الســلام عليكم
بعد غيبة طويلة عن هالقسم المحبوب , رجعت بـ آخر قصايد هالشاعر المبدع
عسى ان ترتقي لـ آذواقكم
،
،
يابنت ياللي تبيعين الكلام=عينٍ ماترجيك لا ترجينها
منادمات المشاعر والغرام =صرفت عنها النظر من حينها
لعيون بنتٍ ليا حل الظلام=يسري غلاها على مغلينها
هيفا خواصر .. وممشوقة قوام=ما الله عطا قلبها من لينها !
لاعرضّت ماعليها الا اللثام=وأرخت هدبها ولدت عينها
خلت قلوب البشر مثل الحمام=يوم يتطاير تحت رجلينها
،
،
لو ان هدبها رصاصٍ في حزام =ماعوّدت لين تقضي دينها
واليا استدارت مثل ريم العدام =اللي اتلفت تحك بطينها
كنها من العام ماذاقت طعام=من فلسفتها ومن تكوينها
ان عوّد الغيم قالت : للامام =وان بانت الشمس قالت : وينها !
،
،
وان طبت الحفل وعيون الانام =مواكب .. يسارها ويمينها
تمشي من التيه كن بيض النعام=يحول بين التراب وبينها
من البدايه إلى مسك الختام =مافيه زينٍ يضاهي زينها
حتى المليحة مطيّرة المنام =اللي على اوّل ربيع سنينها
يازينها فالبيوت وفالخيام =وان وقفت جنبها ( ياشينها )!!
،
،
مثل انبهار الاناره فالرخام =تماوج الحسن في خدينها
اختينها وامها بدر التمام =وان جات بين امها واختينها
تفرق بخشمٍ محلّيه الزمام=من صنع ربي .. وصنع يدينها
ياعاذلين (اخذوا من العمر عام)=وخلوني اموت بين اثنينها
أوّل بشر قال للدنيا : سلام =(اللي بدينه يكمّل دينها )
وســلام 
للمبدع دائما / مطلق بن شويه