بسم الله ابدا عبرتي والتعاليـــــل **** على شباب ضايع في دروبـــــــــــه
أبكيه رجل مايسوق الفناجيــــــل **** رجل يساوي مايساويه ثوبـــــــــــه
لاشب ضوه ولا انثنى للمعاميـــل **** ولاروحوا طرش المسايير صوبـــه
آخر همومه زينة الشكل تجميــل **** مثل العذارى لابدن بالخطوبــــــــــه
شباب فارغ كنهم والتماثيـــــــــل **** مثل العجاج اللي غدا في هبوبــــــه
والسوق بذه طاول السوق تطويل **** حتى بلاط السوق يعرف عيوبـــــــه
وازعج بنات الناس ياجعله الويل **** بارقام واجد خشها في جيوبـــــــــــه
وان طاعته بعض البنات المهابيل **** يضحك عليها بالحكي في عذوبــــــه
صور لها عشقة كبر شاطئ النيل **** والقصد بيّن والنوايا لعوبــــــــــــه
تكفون عودوها سلوم الرجاجيــل **** الجود والنخوة صفات العروبـــــــــه
عوايد عاشوا بها جيل مع جيــــل **** ودرب الخساسه عمرهم مامشوا به