نادرة بين الجنازه والظلماوي

[العويلي الخالدي]

السلام عليكم .. تحيه الى الأعضاء العزيزين ... وكل التحيه لمشرفي الموقع العزيز علينا
اما بعد :
اود ان اشارك بهذه النادره واللتي قليل يعرف عنها

كان دغيم الظلماوي رحمه الله من افضل من يعرف أمور القهوه بالإضافه كونه شاعر متميز وصدر ديوان وكان صاحب احاديث مثمره وكان يتنقل بين الشيوخ للمعرفه وجمع الأخبار والقصائد والوقعات ،،، كان في وقتها في ضيافة الأمير عبدالعزيز الرشيد / الجنازه ،، وكان يسمع عن الظلماوي حيث كان لاينام وكل همه استقبال ضيوفه وفي أي وقت تأتيه تجد الفنجان زاهب ،، كان الحديث دائر في مجلس الامير عبدالعزيز وقام الصبي بصب القهوه إلى ان اتى الفنجان الى كف الظلماوي وشربه ورد الفنجال شبه كامل إلى كف الصبي فإستغرب الصبي واكمل صب القهوه وعاد الى موقع الدلال والنار ،، وقد قرر إخبار الأمير بعد ذهاب الضيوف ،، واخبر الأمير وكان الظلماوي جالس في المجلس فنظر إليه الأمير وقال : يالظلماوي ليش ماشربت قهوتنا فقال : شربتها ياخو نوره !
قال اصدقني القول فقال الظلماوي :ياخو نوره بصراحه القهوه صايده !!!!
وكانت صدمه للأمير فقال : انت شنو تقول ! الحين هالناس ماعرفت هالشي وانت عرفته !
اسمع يالظلماوي ان ماطلع كلامك صحيح مايطلع عليك صبح فوافق الظلماوي ،، وامر الأمير الصبي بإفراغ الدلال والقمقم في إناء كبير وبالفعل صدق قول الظلماوي فوجدو حشرة من حشرات البر داخل القمقم الرئيسي اللذي يغذي دلال المصب !! فسكت الجنازه عندما رأى الظلماوي يبتسم ،، فطلب الأمير الجنازه من الصبي ان يقوم بإختبار الظلماوي وقال له : هذي سريه بيني وبينك ابيك تسوي قهوه باجر ثلاث طبخات الأولى تعدمها تحرقها والثانيه على العاده والثالثه نيه وتطبخهم مع بعض ... وقام الصبي بتنفيذ مطلب الأمير وسوى القهوه ،، وفي الصباح قال الأمير يالظلماوي الصبي طول الليل مانام وانا عفيت عنه وابيك تشرب القهوه وتعطيني رايك !
شرب القهوه وقال الظلماوي : يالأمير هالصبي من الخوف حرق القهوه وسواها على عادتها ولما حس بالنار الزايده خلاها نيه يبي يصلح الخطأ !!!!!!!!!!!!!!!!!!!!!!!!!!!
انذهل الأمير وتعجب من عرف هالبدوي وقاله اسمع يالظلماوي ،، انت مدبر القهوه ولاراح تعارض فقوافق الظلماوي ،، وامر ببناء بيت كبير خاص بالظلماوي وصارت القهوه عنده الخاصه بضيوف الامير ومرت السنين والظلماوي عند الامير عبدالعزيز المتعب ،، إلى ان اتى اليوم اللذي استدعى الأمير الظلماوي وقال له ،، الحين لازم تتزوج وتراك يالظلماوي ماقصرت وهذا الصندوق وخذ مهر بنت الحلال وتراك معفي من القهوه ،، ورحل الظلماوي عن الأمير بن رشيد وتوجه الى الباديه وتزوج ورزقه الله بطفل اسماه كليب ،، كبر كليب واصبح في السادسه من العمر ،، طفل حي وكيف لايكون حي ووالده الظلماوي .. وفي ليله من الليالي البارده سمع صوت الركايب امام بيته واذا برجلين فوق ركايبهم وهي منوخه ولكنهم لايستطيعون الحراك ( معسمين من البرد ) وقام الظلماوي بانزال الواحد تلو الآخر وقربهم عند النار واخذ ينادي على كليب ،، ياكليب جيب الحطب ،، ياكليب شب النار ،، ياكليب وياكليب إلى أن قال قصيدته المشهوره :
ياكليب شب النار ياكليب شبه
عليك شبه والحطب لك يجابي
ابغث لها ياكليب من جزل خبه
وشبه الى من هبا كل هابي
إلى آخر القصيده .... وانتشرت القصيده وسمع بها الأمير عبدالعزيز الرشيد وكان وقتها عقوبة الدنيا باللذي يقصد بغير الأمير من أبناء الباديه المحطيه به وطلب رأس الظلماوي وارسل الرجال ليحضرونه ،، وكان من ضمن الرجال صديق للظلماوي كان نديمه عندما كان الظلماوي عن الأمير ،، فأخبره وقال له الأمير يطلب راسك وهرب الظلماوي الى الجزيره / العراق / وقد احس بالضيق من الهروب وقرر الذهاب للأمير الرشيد وقال : الباقي من العمر مايستاهل الهروب وانا رايح للأمير ،، ورحل ‘لى الأمير إلى أن وصل اليه وكان جالسا وكانت هذه الكلمات اللتي بينهم على لسان من روى القصه : صبحك الله بالخير ياطويل العمر : الظلماوي ! وش جابك بهان ياغادي البخت ؟ فقال الظلماوي: والله جيت اموت ياخو نوره : فقال الأمير : والله وموتة الجلب مع الحشمه لشخص الظلماوي رحمه الله ولكن هؤلاء هم الملوك ،، انت يالظلماوي ماسمعت تنبيهنا عن القصيد اللي يكون بغيري فقال سمعت وانا اطلبك ياخو نوره ، عندي نشيده وابيك تسمعها وسيفك ادري ماينشال عن راسي !!
فقال الجنازه : انشد ،، فقال الظلماوي :
مد الرها لولا ماقلت ياكليب
ولاقلت شبها وصير موقد له
ياشيخ وصفك عاليات المراقيب
غيم وظلام وتايه اللي مايدله
تملي محايل وتكفي محاليب تكفي= تكب باللهجه العاميه
وكبدن تضميه وكبدن تبله
وتقبل مراكيب وتقفي مراكيب
ماهي وفا يامير خوف ومذله
عز القصير وعز من دونه العيب
وعز من حط العصا ثالث له * إشاره الى كبير السن
وعز لا ارتكى وعدها المصاليب
ومن شانت دنياه صرت والد له

فهز رأسه الامير الرشيد وقال :
هاتو السيف وجلس الظلماوي على ركبيته واكتفى الامير بجز ناصيته بالسيف ،، وأمر له بفرس أصيله وكيسين من المال وسلاح .......... انتهى
اتمنى ان أكون وفقت ونقلت ماسمعته بالحرف الواحد دون زياده او نقص
وتقبلوا تحياتي .................. العويلي الخالدي

[الجنازه]

شكركـ على طرح موضوعكـ
ودغيم الظلماوي الشمري
من اشعر وابرز فطاحلة الشعر الشعبي ،،


ولكن سأكتب لك من باب المعلوميّه فقط ، لك وللإخوان،،

الجنازه الامير عبدالعزيز بن متعب بن رشيد
لم يكن شاعراً قط ،،
ولم يقل الشعر الا مرتين في حياته .

في الصريف ضد ابن صباح و 17 بيرق من قبائل نجــد
وعندما أنتصرت شمر عليهم ،، أوصى احد ابناء شمر للذهاب الى حائل
ويأخذ معه هذه الآبيات ليبشر الامير حمود العبيد الرشيد بالإنتصار الكبير :

ياهيه ياراكب المرســـون // سلم على ساهر العيني
ولإبن صباح ٍ وابن سعدون // وابن سعود ٍ وابا الخيلــي
ذبحتهم والعدو ممهــــــون // بعيال شمر على الخيلي

وحتى لو تلاحظ الابيات ،، هي ليست موزونه !!
وهذا ان دل يدل على ان الجنازه لم يكن شاعراً ابداً
بل كان قائد حرب ، ومتولعاً بالحروب .. كما هو معروف للجميع .

والقصيده الاخيره التي قالها
هي قبل وفاته بعدة ايام ..
وهي من بيتين فقط :

راعي الجمل وده يطيح // واللي على متنه رماه
ياعيال انا مالي نطيـــح // مليت من تالي الحياه


وهذا كما اسلفنا اعلا من باب المعلوميه
خالص محبتي لك ولربعك - هل الحيزا -


الجنازه

[عزيزقوم]

العويلي الخالدي

الله يعطيك الف عافيه يالغالي على هالقصه الطيبه ..

ولكن انت خلطت بين قصتين مختلفتين..

الاولى لــ دغيم الظلماوي الشمري

والثانيه لـــ علوش ابن ظويهر العنزي

قصة دغيم الظلماوي هي .. عندما قال القصيدة التاليه :

يا كليب شب النار يا كليب شبه

ـــــــــــــــــــــــــــ عليك شبه والحطب لك يجابــي

وعلى انا يا كليب هيله وحبــه

ـــــــــــــــــــــــــ وعليك تلقيط الدلال العذابـي

وادغث لها يا كليب من سمر حبه

ــــــــــــــــــــــــــــ وشبه الى من غفا كل هابـــي

باغي الى شبيتها بالـــــمشبه

ــــــــــــــــــــــــ تجذب لنا ربع ســــراة غيابـــي

بنسريه يا كليب صلف مهبـــــه

ــــــــــــــــــــــــــ لا تنعسف لكن بها سم دابـــي

خطو الولد لوله زبون وجبــــه

ــــــــــــــــــــــــــ تاتي عليهم من حساب الزهابي

لا باطن الهلباج خطو الجلـــبه

ـــــــــــــــــــــــــ يا حلو خبط عصيهم بالركابـي

اطمر لهم وابدي سلام المحبـــه

ـــــــــــــــــــــــــ لا جوا على هجنن بيدهم خلابـي

مع كبش مصلاح لك الله نجبــــــه

ــــــــــــــــــــــــ لا دبر الهين متين العلابـــي

الاوله يا كليب عجل مصبــــــه

ــــــــــــــــــــــ والرزق عند الله منشي السحابي

ــــــــــــــــــــــــــــــــــــــــــــــــــ ــــــــــــــــــــــــــ
ــــــــــــــــــــــــــــــــــــــــــــــــــ ـــــــــــــــ
ـــــــــــــــــــــــــــــــــــــــــــــــــ

وعندما سمع ابن رشيد قصيدة دغيم الظلماوي

اراد ان يختبره .. هل هو حسب قوله .. او مثل بعض الشعار يقولون مالايفعلون وجاء

ابن رشيد دغيم الظلماوي عقب منتصف الليل .. متخفي ولكنه حصل الدله على النار

والنار والعة والدله جاهزة.. وهو صاحي على جال الدلال ..وصب له دغيم الظلماوي

من القهوه الموجوده بالدله الجاهزة وجهز الثانيه .. وكان حسب كلامه بالقصيدة

وقال له ابن رشيد قهوتك عليه كل ماطبيت حايل تجي تاخذ قهوتك من عندي

اماالقصة الثانيه حصلت لــ علوش بن ظويهر الغضوري العنزي :

عندما دعا الامير محمد العبدالله بن رشيد الامير علوش بن ظويهر

لحضور مناسبه لدى بن رشيد فـأجاب الامير علوش بن ظويهر دعوة ابن رشيد لحضورها

وكان من ضمن الحضور الشيخ محمد أبا الروس الذويبي الحربي من شيوخ حرب ،

وذهب لا بن رشيد ..لتلبية دعوته وبعد السلام قامو بتقديم القهوه للأمير علوش بن ظويهر

فقال الامير علوش بن ظويهر قهوتك صايده يابن رشيد فغضب ابن رشيد وقال للقهوجى

انثر الدله فنثر الدله ولم يجد شيئا فقال علوش ابن ظويهر انثر الدله الكبيره التي تطبخ بها

القهوة وقاموا بنثرها وشاهد السماره الموجوده بالدله الكبيره عند نثرها وهى تسقط من الدله

فسحب ابن رشيد السيف يريد ذبح القهوجى فقال علوش بن ظويهر ادخل على الله ياابن رشيد

لاتحملنى ذنبه فسمح له ابن رشيد فقال ابن رشيد يا علوش باكر تقهوى عندنا قال علوش ابشر

وكان ابن رشيد يريد ان يختبر علوش فلما جاء موعد وصول علوش بن ظويهر قال للقهوجى

حط مع القهوه حمض واذا جاء علوش صب له فنجال وفعلا عمل القهوجى

ما امر به الامير محمد العبدالله بن رشيد ولما وصل الامير علوش ابن ظويهر قام القهوجى

وصب القهوه لعلوش ابن ظويهر فقبل ان يشرب القهوه الامير علوش بن ظويهر قال :

الحمض للابل وحمض الرجال اللحم يابن رشيد وقهوتك صايده وقامو بنثر الدلال وجددوا

القهوه وتقهوا عندهم ولما أراد أن يغادر قال ابن رشيد باكر لازم تقهوا عندى يابن ظويهر

فقال الامير علوش بن ظويهر ابشر وباكر انا عندك ولما مشى علوش بن ظويهر قال ابن رشيد

للقهوجى قبل لايجى باكر علوش بن ظويهر احمس قهوه محروقه وقهوه مستويه وحط معهن

قهوه نيه واطحنهن مع بعض وسو بهن قهوه وصبها لعلوش بن ظويهر لاوصل وفعلا لما وصل

الامير علوش بن ظويهر فعل القهوجى ما قاله ابن رشيد وصب القهوه لعلوش وقال ابن رشيد

وش رايك بالقهوه ياعلوش قال والله ياابن رشيد القهوه لاقلت نيه فهى نيه ولاقلت محروقه

فهى محروقه ولا قلت مستويه فهى مستويه فقاله ابن رشيد ياعلوش ابن ظويهر

قهوتك وهيلك على طول ماانا موجود على الدنيا

فقال الشيخ محمد اباالروس الذويبى الحربى:

تستاهل الكيف الحمر يا ابن وايل
ـــــــــــــــــــــــــــــ انت الذي تستاهل الكيف كلــــــه
يالي نقدته وسط ديوان حايـــــــل
ـــــــــــــــــــــــــــــ لولاك يا علوش محدن فطن لــــــه
بديوان من يصغي شبا كل عايــل
ـــــــــــــــــــــــــــــ الضيغمي مغني الايدين المغلـــــه
الضيغمي مرذي الامهار الاصايـل
ـــــــــــــــــــــــــــــ يما انقطع في ساقته من اسجلــه
يابن ظويهر ما بها قول قايــــــل
ـــــــــــــــــــــــــــــ نستاهل الفنجال لا جاء محلــــــه
يا ناقد الفاقد بحكم الدلايـــــــــل
ـــــــــــــــــــــــــــــ يا ريف هجني والركايب مقلـــــه
ربعك بني وايل كعام القبايـــــــل
ـــــــــــــــــــــــــــــ هل الجموع الراسيات المغلــــــــه
زبن الدخيل الى توطاه عايــــــــل
ـــــــــــــــــــــــــــــ الجمع دونه والرمك مردفن لـــــــه

فرد عليه الامير علوش بن ظويهر فقال:

يا بن الذويبي يا رفيع الحمايـل
ـــــــــــــــــــــــــــــ لاهنت يا زين الهليب المتلــــــــه
ان جاء نهار فيه صايل وجايـــل
ـــــــــــــــــــــــــــــ والكل سيفه ممن جفيره يسلــــه
يوم يخوف به رجيف الاصايــــــل
ـــــــــــــــــــــــــــــ وتبينت بالقوم ريبه وذلـــــــــــــه
والدم من ضرب المزاريج سايـــل
ـــــــــــــــــــــــــــــ والسيف هامات الجماجم عشا له
كم راس فرز من علابيه مايـــــل
ـــــــــــــــــــــــــــــ من كف شغموم ابشلفاه شلـــــــه
يا درع من صكت عليه الدبايـــــل
ـــــــــــــــــــــــــــــ يا ملحقه من بين قوم امفلــــــــــه
يا حامي المظهور يوم الهوايـــــل
ـــــــــــــــــــــــــــــ يوم به الديان ياخذ افضلــــــــــــه
طير مجرب ما يصيد الهزايــــــــل
ـــــــــــــــــــــــــــــ سوه على الخرب المطرف عشلــه
يا معجب بالسوم راعي العدايـــل
ـــــــــــــــــــــــــــــ وان جن في المنكاف مثل الاهلـه
من لابة لها فعول جزايـــــــــــــل
ـــــــــــــــــــــــــــــ الطيب يظهر والفعايل مدلـــــــــــه

أرجو أني وضحت اللاتباس بين القصتين

وللجميع اجمل التحايا والاحترام

[محمد بن فراس]

السلام عليكم ورحمة الله وبركاته

الله لايهينك يالعويلي على الموضوع

ونفس ماقالك اخي عزيز قوم هذه القصه الصحيحه وحبيت اعدل على كلامه شوي

علوش ابن ظويهر مهوب امير كان رجل عادي وكان مسير على ابن رشيد

والا الباقي اللي قلته كله صحيح وحتى القصيده والله يعطيك العافيه ياعزيز قوم على التصحيح

على الموضوع .

[عزيزقوم]

المشاركة الأصلية كتبت بواسطة محمد بن فراس

السلام عليكم ورحمة الله وبركاته

الله لايهينك يالعويلي على الموضوع

ونفس ماقالك اخي عزيز قوم هذه القصه الصحيحه وحبيت اعدل على كلامه شوي

علوش ابن ظويهر مهوب امير كان رجل عادي وكان مسير على ابن رشيد

والا الباقي اللي قلته كله صحيح وحتى القصيده والله يعطيك العافيه ياعزيز قوم على التصحيح

على الموضوع .

الاخ الفاضل / محمد بن فراس

تحية تقدير واعجاب على مرورك الراااقي

والاضافه الراااائعه الله يعطيك الف عافيه

لاهنت يالغالي

لك اجمل التحيا والاحترام

[التاجر]

كل الشكر للأخ العويلي الخالدي على هذه القصه الشيقه
ونتمنى أن نقرأ لك المزيد

والشكر موصول للأخ عزيز قوم على هذه المداخله الجميله التي أستمتعنا بها كثيرا .

مع ملاحظة أن هناك بيتا لم يذكر في قصيدة التبيناوي وهو :

الضيغمي كل المراجل بعبه 000 وحنا نلقط ما وقع بالترابي
--------------------------------------------------------------------------------------

مع تحياتي

[التاجر]

تعديل على مشاركتي السابقه

المقصود هو الظلماوي وليس التبيناوي

لا تلوموني أندمجت في الموضوع

-----------------------------------------------
مع تحياتي

[عزيزقوم]

المشاركة الأصلية كتبت بواسطة التاجر

كل الشكر للأخ العويلي الخالدي على هذه القصه الشيقه
ونتمنى أن نقرأ لك المزيد

والشكر موصول للأخ عزيز قوم على هذه المداخله الجميله التي أستمتعنا بها كثيرا .

مع ملاحظة أن هناك بيتا لم يذكر في قصيدة التبيناوي وهو :

الضيغمي كل المراجل بعبه 000 وحنا نلقط ما وقع بالترابي
--------------------------------------------------------------------------------------

مع تحياتي

الاخ العزيز/التاجر

تحية واحترام لك يالغالي

اخي العزيز حسب معلوماتي ان البيت الذي يقول :


((الضيغمي حاز المراجل بعبه = وحنا نلقط ماوقع بالترابي))

انه لــ ابن ثويني مجاراه لــ دغيم الظلماوي

وسوف ابحث عنها

هذا مالدي والله اعلم

تحياتي

[العويلي الخالدي]

كل الشكر للأخوان على مرورهم الكريم ،،،، الأخ العزيز عزيز قوم شاكر لك المداخله وانا نقلت ماسمعت من احد الشيبان الكبار اللذي كان جار أحد أبناء الظلماوي في الكويت ،،، وتعلم بعض القصص يتم المبالغه او الخطأ في نقلها ولكن المضمون هو الأاهم بعيدين كل البعد عن التجريح في حق الاجاويد ......... شاكر لكم المرور مرة أخرى .......... ودمتم

[عزيزقوم]

المشاركة الأصلية كتبت بواسطة العويلي الخالدي

كل الشكر للأخوان على مرورهم الكريم ،،،، الأخ العزيز عزيز قوم شاكر لك المداخله وانا نقلت ماسمعت من احد الشيبان الكبار اللذي كان جار أحد أبناء الظلماوي في الكويت ،،، وتعلم بعض القصص يتم المبالغه او الخطأ في نقلها ولكن المضمون هو الأاهم بعيدين كل البعد عن التجريح في حق الاجاويد ......... شاكر لكم المرور مرة أخرى .......... ودمتم

الاخ العزيز/ العويلي الخالدي

وانا بدوري اشكرك جزيل الشكر على الاخلاق العاليه وعلى تواضعك الراااقي

والاستماع لماطرحته عليك وهذا يدل على حسن ذوقك ..

علماً اني لم اطرح الاماسمعته من شيباننا ومؤرخينا الكبار

اسعدني ردك .. الله يعطيك الف عافيه ... لاهنت يالغالي

لك مني اجمل التحايا والاحترام