اللهم صلي على محمد وعلى آله وصحبه وسلم
محمد فهد العرجاني
القلب حدته الطواري على اقصـاه
ياشينه ان حدك على الضيق حادي
ماهو على فرقى الهنوف الخونـداه
ولاّ تدهـور وضعنـا الاقتصـادي
لا والله الاّ شـي صعـب اتهجّـاه
لكـن بقولـه ياطـوال الايــادي
كان الله بعون الحـروف المقفّـاه
العود الازرق ضاع بيـن الـدوادي
والطيب مات ولابقى غيـر ذكـراه
يرحمك ربـي يازمـان المهـادي
وقتٍ بـه الطيّـب تعـزه مزايـاه
ماهوب وقـت مضيّعيـن المبـادي
واليوم جاه الناس كنّه نقـص جـاه
والسالفه مابيـن مهـدي وهـادي
أخترقو أنظمـة القلـوب المغطـاه
الله يعينـك ياشريـحـة فــوادي
ليلٍ سريته ياعرب طـول مسـراه
قمـت اتفكّـر فالمـدن والبـوادي
الجـدي كنّـا نسبـره ونتـقـدّاه
واليـوم ماكنـه لنـا كـان هـادي
ياقل من دلّـو وياكثـر مـن تـاه
واللي بدى بالطيـب ماكنـه بـادي
به شي يشرى وشي ياصعب مشراه
يشرى ولكن بالسيـوف الحـدادي
تبيع لك ناقه أو تبيـع لـك شـاه
أقطع ايديني ان قيل وين انت غادي
لكن منهو بـاع وجهـه وبرضـاه
هذا اللي وضعه وضع ماهوب عادي
صح السانك على الابيات الرائعه
كلها حلوة واكثر بيت اعجبني الاخييييير
تحيتي لك / مشاعر حالمه