[محيط المشاعر]

سجد قلبي على رمل الضلوع وهزه التنهيد
وأنا في جوفي خيام الندم والخوف منصوبه

يارب أفهق هلاكي والمنايا والدروب بعيد
ما دام أن النهايه للتراب وخافي دروبه

يا غيّاث الظوامي والثمام وجرهدي البيد
أعذني من جهنم والحشر والموت وكروبه

أنا ما نيب لا مشرك ولا فاسق ولا عربيد
أنا اللي لا عصى وأخطأ تجهم وأقلقه ثوبه

أنا اللي يرتجف مثل ارتجاف الخايف الرعديد
إذا شاف القبور الضيقات وحس بذنوبه

أنا عبدك ولد عبدك وجدّاني هل التوحيد
خطاياي أخجلتني يالله الغفران والتوبه

أنا الإنسان حمّال النقايض والكمد والكيد
غريق النفس واللذات من راسه لعرقوبه

أنا عبدك يا ربي وأنت تفعل ما تشاء وتريد
سألتك يالله العفو العظيم وهيّن دروبه