لاصرت بايعني أشوفك على خير
مع السلامه دام مابه سلامه
قلت أنتهينا قلتلك خير ياطير
ماني بأول شخص يخسر غرامه
محذرك من قبلها ألف تحذير
لاعفتني بيعيف قلبي هيامه
ماني بميت لا ولا أحتاج تبرير
صح الله لسانك ووفر كلامه
بسمعك حبكه وفكره وتصوير
وأفهم عدل يامدعي بالفهامه
وجه الشعر ابيض ويحتاج تغيير
ودي تزين هالقصيده علامه
ماضيك الاسود بأذكره دون تقصير
كذا يكون بخده الشعر شامه
يصدق معي تعبير ويخون تعبير
ياضيعت الشاعر بوقت أنسجامه
يمكن خطا أدونك بالشعر مير
لو ماحترمتك للغرام أحترامه
ماكان حبك غير بس طعنتك غير
علمتني معنى الندم والندامه
ماجاك مني اي زله و تقصير
كل مأخطيت أعاتبك بأبتسامه
حسبي على الذكرى أذاهبت عصير
ماعاد تنفع شرهتي والملامه
البال ضامي وقتها والحزن بير
خسرتك وهمي كسبت أهتمامه
والليل فازع لك كذا جاني مغير
ظلمتني وأكثر ظلمني ظلامه
لاقبل علي اوحيت صوت المسايير
وفزيت كل ضيف(ن) اقوم بمقامه
واليا عزم هاالليل ضيقه وتفكير
قللي بربك كيف أبقدر أنامه
مافيه داعي للعتب والمعاذير
الغدر خال الجرح وأطيب عمامه
اما يجيب الله مطر تالي وخير
ولا السلامه ماش مامن سلامه
وسلامتكم