السلام عليكم ورحمة الله وبركاته
اليكم جديد الشاعر عبدالله بن عون ..
امل ان يحوز على رضاكم
ياللي تسوم الوضح ماهيب للبيـع=اللي يوسـع خاطـري لاتسومـه
دور وتلقى البيع عنـد الطماميـع=اللي تصفـي كـل يـومٍ بيومـه
ويش اتسلا بـه ليـال المرابيـع=لا نـاض بـراقٍ ثقـالٍ غيومـه
لاقالوا الحاشي علـق فالطواليـع=والسيل عساسه عطانـا علومـه
بين اهجر العجمان ومطير وسبيع=عشبٍ تفتـق للعشايـر كمومـه
عشبٍ يجيله فالمسـارب تناويـع=من قطف زملوقه ماهيب امحرومه
نبـي نخليهـا تـذب المخـاويـع=ونقدالها مقهورهـا فـي يمومـه
من قصر ابن ملحم معش المجاويع=اللي تسابـق للفضيلـه عزومـه
من سيرته فيه المدايـح مطاويـع=ومن يمدح الممدوح مااحدن يلومه
للبال عنده كل ماضـاق توسيـع=الله يوسعلـه ويبـطـي بيـومـه
يفدونه اللـي ماوراهـم مطاميـع=جندن طرايقهم ماهيب امهضومـه
نوعيتن مامـن وراهـا منافيـع=تجار لاشـك اليديـن امحزومـه
وضحٍ بعد مقياضهـا فالمشاريـع=ماشط من بعد المعشـى تهومـه
لاروحت مثـل البنـي المفاريـع=وعيالها خلف الرحول امحكومـه
تنسف على ايسرها خشوم الترابيع=والعتش الاول تنزعج مع ثلومـه
ناخذ من السجات معهـا قراطيـع=لين امهموم القلب تذهب همومـه
تطرق عمايمنا هبـوب الذعاذيـع=ونلقى حياتٍ فالقصـور امعدومـه
لاقربت صفـر الـدلال المهانيـع=وغدابهن لمخلط الكيـف عومـه
في خايعٍ فيه الزبيـدي مصاليـع=والربل والملاُح كاسـن احزومـه
هذا هوى بالي وبـاق المواضيـع=النفس عنـه مقيـده وامخزومـه
والرابح اللي مدركن ذبـت الريـع=وله سمعتٍ عند الرجال امحشومه