب مخاويهم ونعم اللابه والا الدواسر مكرمين الضيف وعلومهم غانمه ومابهم شك وقصور ونعم اللابه والا سبيع الغلباء ونعم الرجال اللي فعلهم وطيبهم يذكر وعلمهم غانم ونعم بهم والا بني رشيد اللي بهم من الرجال مايشفي غليل كلمه ردئ ونعم فيهم اشهد بالله مايلحقهم قاصر وشك بهم من الرجال مايدسم شارب اللي سأل عنهم
وبني عطيه مكرمين الضيف والهقوه بهم ماتخيب لا جت للهقاوي

وقبيلتي ( بلي ) لن أتحدث عنها...

ونعم بكل القبايل اللي ماذكرتها وقد تخونني الذاكره ان لم اكتبها ولانني كتبت الموضوع وانا على عجله من آمري..

ولكن أرجع وأقوووول نصيحه لوجه الله : دايم ( أحشم الرجال تحشمك ) والا الرديء مايمثل قبيله بل


بل يمثل نفسه ورداه منه وفيه...

تعليق : فيه بعض ناس يسب ويشتم وحاط براسه شي اسمه ( محد يحاسبني ) أعرف أن ربك فووق يحاسبك واذا أنت تشوف نفسك خلف شاشه كمبيوتر..وتسب ببعض القبائل

صدقني تذكر شي واحد... لو الأمر يحمل يوصلون لك بيوصولن مثل سلام عليكم...

ووقتها بتكون ( النتيجه وخيمه لك )

وأحب أقوول للاخوان وسعوا صدوركم ( وكلن يعرف وش قدره بفعله هو لا بفعل ابوه ولا جده )

وسو الطيب والمعروف ولاترتجي من وراه ( بالمقابل )

المعروف اللي تسويه لغيرك خله من طيبك أنت... وانتبه لاصار خلاف لاسمح الله

تتمنن بالمعروف اللي سويته...

لا خلك أحسن منه وخل ( نبعك صافي ) والله ثم والله ثم والله إنك غير تلحق خير

ودايم خذ الأموور ( بحسن نيه ) وانا ماأقول بحسن نيه يعني خلاص بتكون عينك غافله.. لا

خذ الامور بسعه صدر ورحابه.. ويااخوان الدنيا للحين بخير..

وكلن بوه خير وانشالله ان علومكم تبيض الوجه..

والشي الاخير : لمدوني المنتديات التاريخيه.. واختصرها بكلمتين ( الشي الزين خذه ودونه والشي الردئ خله حتى لو صار معك خلاف مع أي من القبائل )

وانتبه تسعى ورى محررف ومزور وكلام منتديات عشان تقهر فيه شخص من قبيله.. وتذم بقبيلته كلبوها.. عشان شخص ماحسب حساب لكلمته..

وهالكلام يشهد علي ربي قلته من باب ( أني شفت بعض الأعضاء قالبها حرب إلكترونيه ويذم بقبايل ويتصغر قبايل ويحط على قبايل ويطلع قبيلته على حساب قبايل ويشكك بنسب قبائل......ألخ..؟؟ وبالأخير تكتشف انه عشان شخص ماتدري هو من نفس القبيله والا ماهو صاين وحاسب حساب لكلمته اللي يطلعها.. )

وأخيرا أرجو اني ماطولت عليكم.. والعذر والسموحه..

واهدي هالقصيده لكل شخص..

كـلاً علـى قـده همومـه تضـده
وكلاً بعظم اريـاه تعظـم دعاويـه

وكـل بـزود اغنـاه يـزداد وده
وكلاً بعـد اخطـاه تبعـد هقاويـه

وان كان ما تصبر على كـل شـده
لا مرقباً ترقـاه ولا قصـر تبنيـه

و من لا يـودك صادقـاً لا تـوده
ومن لا يداري خاطرك لا تداريـه

القلب يجفل من وجهيـن مصـده
وانشهد ان القلـب دليـل راعيـه

وسيلاً جرى عن مدرجه لا تحـده
جنب وخل السيل يضرب مجاريـه

وما فات من دنياك صعبـاً مـرده
خذلك من الماضي عباره و توجيه

ومن ما فعل ما ينفعـه فعـل جـده
ولا فعل ابوه ولا فعل مـن يواليـه

الرجـل تذكـر بـه أفعـال بيـده
من زين ولا شيـن فعلـه يكفيـه

ولا ينسقي من البير من غير عده
ولا يقتضي بالسوق من خليت ايديه

لقيت مـن يبنـي غـلاه ويهـده
مثل الذي يعمـي عيونـه بيديـه

وصلوا على من جاب علمـاً ورده
علـى نبيـاً ثبـت الله خطـاويـه

تحياتي لكم

ويمكن أغييب فتره

[قرناس العازمي]

جزاك الله خير كلام جميل من انسان واعي الله يوفقك

بس هالموضوع له قسمه وانا اخوك

[تبطي وأنت غالي]

لآهنت ع الطرح ,,

وصآدق أخوي قرنآس الموضوع له قسمه ,,

[ناصــ!!!ــر العجمي]

تسلم ع الموضوووع

[فاهد فهد]

يمين ماهي للعطب وبما انك ماتكلمت عن بلي فانا اقول وعز اللابه بلي ونعم الحسب والنسب المنقره والرحيل والباشا وبن رفاده والقحم ووووو ..

اهل السلوم الغاليه والهمه العاليه ..ماهي غريبه ان يطلع من ابنائها من يصرف القول تصريف في توضيح الحق والمنهج السليم في حوار ابناء القبايل مع بعضهم ..


اي والله يالبلوي مااجمل الادب النظيف والحوار الشريف بين الرجال الغانمين لكن بلااك والله من قليلين الحياء ضعيفين السلوم خساس النوايا قليلين البضاعه من الطيب ابلشوا هالعالم بالنت سب وشتم وكل يطير مع العجه متى مافتح واحد فمه بالسب قامت وراه وضده ناس من كل صوب بالنت تشتم معه او يشتمونه ..


لاهنت ولاهان راس اختار خالك . . .

[راع الـ ع ــرف]

شكرا لك على الموضوع الراائع

[**عافكـ الخاطر**]

جزاك الله خير كلام المميز

[~ قـلـب الـذيـــب ~]

هلا بك تبطي وأنت غالي

صدقت وأنا أخوووك ومشكوور ع مرورك

وياناصر العجمي حياك الله

وياأخوي فاهد فهد

أنت مافهمت قصدي يمكن

لا لا لا تظن كتبت هالكلام لشخص ذم قبيلتي

لا وربي بالعكس

أنا أتكلم ككل وكتبت هالشي يمكن بعد سالفه الظفيري

ومشكور ياقناص يام ع المرور

وياراع العرف تسلم يمينك ع هالطله لاهنت

[فاهد فهد]

قلب الذيب ياقلب الذيب ...


يالغالي انا فاهم كلامك واعجبني جدا ووافق كلامك الحق ..

والله مافهمت من كلامك اي شي خاص بينك وبين احد ابد ..

وانا كتبت ماكتبت من باب الثناء عليك وعلى لابتك حيث ان اللي يقول مثل كلامك لابد من ان يشكر عليه ويثنى على معدنه الطيب ومنبعه الروي ..


تسلم وتردفها مليون تسلم يالغالي ..

[عزيزقوم]

قلب الذيب

وانا اقول بيض الله وجهك يالغالي

كفيت ووفيت الله يعطيك الف عافيه

تحياتي واحترامي لك