الا يازمانٍ ساد فيه الجفا والبين = مابين الرجال اللي عريبه مجانيها
نشوف القطيعه والقرابه ماهم صافين = وكثر التفرق والعرب وش حصل فيها
وفي كل ديره يوجد اثنين متعادين = وهذا يولعها وهذا يصاليها
غشتك الملامه يا مقصر معا الادنين = تجنب رضاها والبعيدين ترضيها
من يقفي من المقبل ويطرد ورا المقفين = يروح العمر كله يبيها ويخطيها
واليا صار ما قدرت ربعك وهم حيين = ما ينفعك لمن راحت الصبح تبكيها
لا قفت ندمت وقمت تذرف دموع العين = لو ان الندم والدمع ماهوب محييها
ومصيرك تحط بحفرةٍ ما تجي مترين = وسيرتك تبقى والمخاليق ترويها
وصدوف الليالي مابها يمكن وبعدين = وسنين العمر ماهي على كيف راعيها
يدور الفلك والخلق عن دورته غافين = تشوف الآمل قدام والموت قافيها
الشاعر خليل بن هدلان