لا تامن الخوّان لو زخرف حكاه
من خان بك مره يبي باكر يخون
خالد الفيصل
لا تسمع لنمام ولا تحكي ويّاه
اللى حكوا لك هَمْ ترى فيك يحكون
شريدة المعوشرجي
******** ********
(18)
يوم إنها لي بالاقبال
ما قد جرى منك تقصير
واليوم يوم الهوى مال
يا علها لك مسافير
خالد الفيصل
سبحان من غيّر الحال
كل شيّ عندك غدا غير
يا ناس يا شين رجّال
ما هو على المبدأ يسير
شريدة المعوشرجي
******** ********
(40)
ماينسينا الخطا حب الخشوم
ولا يطهرك المطر عشرين عام
خالد الفيصل
دام قلبك حاقدٍ تقعد تقوم
ما تصافح ايدنا ايدك حرام
شريدة المعوشرجي
******** ********
(25)
ما فات خله ولا تهتم من باكر
واغنم من اليوم ما ساقت توافيقه
خالد الفيصل
واش فاد لا صرت في ما فات بتفاخر
الفخر فى اللى قدرت اليوم تحقيقه
شريدة المعوشرجي
******** ********
(159)
يا نعمة النسيان يا قدرة الله
لولاك أنا عزاه وش كان سويت
لو اذكر اللى فات دقه وجله
ما كان لحظة في حياتي تهنيت
خالد الفيصل
يا كثر دمعٍ في البدايه أهله
كلما أوقف ساعةٍ عدت ورديت
من قال خلٍ يمكن يفوت خله
لولاك يالنسيان لا رحت ولا جيت
شريدة المعوشرجي
******** ********
(193)
لا توقظ النايم تحرمه من النوم
ولا تبعث جروحٍ بقلبي قديمه
خالد الفيصل
لا تسعى للجيّه ترى الباب مردوم
مابي تجيني لو بنيّه سليمه
شريدة المعوشرجي
******** ********
(45)
يا ما عطيناهم وياما وهبنا
واليوم بالنكران قاموا يصيحون
خالد الفيصل
كاس المراره شربونا وشربنا
ويا قرب يومٍ من مراره يذوقون
شريدة المعوشرجي
******** ********
(397)
كل رجلٍ في حياته له ميول
والهوايه تمتلك رجالها
خالد الفيصل
الهوايه لاتعدٌت المعقول
مالها علاجٍ سوى باهمالها
شريدة المعوشرجي
******** ********
(430)
الله جعل للمبتلي داه ودواه
وكلٍ على عزمات قلبه حدوده
خالد الفيصل
من يتقي الله ترى ربي ياقاه
شوف الشجر يكسر وهو صلب عوده
شريدة المعوشرجي
******** ********
منقول
10-12-2004, 09:07 AM
العرض العادي
