يا زين يكفيني تعب يكفي إرهاق
الحال والله ما عليها لحايق
توعد مواعيد السعادة ويشتاق
قلبي لميعادك واعد الدقايق
أجلس على شانك ليا وقت الإشراق
على الوفا بيني وبينك وثايق
وإن كنت صادق بالمشاعر والأشواق
ما هي علوم تدّعيها لفايق
خلك معي واضح ترا خاطري ضاق
ماني لتكرار المواعيد فايق
يا كثر ما ترسل علي من الأوراق
والوصل من دون الورق له طرايق
وإن كان حبك ما صفالي بالأعماق
ساعة تروق وساعة مانت رايق
يكفي تردد لا مواصل ولا فراق
دون المواجه ما تبين الحقايق
غيرك صحيح يجوز يحرج وينعاق
وإلا أنت والله ما تعوقك عوايق
لكن نويت تصير خاين وبواق
عهد الوفا ما ينقضه غير بايق
وأنا ورا البواق والله ما انساق
لو كان جامع زين كل الخلايق