على طاري الوافد ومعاملتنا له . .
قبل شهر كنت مسافر . . وقعدت الصبح مبكر جدا . . احترت وين اروح . . قلت خلني اضيع !!
نزلت محطة المترو وركبت القطار . . وقلت بوقف عند المحطه اللي يعجبني اسمها !!
حدي تشيير 
المهم . . بعد كم محطه نزلت في محطه ما اعرفها . . ونزلت افتر بالشوارع . . اول مره اشوفها . .
امر المحلات . . مسكره مافتحت !! القطار كان مليان بس الناس رايحه لدواماتها . .
بعد ما مشيت مسافه طويله . . شفت بقاله مفتوحه . . دخلت . . قلت اطقطق شوي . .
ولاحظت البايع يطالعني بنص عين . . عقب شوي . . قط كلمه سريعه يبي يجس نبضي . . !
قال : سلام عليكم !
رديت بإبتسامه عليكم السلام !! . . قال عربي ؟ قلت نعم . . من وين ؟ من الكويت . .
المهم ان الشخص طلع باكستاني لكن يتكلم عربي بطلاقه . . سألته من وين اكتسبت اللغه ؟
قال انا اصلا 10 سنوات من عمري في الخليج . . توني جاي بريطانيا مالي إلا ست شهور . .
سألته ليش ياخي ؟ العيشه بالخليج ارخص بمليون مره . . وهنا الحياه نار . .
رد علي بجمله قوية ماتوقعته يقولها . . قال انا بعت الحياة السهله بالخليج . . واشتريت كرامتي !!
عرفت وش يقصد وابتسمت . . قلت له صحيح انتو والهنود والبنغاليه . . في بلادنا مالكم كرامه . . للأسف . . والكرامه للاشقر والذل لكم . .
عدد لي مزايا في الخليج . . يقول الكولا اللي انت ماخذه بسعره اجيب 8 علب في الخليج !
هذا الرخص . .
الخوف من العصابات والحراميه . . مو موجود في الخليج نهائيا الأمان بشكل ملفت بالخليج . .
هذا الأمان
العلاج بالخليج مجاني . . وفي بريطانيا مكلف جدا . .
هذا العافيه
الأكل . . كان يوصلنا من الخليجيين ولائم مجانيه يتصدقون فيها علينا . . يعني حتى الأكل شبه مجاني !
هذا المعيشه
السكن . . بالخليج ارخص من بريطانيا بعشر مرات !!
هذا المسكن . .
لكن ضحيت في كل هذا . . علشان كرامتي . .
في بريطانيا . . انا والمواطن البريطاني . . سواء مابيننا فرق ابدا في كل شي . . ابتداء بالقوانين وصولا لطوابير المخبز . . اللي في الخليج كان يجي الخليجي ويصف قدامي بدون حق علشانه مواطن بس !!
وفي الخليج . . يجي طفل يضربني . . وان تكلمت بس . . جاني ابوه ضربني وان رديت . . مسكوني الشرطه وأهانوني حتى لو ماكان فيه شي قانوني ضدي !!
بإختصار . . اللي استفدته . . ان الشخص الطبيعي يقدر يعيش بوجود نقص في كل شي . .
إلا الكرامه . . مايقدر يعيش بدونها إلا . . ذليل !!