[ولد المرازيـــق]

اقدم احدى قصائد المبدع الشاعر سالم ابن جخير

واتمنى ان تنال على اعجابكم


العمر محدود ولاّ الوقـت لـه دوره
وانا الى الحين واحزاني هي احزاني
-

والوقت لو جار ماهتميت من جـوره
بدري على الوقت يامرني وينهانـي

-
شفني هنا والنجوم هنـاك منثـوره
ان كان ماطلتهـا مانيـب عرجانـي
-

شاعر واحب الشعر واغوص فبحوره
كن القصايـد تعزوابـي وتنخانـي
-

والشاعر اللي لا غنّى يقفد شعـوره
يستاهل انك تجي لمشاهـده عانـي
-

والجادل اللي معي بالصوت والصوره
تاقف على بـاب فكـري ماتعدانـي
-

كنهـا تـردد بعـون الله منصـوره
وكنها تغذا علـى دمـي وشريانـي

-
احيان فيها عقل واحيـان مطيـوره
واحيان تخطي علي وتقول بلعانـي

-
تضحك على لهجتي لاقلت ماجـوره
والحين صـارت بلهجتنـا تحدانـي

-
ماهي على الوصل ملزومه ومجبوره
تقرب وتبعـد وتذكرنـي وتنسانـي

-
تقول كان الغلا في جـوف سبـوره
قم اكتب اسمي غلا ولاّ قم امحانـي

-
لبّى الغـلا يابرنسيسـه ياسنيـوره
امن الغلا ماذكرت اسمك على الساني
-

اخاف مـن واحـدٍ لادق لـي زوره
قدام عيني والى من رحـت يقفانـي
-

يامطلعة شاعر الابداع عـن طـوره
الى متى والخطـا منـك يتمثنانـي
-

تخطين واسامحك واقـول معـذوره
اروح فيها لمن قلتي علـى شانـي

-
القلب بستان وانتي اجمـل زهـوره
مايقطفك من خفوقـي واحـدٍ ثانـي

-
تربّعي دام لـك فالقلـب مقصـوره
والله ماانسى غـلاك ان الله احيانـي