السلام عليكم ورحمة الله وبركاته
انا بذكر السالفه الحقيقيه اللي اخطؤ في روايتها بعض الاخوان في منتدى الدواسر وهي بروايتنا
يقول الراوي غزوا الغييثات الدواسر بقيادة الشيخ بداح الحطيم غرب ويوم جاؤا ديار عتيبه لين الشيابين هم الموالين على (دلقان) احد الموارد في نجد .
شرفوا السبور وقالوا البل ياهل البل ويوم كدوا على البل وصفقوها (أخذوها)
لين عليها وسم الشيابين من عتيبه.
قال الحطيم: وطوهاا ، الماء خالي من العرب الحين ،وخلونا نشرب قبل تلحق الفزاع البل ذي بيجي لها طلبٍ عجل(يقصد الابل الماخذوه سيأتي أهلها فازعين).
ويقول الراوي انا الغييثات اخذو البل وقفوا
المهم انا انتوا يالشيابين يجي منهم واحد اسمه جهز شجاع ماينشق له اغبار حسب قول الراوي
ويصوبه ابن صليل الغييثي ومخطاه حيث الغييثات مايخطون الضريبه
وبعدها يجي احسب الراوي قال اخو هملا والمعروف انا اللي ماخذ البل اقل حماسه من اللي جاي يرجعها
المهم يرجعله واحن من المناديع ويقول الراوي انه زابن المنداع الغيييثي
ويعقر افرسه وتجي مره ثانيه وثالثه
بعدها قال زابن لخو هملا (( ثلاثي اركب خشبةٍ ونا بن غياث ولله لولا شحي بك ان تلحق ولدك)) زابن يظن انا شبنان قتل جهز بس جهز تصوب ومانقتل
المهم بعدها اللحقو الشيابين الغييثات واكثرت عقايرهم اي الشيابين الغييثات مانعقر منهم شي
وكان واحد من الغييثات اسمه (عايض ابن سلمان ابن جعمل المزروعي الغييثي )) حاطن
عينه على ناقه لخو هملا واسمها البويضا والبويضا هي الوحيده اللي الشيابين ماقدرو يردونها من الغييثات
وهي كانت اطيب انياق الشيابين ووسمها لذا الحين عند الغييثات المهم الشيابين ردو البل
بس ما اقدرو ياسرون واحد من الغييثات اللي اقدروا عليه هو فك البل
ويقول ابن صليل :
لحقوا هل البل مثـل وردٍ محيميـن
يومـن ولـد الاش طـارت ريايـاه
اختف جوفه يوم لحقـوا الشيابيـن
مايـدري ان خـلاق الأرواح ياقـاه
لحقو هل البل مثل دولـة سلاطيـن
من فـوق قـبٍ بالملاقـا مضـرّاه
وكثرة عقايرهم وكثـرو المثاريـن
ومنهم (جهز )شرقي( اذقانٍ )طرحناه
ويقول الشيخ الحطيم في الوقعه :
يالله يالمعبـود ياعـالـي الـشـان
تجعـل لنـا حظـاً نهـار الطـرادي
انا احمد الله يوم طيـر السعـد بـان
رحنـا بطرعـات العشايـر عنـادي
يشهد بها يومٍ على جـال ((دلقـان))
يوم (اخو هملا) جنب البـل وحـادي
و(جهز) طريحٍ من مضاريب (شبنان)
وعاداتنا بالهـوش جـدع العـوادي
وخمسة عشر منهن جواد( بن قطنان)
يقطعـك ياهـرجٍ بلـيـا وكــادي
((غييثيةٍ)) لامن عـلا الجـو دخـان
نرمـي وتالـي رمينـا بالـوكـادي
ماقول اخر شي بس انا الشيابين فكوا ابلهم من الغييثات بس ماقدرو الشيابين قتل احد الغييثات
وهذه الروايه اخذتها من المزاريع امس بالليل واتصلنا بشياب الغييثات الله يعطيهم العافيه ماقصر
وقالوا الحق الشيابين فكوا البل
تقبل تحياتي
ابو زيد الغييثي