.
ديرها مغنى .. ترى صاحبك راعي هجـوس=شاعرٍ لا ضاقت الأرض فـي عينـه .. قِصـد
،.،
طّول ليّل التغلي .. وطـال بنـا الجلـوس=يا تـرى إثمـلـت فناجيلـنـا .. ولا بـعـد !!
،.،
سالفتنا عجّزت ... وإنحنت ما هـي عـروس=إحملت عشريـن مّـره .. ولا جابـت ولـد
،.،
ثوبها يستحضر اللون فـي كـل الطقـوس=جاهز للضحـك الأزرق .. وجاهـز للنكـد
،.،
كان عندك كذبة ٍ ما تعّريهـا الشمـوس ؟؟=خلنا نبني بها .. في مدى الصحـرا .. بلـد
،.،
غيرنا يبني مدايـن .. علـى روس الطعـوس=وإن سألته .. قال الإنسان يُخلق فـي كبـد
،.،
حلمنا مقتول ... والقاتـل إيمانـه غمـوس=أي حلمٍ نرتجي فزعتـه .. وأيـة وعـد .!!
،.،
كل عام .. من أوله نشعـل الظلمـا دروس=والغريب إن أخر العام ( لم ينجح .. أحـد )
،.،
لــ / التفاؤل وجهك المنتظر .. وجهـه عبـوس=مثل وجهك .. ما على نظرتك فـال السعـد
،.،
من زمان .. ( ونحلتك ) هايمه بين الغروس=لجّت الرمان .. من شان تجمع لـك شهـد
،.،
مشكلتها .. حظها يشبـه لــ / حظـك نحـوس=كلما جّت عين زهره .. لقت فيهـا رمـد
،.،
شجرة الحظ إيبست .. عودها مليان سـوس=لا تـداوي يا مـداوي ... ولا تشكـي لـــ / أحـد
.