[خطلان الايدي]

align=center]

السلام عليكم ورحمة الله وبركاته

هذه المعركة وقعت بين عتيبه والرجبان من الدواسر

وسبب هذه المعركه /

أن الرجبان كانوا نازلين في الديوث عند هضيبة الملعب والدواسر الباقين في المشاقيق
وكان الرجبان بقيادة الأمير مصري بن وثيله وكان به قحطاني قصير لمصري بن وثيله
وكان بين الرجبان ومحمد بن هندي بن حميد عمله واتفاق فأرسل محمد بن هندي الى مصري أنه يريد أخذ ابل القحطاني ولاأريد أخذها وهو قصير لكم فشددوه والا غزيناها وهو معكم.
فقال له مصري بن وثيله ابل قصيرنا ابلنا واللي يصير عليه يصير علينا .
فقال مرسول بن هندي بتشدده والا اقدع وجه الجمع فقال مصري الوعد لاجيتوها.
وكان به صانع جار للرجبان يقوم بالتجارة وصادف أن واجه عتيبه وعرض بضاعته عليهم فقال له محمد بن هندي مااحد بشاري منك لكن لاخذينا ابل عمانك عطيناك قيمة بضاعتك
فأرسل الصانع أحد عبدا كان معه الى مصري ليخبره عتيبه قادمين لغزوهم .
فلما وصل العبد وأخبر مصري جمع الرجبان وقال لهم هذا العلم وش رايكم ياجماعة فقال بعضهم أبشر بسعدك الوعد لاجاو وقال بعض اخر بنشد ونرحل ودار بينهم نقاش بين مؤيد للرحيل ومعارض طالب البقاء والتصدي لعتيبه ومصري بن وثيله ساكت ويستمع لهم حتى أتى الجهيمي على فرسه وهو ويحدو

/ويقول /

الروح له عند الولي حروس= مابه حدن قدام يومه مات
من كان يبغي المدح والناموس= ينطح وجيه الخيل لامن جات

تكفى يامصري لاتشد ويعتزي . فلما سمعه مصري وقف وقال أي والله مصري ونعم ونعم يالجهيمي شورك وهداية الله ياجماعه ترى مابه شديد واللي بيشد الله يستر عليه
وحط مصري الفنجال الأول وقال هذا فنجال محمد بن هندي فشربه الجهيمي وحط الفنجال الثاني وقال هذا فنجال سلطان بن محمد بن حميد فشربه سالم بن صلال المعروف بأبوضريس وحط الفنجال الثالث وقال هذا فنجال صلال بن حميد فشربه عبدالرحمن بن منصور بن وثيله.
ولما أصبحوا غاروا عليهم عتيبه وطَعَن الجهيمي محمد بن هندي وطعن سالم بن صلال (ابوضريس ) طَعَن سلطان ابن حميد ، وعبدالرحمن بن وثيله قتل صلال بن حميد ، كما قٌتل في هذه المعركة بجاد بن حميد حينما سقطت فرسه فسقط واندقت رقبته في الدبيره، وبعد ماحل بعتيبة ما حل أقفو وولوا هاربين .

فقال الجهيمي قصيدة طويلة لم أحفظ منها سوى بيتين وهي

كلــه لعيـنا نـازل المشقـوق=يوم استوى فينا الرجا والياس
الخيل راحت كنها في سوق= راحت( بضيف الله) مــع (عبـاس )

وضيف الله المذكور هنا هو ضيف الله العفار وعباس هو عباس بن حميد

.


كما قال القحطاني قصير الرجبان هذه القصيدة :

جاك بن هندي غاير بدوالي =وأقفوا عليه ودبرو ينحونه
لحقه رجال يطربون البالي= بأيمانهم عند القنا يروونه
عط الجهيمي(1) صفوة الفنجالي =وأبوضريس(2) سالم يثنونه
وعده لابو منديل (3)حامي التالي = راعي جواد في اللقا يطرونه
(صلال) خلي في البايل مالي=و(بجاد)ن اللي طاح ماينسونه
هذا جزيبه يوم جاهم عالي=من راس شلفا راح............

والمذكورين في القصيدة هم
1- الجهيمي الطوال الرجباني
2-وسالم بن صلال ال ثويمر المعروف بأبوضريس
3- عبدالرحمن بن منصور بن وثيله

(صلال) : صلال بن حميد
(بجاد) : بجاد بن حميد


وقال أحد شعراء الرجبان هذه الأبيات

غزانا (بن هندي) طامــع يتبعـه قيـــمان=وصار الطمع به عقب ماكان طمعاني
يبي ذود جار البيت ماخاف من الرحمن=ونعيا على ذوده سلاطين رجباني
غـزا طامـع فينا وعـود وهـو خســران=((((صوابه غميق ساطي بين الامتاني))))
عـود ذليـل هـارب منـكتـف زعــــــلان=وصار الطمع في خيلهم هي والابداني
خلــو بجـاد طـايـح ياكلـه سـرحـــــان=وصلال في الميدان بالدم غرقاني
وهذي عوايد لابتي من على الجــدان=الى من غزاهم طامع عاد خسراني
وقت اللقا نروي شبا مرهـف العــدوان=وهـداتنـا يشـبـع بهـا كـل جيعـــــانـي

هذه قصيدة قالها الشاعر/مبارك بن عيد ال سويدان القحطاني.

ابن عيد(ن) باد(ن) في حجا مابان=يالله لاتسقي مذب المراقيبي

ياراكب اللي كنها شامس العودان=عليها عيال(ن) يتعبون المطاليبي

تنحر رجال فعلهم في اللقا بان=يحدد جملهم دون حرش العراقيبي

ترى المرجلة كود(ن) وفازو بها الرجبان=تنشر لهم بيضا بروس المهاضيبي

تمالوا بفعل الطيب مامنهم اللي خان=فعلن صحيح سولفت به الاجانيبي

((حمو جارهم الخنفري ذاك بن خلفان))=((حموه وحمو شقحن زهن الدباديبي))

((في وسط نجد بالمشاقيق)) يوم شان= ((على محمد بن حميد عاف المكاسيبي))

غدو كنهم العارض مع مقدم الذيدان=حمو فطر(ن)سود(ن) عثانيها شيبي

يقوله فهيم(ن) يصرع القاف بالعنوان=يلعب بزين القاف ويرد ويجيبي

مدح(ن) على عز(ن) وطيب(ن) على برهان=هل المجد والناموس غصب بلا طيبي

والشاهد الله ثم تشهد به العربان=يسجل به التاريخ بيض المكاتيبي

المصدر : ال وثيله من شيوخ الرجبان اهل الوادي

ولكم فائق احترامي[/align]