عندما يجتمع الواقع مع خيال الشاعر
تحدث اشياء لايعلمها سوى الشاعر نفسه
الصمت وهو بحد ذاته باب من الخيال الواسع
اضع بين ايديكم هذه المتواضعه
ياشـارد التفكيـر والـسـر مخفـيـه
بين العيـون وبيـن صمـت الشفايـف
سارح ولايـدري عـن اللـي حواليـه
وش كـدر المجمـول زيـن الوصايـف
مـادام ربـي كامـل الحسـن معطيـه
وخـلاه يدلـه فـي جميـع المصايـف
حسبي على اللي حط لون الحـزن فيـه
لوكـان ماشـاف بحيـاتـه كسـايـف
بانـت علامـات التـرف مـن اياديـه
اكيـد مــاذاق التـعـب والكـلايـف
والله.. واعلـم فيـه حــبٍ معنـيـه
وياكثر ما بالوقـت مـن حـب زايـف
وقمت اتصـور لـو زمانـي مخاويـه
مـن صغرنـا باللعـب دايـم ولايــف
افـرح بشوفـه وافتخـر عنـد طاريـه
واهديـه قلـبٍ بالضلـوع النحـايـف
واعيش عمري بـس اطيعـه واداريـه
واصنع لـه البسمـه بحلـو الطرايـف
ويوم انتبه ثـم شـاف عينـي تراعيـه
حانـت نهايـة جلسـتـه ياحسـايـف
وقام.. وتبسم .. وانحرف .. واشغل يديه
يضفـي بـثـوبٍ علقـتـه الـردايـف
واقفى كما حلـمٍ سكـن قلـب راعيـه
يبقى مع الذكـرى ولـو كـان طايـف