[السياسي]

اهداء الى كل انسان مضيع الجاده في كلامه
ويتعلل بأن الخلاف لا يفسد للود قضيه
((حن هل السمرا))



اختلاف الراي مايفسد قضيه= قالها من قالها والقصد واضح

قالها اللي ودّه يخش الخطيه= مادرى انها فاضحه والراي فاضح

انت ياالواطي يابو نفس(ن) دنيه= لا تحسب انك علينا صرت ناصح

ولا تحسب افكارك العميا ذكيه= ولا تحسبك فارض نفسك وناجح

انت فاشل واسفل من الاسفليه= ولا انت كفو(ن) للملاقى والمناطح

وكان ردّت للعلوم الاوليه= للخيول وللسيوف وللمذابح

يشهد التاريخ مايشهد عليّه= يشهد التاريخ من كانو (جوارح)

الجوارح بالفعل والمقدريه= ماهي مثل مسلسلة((كاسر وجارح))

من يمانينا تذوب العنتريه= ومن يمانينا انعرف ويش المشارح؟؟

من يعادينا نورّده المنيه= مات...ولاّ راح غصب عنه سامح

السلامه من يمانينا هديه= ومن يعادينا خسى ماهوب رابح

يعني حنا في العصور الجاهليه= في الصداره وانت في الآخر تراوح

في المراجل مايسجل لك هويه= والظفر مالك معه اية ملامح

سمّها وان كان تبغي عنجهيه= من سواتك مانفع معه التسامح




((حن هل السمرا)) مطوّعة العصيه= من جعلنا ضد جاه الموت نازح

ومن يوالينا نعيّفه بخويه= بالظفر والطيب وعلاّق الذبايح

والشجاعه ((بالقبايل))سرمديه= والعوايل مثلها لبست وشايح

بالظفر نسمع لها علومن طريه= تنفع اللي قلبه يحب النصايح

ولاّ من مثلك مباديـّه رديه= مايصافِح للحقوق ولا يصافَح

انت كفّك ماضرى بمد العطيه= تكنز الدينار وتحوش المصالح

والرجل لا صار ماعنده حميه= مافلح دنيا ولا في الدين فالح

وانت والله مفلس(ن) من ذي وذيه= مانت صالح لاي حاجه منت صالح



الشاعر محمد فهد العرجاني

السياسي