رد مستعجل على قصيدة شاعر

[عاشق خزامى]

أولاً أعتذر عن الغياب القسري لظروف العمل وأعود بهذه القصيدة التي كتبتها رداً على احد الشعار يفتخر فيها بترك من احب وقد أطلقت عليها عنوان لم يناسبني كثيراً وانتظر تسمياتكم وملاحظاتكم وانتقادكم ورؤيتكم والأهم ان تنال شي من رضاكم :

لعبة العشق

ياصاحبي كم انتظر منك الاسباب = وش به بهالدنيا غرامٍ يطيبي
لاصرت تنكر خاطرٍ فيك ماطاب = وشلون تحى وانت قلبك عطيبي
ارسل وصاتك للغلا بشوق وعتاب = لا لا توادع خل حسك قريبي
غلطة نديمك جايزه بين الاحباب = بس المشاعر صافية لا تشيبي
ليتك تحس الوجد للقلب لاصاب = داعي ليالي للواليف يصيبي
كذاب من يقدر يفارقه كذاب = ولداعي الفرقى في بعمره يجيبي
سوى صغيرٍ بالهوى دوم لعاب = اليوم يعشق ثم باكر يسيبي
ماقد هقيت العشق سلعة لجلاب = تاجر هواوي للغناوي طريبي
طبعه تسلي والطبع فيه غلاب = ما قد سمع للحب عهد صعيبي
ارحم دموعٍ تنتثر بين الاهداب = وش خاطرك لاشفت قلبه تعيبي
ليه العشق منك تبرأ ومرتاب = تبقى وحيدٍ بالهوى يالغريبي
ومن عاش عمره بالخيانه ولاتاب = ينشد عن الترياق ماله طبيبي
تشكي همومك والصدر فيك شباب = ياكيف عي الفرح مايرتضيبي
مايذبح العشّاق مفتول الاشناب = شمس المحبة باقية ماتغيبي
لاتفتخر ما للفخر غير الانساب = والا اثيرٍ في العدا مايخيبي
لوني مكانه تمنعك سدة الباب = من عافنا عفناه لو هو نصيبي
الدار عزٍ بس ماهو للاجناب = وانت غريب اليوم منت بنديبي
ودي تعيش بدنيتك مثل الاغراب = وتنسى وليفٍ قال لك ياحبيبي

وسلامتكم

(اثيرٍ) : أحد أسماء السيوف

[الراعي الرسمي]

ودي تعيش بدنيتك مثل الاغـراب
وتنسى وليفٍ قال لـك ياحبيبـي

صح لسانك ولاهنتي وروعه ونتمنى ماتنقطعين مره ثانيه

تقبلي تحياتي....

[دلع العجمان]

السلام عليكم ورحمة الله وبركاته
شــــــــــــــــــــــكـــــــــــــــــــــــرآآ

[الـنايفه]

ودي تعيش بدنيتك مثل الاغـراب
وتنسى وليفٍ قال لـك ياحبيبـي



صح لسآنك آخوي ولآهنت لاهنت على القصيده...

خالص الود

آم خآلد