يادحيم روحي على الصمان ولهانـه=في رقةٍ يابو فايز في الخلاء الخالي
أشوف عشب الخزامى زانت الوانـه=رزقٍ رزقنا عظيم الشان والوالـي
البر يجلي هموم القلـب وأحزانـه=انا أشهد إنه دواء قلبي وغربالـي
الخير جانا وسالـت كـل شعبانـه=من مزنةٍ سيلـت والسيـل همالـي
والارض صارت من الأمطار مليانـه=والعشب زهر وصار الوان وأشكالي
والكل نفسه بشوف الروض شفقانه=يمشي ويضحك وكـلٍ دالـهٍ سالـي
والبل ترعى وتسرح بين فيضانـه=عقب الربيع أصبحت تمشي وتختالي
ودعت ربعي ومنزالي علـى شانـه=ومسكت خطٍ حوته رمـال وجبالـي
سكنت وسط الخلاء والنفس فرحانه=في قفرةٍ ماوطتهـا رجـل رجالـي
وحمست كيفٍ يِشوق الراس فنجانه=ودقيتها وسط نجرٍ يذهـل إذهالـي
وحطيت أنا بهارها وأحكمت ميزانه=وصبيتها وسط صفرٍ تبري الحالـي
ياليتنـي ساكـنٍ مابيـن ريضانـه=وأنسى المدينة وأعيش العمر رحالي
كتبت بيت الشعر وأبدعـت قيفانـه=ونظمت لك يالسنافي بيوتٍ إجزالـي