غيبتك لو هي دقيقة تعتبر صدة@@الوقت دونك سجن وغيابك اسياجه
لاتعتذر لي ماعاد في شدة@@اعيد حكي يكود الصدر مخراجه
دامه يوصف بجود ابيك وبجدة@@وشلون تبخل على المجروح بعلاجه
وشلون قاواك قلبك رده وصدة@@مع انه بين عليه الضعف والحاجه
ياقو قلبك برد يمينك وردة@@بخلت بمصافحة وارهيت بحراجه
لو ماسقى غيم عينه جرهدي خدة@@تراه يبكي وقلبه يلحق خلاجه
ولو شفته يمازحك تراه من جدة@@الضحك عن درب ضيق الصدر ماعاجه
غير الغلا والوله عليك وش حدة@@يادرب ليله ويامسراه وسراجة
كنه يعرفك قبل يلقاك من مدة@@مع ان مابينك ومابينه مواجه
هواك بدو(ن) نووا للقلب بالشدة@ورياض قلبي لشوف البدو محتاجه
والوصل بحرن متى انت بتسمح بمدة@@السيف صبري والبحر شح بامواجه
قصيدي اللي قريته واللي اعدة@@قديم لايزعلك معناه واخراجه
وفراغ قلبي غلاك وارهى على سدة@@ليتك تشوف الغلا وابراجه وعاجه
اقوى رياح العذل ماتقدر تهدة@@والا الجفا لو تنفس هدم ابراجه
تغانم الوصل لان البعد لابدة@@ياتيك في يوم ثم ياخذك بادراجه
اللي لي انك تلين وتترك الشدة@@واللي لك اني ماسولف بك لهراجه
ولاني بزعلان واللي نرتجي مدة@@ياباب قلبي وياقفله ومزلاجه
زعلة تغلي ومن تزعله من قدة@@مادام كلن يبي دربك ومنهاجه
غالي وتبخل علي وتطول الصدة@@الله يسامح غلاك ويلعن الحاجه
وسلامتك
اتمنى انها تنال ع اعجابكم