المجلس اللي به اسماعيل وسعيد=ينعاف لو قربه على القلب غالي
اسماعيل ماسمته سموت الاجاويد=وسعيد ماداجوا عليه الرجالي
غيالك الضمران والفرس ياسعيد= ياعل مالحميض الاطعاس والي
اخاف من قومن تجينا عراجيد=تبني على روس الندف له ظلالي
مابين شمطان اللحي والاواليد=تضيمنا ياسعيد بالاحتمالي
اخاف من اللي ينقلون البواريد=هل البنادق ميتمين العيالي
ركضاتهم ياسعيد مابه تصاديد=ذباحة الطيب نهار القتالي
اللي بدكلات السبايا سوانيد=ياما وقع بنحورهم كل غالي
ياسعيد لاتضرب على دارة الديد=بزرقاء تسل الروح بالاحتمالي
بديار فطمات البقر مغتر الصيد=ولاعندك اللي عن حوالك يسالي
ياسعيد هرجك به مغير وتراديد=وتوقر بالهرج الرخيص الجمالي
وهرجن على اكناف العذارى مناقيد=مايطيب الصبيان كود الفعالي
ذرب جوابك يافتى الجود ياسعيد=عن قولتن ياحيف سعيد استزالي
عميت بالسايه جميع القواصيد=ماقلت بالشعار طامن وعالي
عميت نمرن والمهادي وابا زيد=عز الضعن حبس الكمين الهلالي
ومشعان والطيار وعبيد ياسعيد=وعبدالله المسطور عز الاهالي
والعسكري وهديب ومصيخ ورشيد =وحسين حماي الركاب التوالي
وجمل وابن حثلين والفغم وفهيد=وعنتر ليامن اثقل الشيل مالي
وعرار وعميرن هل الكود والكيد=مخلين سرج الخيل ويالدوالي
ورميزان هو والعرفجي و الذي زيد=وساجر مسوي للهجين النعالي
وحطاب اللي بالصحن ينثر الغيد=وبريك محيي بالركاب الهزالي
وشايع مجفل بالفلاة المفاريد=وجارد ملفي بالشخيل الجلالي
وجديع خيال المهار المصاعيد=مودع مع الدعكول مثل العزالي
وصعب من الصيداد سقم الاضاديد=وبرجس دلال معبسات الشمالي
والاشمل اللي من مناه التحاميد=ومطلق مطبق بالغدير الزلالي
وجريس اللي كرمته كنها العيد=ابن سميراللي بقرن الشمالي
وابن دعيجاء اللي كمابيته الحيد=وسعودن بن سعود راع العمالي
ومغير بن غازي ونومان ياسعيد=زبن الحشور اليااعتلاه الجفالي
وحتى الشريف اللي تقولون ياسعيد=مع حاتمن معطي العطايا الجزالي
عشرين مع عشرين لاانقص ولاازيد=وافين من غير القصيد الفعالي
ياسعيد انا ثنواي دون الاجاويد=هل المصاحف متعبين الدلالي
اللي بهم ياسعيد صدرن وتوريد=وفهقن وتقليطن وقول وفعالي
والا انت مابك عند ربعك مناقيد=وانا بعد مثلك على قد حالي
وحنا عباتن مابباطه لواكيد=ولا قيل حنا بالدروج العوالي
وصلاة ربي عد ماهل من عيد=على النبي وعداد وبل الخيالي