[عبرة وداع]

انواب ابـي بعـدك ونـوب اتمنـاك
وانواب اقـول الله يجيـب المواصيـل

ليتك سهل واحضى بقربـك ولامـاك
وليتك تكون ابعد من الجدي وسهيـل

لاشك ابي قربـك واقـدرك واهـواك
ولا شك ابي سترك عن النقص والميل

أي والذي كمّـل جمالـك وسوالـك
اللي جمع في وجهك الصبح والليـل

أي والله احبك من اقصـاك لقصـاك
حب(ن) له بقلبـي دروب ومداهيـل

يكفيك مني كل مـا احـاول انسـاك
اذكـرك وانسـى ماتقـول العواذيـل

ما شفت فيـك إلا البيـاض بنوايـاك
ولا بان منْـك إلا جميـل التفاصيـل

ما بيننا وصل(ن) مع الناس يشنـاك
حشـى ولا بينـي وبينـك مراسيـل

غير القصيد اللي من الشوق ينصـاك
من هاجسي كنه صـدوق الهماليـل

شعر(ن) يخلـد ذكرياتـك وطريـاك
ماهو قصيد مجمّـع القـال والقيـل

لا تحسب انـه صـوب ذولا وذولاك
لا والله انه فيـك يـا نافـل الجيـل

عليـك تغرينـي بـنـادر مـزايـاك
وعلـيّ اضخّـر نـادرات التماثيـل

وان حالت ايـام العمـر دون لقيـاك
يبقـى لـك بقلبـي دروب ومداهيـل



نايف الهفتاء