[خالد بن نفل]

ياصاحبي رح قلها ترحـم الحـال
وانا بشر ماني عن الموت مصيون
رح قلها مسفر لو البعد بـه طـال
يمكن يعود تالي الوقـت مجنـون
لتقول لي هـذي سواليـف جهـال
واسمع كلامي للنهايـه ولا تهـون
بعض الغلا ما ينوصف لك بالأمثال
لانه من السبع العجايب على الكون
وبعض الغلا ودك من القلب ينشال
لانه فضيحه ويجعل الناس يـدرون
بعطيك نبذه عنهـا يـوم الأجيـال
قامت تهذري بزينها وسط العيـون
بنتٍ لها في مشرق الحسن تمثـال
وفي مغربه تلقى العذارى يسمـون
وفي عيونها تسعه وتسعين خيـال
كنهم على حوض المنايـا ينـادون
وفي كفها من صافي العشق فنجال
لو ما شربته عود الحال فـي دون
وإن جيت للمبسم بجاوبـك بهبـال
أهل المناحل صاروا منها يغـارون
والخد لامن شفت به حبـة الخـال
تقول سبحان الذي صـور الكـون
وش جاب ربيع أول مع شهر شوال
أبسألك دام البشـر مـا يعرفـون
تكفى يخو صيته ترى البعـد قتـال
وأنا عجزت أردد إبليـس ملعـون
رح قلها إن ما رست لي على الجال
ولا ترى نادوني النـاس مجنـون