شكرا اخوي الادوح على ذكر هذي السالفة اللي كنت ناوي انزلها في المنتدى
لكن انت سبقتني عليها .... واحب اضيف انه هذي البنت كانت تتميز بالجمال
الشديد جدا جدا جدا والباهر وقد كان مانع في سن الشباب والطيش وتعلمون لما
لذلك السن من احكام فاذا كان شابا واميرا وابن امير وفارس وشاعر فانه بطبيعة
الحال سينجذب للجمال ... وكانوا الصلب اللي هم الخلوات يتواجدون مشتتين
بين قبايل العرب وكانت هذي البنت الدقيس منهم وكانت شاعرة في نفس الوقت
وكانت تعلم ان مانع لم يكن قصده الا اللهو فقط ولها قصيدة مشهورة ايضا
راحت مثلا بين الناس حتى عصرنا الحالي فقد كانت شديدة الحب والتعلق في
مانع ولما علم الامير / نايف بن سويط اخو مانع بالامر امرها بالرحيل مع اهلها
من ارض القبيلة وهددهم بالقتل ان وجدهم في مكانهم غدا في الصباح فاضطروا
للرحيل وبعد ان ابتعدوا عن ارض القبيلة اخذت الدقيس ترتقي الهضاب لعلها ترى
منازل محبوبها او حتى تشم الهواء الفادم من ارضهم فطال جلوسها وافتقدتها
امها ولما وجدتها سمعتها تنشد قائلة:
عند الضحى عديت في راس عنقور=اشرف على راعي العلوم الدقاقه
ياونتي ياما بصدري من الجور=ونة ضعيف(ن) ضاهدينه رفاقه
ياياه شفي واحدن من هل الدور=هو عشقتي من ناقلين التفاقه
غديت له عوق وهو صار ثابور=والكل منا صار شوفه اشفاقه
فردت عليها امها قائلة :
برق(ن) مصد عنك لوكان به نور=بالك تخيله لو ربيعك شفاقه
فردت الدقيس على امها قائلة:
من لااستشارك لاتبدي له الشور=ومن لايودك نور عينك فراقه
وتقصد امها في هذا البيت
هذي حكاية الدقيس اللي اصبحت ابياتها مثلا يتناقله الركبان حتى وقتنا هذا ..
وبهذي المناسبة احب ان اذكر بعض المعلومات عن فارسنا / مانع بن سـويط
الامير والشاعر والفارس / مانـع بن سلطان بن فيصل بن ســـويط
من اشهر فرسان الجزيرة العربية وكانت له صولات وجولات وله العديد من
المعارك اللي شارك بها مع القبيلة ضد شمر وعنزة ومطير بب رشيد وكان زعيم
الظفير هكالوقت اخوه الامـيـر / نايف بن سلطان بن سويط ..
تلفي مضيف عيال نايف وسلطان=حمايل مادنقوا للدنافيس
بيت من قصيدة طويلة لشاعر الظفير الكبير / سند الحشار ..
وكان مانع بن سويط يملك مربط للخيل الاصيلة ويعرف المربط ب ( هدبـا مانع )
فكانت فرسه الهدبا من اشهر الخيل في الجزيرة العربية ومن قصائده فيها
أثني على التالي لاحيل دونه=أبغى إلا بعثوا بني لام داير
ولما ماتت هدبا رثاها بقصايد عظيمة وقمة في الروعة وموجعه للقلب وكانه
يرثي احد ابنائه ومما قاله في فرسه عند موتها
ونادوا لها قبارةٍ يدفنونه=ياخوياي نادوا لي بهدبا جنازه
المهم ان بطلنا هنا مانع بن سويط كان معاصر لدور محمد المهاد بن رشيد وكان
معروف عن بن رشيد حكمه وسيطرته على نجد في ذاك الوقت وكانت قبيلة حرب
من حلفاء بن رشيد وكانوا تحت حمايته ..وكانت الظفير على علاقة ود مع ابن
رشيد الا ان البطل مانع بن سويط لك يكن مهتما كثيرا لذلك فقد قام وغزا ومن
معه من ربعه على حرب وخذا منهم ابلا كثيرة
ولما علم ابن رشيد بذلك ارسل الى نايف بن سويط يطلب منه اعادة البل ..
وبما ان بن رشيد كان ودلة وحاكم في زمانه فلم يشأ الامير / نايف بن سويط
اغضابه فطلب من اخيه الفارس / مانع بن سويط ارجاع البل فرفض مانع وقال
انا اخذتها الضحى من النهار والعين تشوف واهلها مافتكوها والله ماردها
لهم الا ان ياخذونها بحد السيف ... فزعل من مانع بن سويط من اخيه الامير/ نايف
وركب ومعه البل اللي كسبها وتوجه الى ابن لامي امير الجبلان من مطير
وكانوا الاولين يعرفون قدر الفرسان والامراء لهم حشمة وتقدير .. ابن لامي
اهتم بضيفه الامير الفارس / مانع بن سويط واكرمه ودللهم وقام بواجبه الا انه
في نفس الوقت لايقدر على اغضاب بن رشيد فاضمر ذلك في نفسه وبعد فترة
من قدوم مانع على مطير سمع ذات يوم من بعض امطير كلامن بالخفية بينهم
وقالوا ان ابن لامي غلطان يومه استقبل مانع بن سويط ومعه ابل حرب
هالامر يزعل بن رشيد ولالنا حول في مواجهة بن رشيد ... المهم مانع بعد ان
سمع هالكلام وكان شخصا حساسا وذو شيمه فرأى ان يرجع الى ديار بني
عمه وعزوته واللي كاتبه الله يصير .. وان البل وخذت بالسيف ولاهوب مرجعها الا
بحد السيف وقام مانع بن سويط وقصد هالقصيدة
فاخيه الامير / نايف السلطان بن سويط
يا راكب من فوق حمر ردوم=فتر ظهرها من غريبات الأجناس
مرباعها بين الحجر والحزوم=ليا غدا من فوقها مثل الاطعاس
تلفي لابن فراج من عقب نوم=القرم ولد القرم قطاع الارماس
لياركب فوف حمرا قحوم=فكاك ذوده يوم الأرياق يباس
حنا ننحر اللي يحملون زوم=وليا حملنا زومهم ما بها باس
وحنا زعلنا بيننا بالخشوم =وعلى المعادي من حنيثين الأدواس
ورجال ربعي بالمجالس كتوم=والعقل وسط ربوعنا كيل بقياس
يتلون "نايف" مثل حر الرجوم=على رضيع الديد مسقينة الكاس
واللي ضرب بمخلبه ما يقوم=غلف عليه الطير فرخ وقرناس
ولما سمع بها بن سويط وبن رشيد بهالقصيدة عفوا عنه لان مانع فارس وامير
وخذ البل الضحى من النهار...
اما بالنسبة لذرية مانع فهم موجودين الى الان ويعرفون بالمانع من السويط
امراء الظفير وهو نصفهم بالسعودية بين الحفر والصفيري وبعضهم بالكويت
في منطقة الرابية والجهراء ومن احفاد هذا البطل الاتي :
1- العاصي بن محمد ال مانع ال ســويط
2- مانع بن محمد ال مانع ال سـويط ( وهو رجل كريم جدا جدا ويساعد الضعيف
ويفك ضيقة المحتاج وهو من اهل الخير ويسكن فالكويت )
ايضا هناك منهم فهد العاصي المانع
وخالد العبدالله المانع واخرون كثيرون
اتمنى اني وفقت في ذكر بعض خصال هذا الفارس المشهور والشاعر الكبير
الامير / مانع بن سلطان بن سـويط رحمه الله
وتقبلوا تحياتي
راكان الظـفـيري