حان الوداع ولوح الوقت بفراق
يكتب على التاريخ صفحة وداعه
مات الامل ما باقيٍ غير الاشواق
ذكرى المولع بس باقي متاعه
ليته بقى في سكرة الحلم مافاق
ولا شاهد المركب تقطع شراعه
ووانس حرارت ونته جوف الاعماق
من عقب ماضاعت عليه البضاعه
دمعة حزن عينه على الخد تنساق
مثل الطفل صابه على الإم راعه
ياقلبي الصامت بك الشوق حراق
ثقيل وادري كل ثقلك صناعه
والا الحقيقه اعرفك دوم خفاق
يم التي تسوى جميع الجماعه
ضاق الفضاء والارض والفكر بي ضاق
نور الامل والحب طافي شعاعه
يازين ياللي صرت للقلب سراق
على فراقك ما قدرت استطاعه
منزلك في روحي وقلبي والاحداق
منزل على غيرك بعيد ارتفاعه
ما احداً ترى غيرك من الحب لي لاق
انت الوحيد اللي له القلب طاعه
ذقتك وصرت الذوق من كل الاذواق
ذوقي ولا غيرك لقلبي طماعه
بس الزمن ياصاحبي صار لي عاق
كنه موصى بيننا بالقطاعه
هدم عماير حب ثم فرغ اسواق
وشمل المحبه ما يريد اجتماعه
ادعي لك الرحمن يازين باوفاق
يكتب لك التوفيق في كل ساعه
ويستر عليك ويرزقك خير رزاق
وانا على فرقاك مابي مناعه