السلام عليكم ورحمة الله وبركاته
هذي قصيده كتبتها من كم سنه والقصيده فيها نوع من انواع تنسيق القصيد وبنائه وارجو ان تعجبكم
القصيده تقول :
أنا لاهاضت اشجوني تهيض بداخلـي لشعـار = واقـوم اجـزل معانيهـا واصفّيهـا وانقّيهـا
اسايسهـا وابنّيهـا واشطبهـا سـواة الـدار = وأثثهـا مـن المعنـى وازينـهـا واحلّيـهـا
أحضّر سبعة ابحوري على بالي واقوم اختـار = اشـوف اللـي يوافقنـي وألحّقهـا قوافيـهـا
احبّكهـا واسبّكهـا وانظمـهـا نـظـام ادوار = مثل نظـم العمايـر. لا تعالـت فـي مبانيهـا
اغمضّها وافتّحهـا واسويهـا علـى ماصـار = اغمّض فـي معانيهـا وافتّـح فـي معانيهـا
اسويها على كيفي واوضحهـا وضـوح النـار = واصعّبها واوعّرهـا بنفـس الوقـت واخفيهـا
وانا لاهاضت اشجوني نخيت بداخلـي لشعـار = تجي مع مطلع انفاسـي تلبّـي مـن يناديهـا
تلبّي بالطلب نفس ٍ عليله مـن كثـر ماأتغـار = من اللي تشهده عينـي بكـت لجلـه للياليهـا
بكت يوم القبايل . بعضها ضيّع سلـوم الـدار = من اسلـوم الشكالـه لـرّدا سبحـان واليهـا
غدت مع خايب الموضه كما قلص ٍ رديف حمار = قليص ٍ تتبع اجحوش ٍ علـى الخيبـه توديهـا
وانا من يوم شفت الجار غدا هم ٍ على ذالجار = وشفت خشوف ٍ امعفّه مع اردا مـن مواطيهـا
وشفت الوصل بالأخوه عديم وكل منهـم بـار = غسلت ايدي مـن الدنيـا بقاصيهـا ودانيهـا
وسلامتكم
الشاعر / سعود رتيبان الجويّر
10-10-2005, 02:46 AM
العرض العادي
