[العيطموس]

ما دريـت أنّ القلـوب العاشقـه حساسـه
لين من وثـقّ قيـادي حطّنـي فـي كمّـه
شالني والحـب ذعـذع وأحتمـى نسناسـه
والعهـد بينـي وبينـه مـا تبـور الذمّـه
واحد ٍ طـوّع عنـادي قبـل أليّـن باسـه
والجـوارح كلّبـوهـا بوصلتـهـا يـمّـه
أتجمّـد فـوق صمتـه وأحتـرق بأنفاسـه
وأتبخّـر مـن هيامـي وأنـثـره وألـمّـه
كل ما ابلش فـي علـوم عيونـه النعّاسـه
أتغـزّل فيـه وأسـرق كلمتـه مـن فمّـه
والكلام اللي في صدري لو تـدقّ أجراسـه
حرف حرف أحسب حسابه قبل أجيب مطمّه !
أمتحنيّ فـي غرامـه ميـر يسلـم راسـه
يكفـي أنّـا فـي المحبـه معتليـن القمّـه
جلّ من خلاّه يفـرق عـن جميـع أجناسـه
ما يرجّـح ثقـل عقلـه غيـر خفّـة دمّـه
مـا تقـول إلاّ مدبّـس قلـبـي بكـراسـه
عقب ما سجـلّ عليـه ملاحظـات مهمّـه !