مســّــاكم الله بالخيــّـر.. توني طالع من الدوام .. مرور على الجرايد اليوميـّه .. مابه شيء جديد كلها ابو بنغـل .. وتظاهراتهم * * بتكلـّم عن الطفـولهـ اشوي .. بس بأختصار .. لأنه اعتقد مانيب امريكي او اوروبـّـي يعني الجميع او البعض الكثير .. عاش نفس الطفوله كانت في العفجـه ( ع قولة بعض البيبل ) كانت الطفوله .. دراسه الصبح .. ولعـب باقي الوقت كلـّه كانت كل طموحاتنا سهله .. ونحقـّقها سواء بالحلال أو بالحرام !! أحس اني لو اتكلم عن الطفوله .. ما راح ارضي نفسي !! عشان كذا راح اخذ مقتطفات قصيره جدا .. أول ما ركـّبوا التلفونات وقعدوا يحفـّرون .. كنـّا طبعا نستغلّ الخنادق والحفر ّ للـّعب .. مهربه والدوريـّه .. والخ الخ من الألعاب اللي ناسيها ذلحين . وعلى طاري التلفونات .. أول ما ركـّبوها .. اذكر كان الازعاج مشتغل على ودنــوووه في الوادي !! الداهيه اللي يعرف فتح خط قريه العليا كمّ؟ والا الخفجي والا النعيريه !؟ هذولي كانوا المناطق اللي نقدر نزعج اهلها .. لأن باقي العفجات (الهجر) ما كان فيها خطوط هواتف ! أذكر مرّه.. كنـّا مجتمعين القايله عند احد الشباب الله يذكره بالخير .. وكنـا مستلمين التلفون .. ازعاااج على خلق الله .. بس كذا مانبي شيء ؟ مهوب مغازل ؟؟ لاء بس عبـط .. ويستلمنا ذاك الواحد اللي ازعجنا كل اشوي يدق ولا يتكلم .. المهم وقبل ما يدق هذاك بثواني .. قلت له : لا دقّ .. قل أنت فلان !؟ اورّيك أن خليـّتك !؟ فـ اول ما دق هذاك .. قال صاحبنا : يافلان اورّيك .. تحسبّ اني ما عرفتك ؟ هذاك وبكلّ براءه مدري دلاخه مدري وش .. قال وبضحكة واحد مستغرب : هـهـهـااا .. ابو فلان .. وشدراك أنـّه انا !!!!!!!؟ ياحبـّي له احسّ انه بيدخل الجنـّه من برائته الزايده .. (استغفر الله ) . * * أذكر مره كانت لنا مباراة كورة قدم مع فريق النعيريـّه .. رحنا متحاشرين على سيـّاره وحده والمدافعين والوسط والحارس في البدي .. ! والهجوم داخل الغماره فـ إثناء المباراه .. كانت فيه سيـّارات مغيـّمه وسوبرات .. جانا واحد طايش . يقول : يالربع ترى اكثر ذالسوبرات بنات النعيريـه يتفرجون على المباراه !! حنـّا سمعنا ذالحكي والا ما سمعناه !؟ كل واحد قعد يحارب ويقاتل .. وهذاك يطـيـر والثاني يززززززحلق بقووه .. وذاك لا جاته الكوره يتأنـّن ولا يناول ويسوي حركات .. يعني بالعربي ..فريق النعيريه كانوا ضامنين الفوز علينا وبسهوووووله !. بس تفاجأوا ذاك اليوم وش ذالفريق اللي قدامهم ؟ استبسال غير طبيعي .. وقتال على الكوره .. انتحاريـّين .. الرجـّال ما يمغط ظهره بالكوره !!؟ ترى لعبنا وحماسنا هذا مهوب حبّ في البنات أو كذا !؟ لاء ,, لاء ,, كانت بـ برااااااءه وانا ازكـّيهم (ولاازكيهم على الله ) انهم كذلك .. اتذكر ذالموقف كل ما شفت لقطة الشيخ فؤاد بن بطـّاح .. يوم مرته تفرّع توّه .. وهو متحمـّس موقـف آخــر .. اذكر عاما الأول .. (ربيع2007) كنـّا في السدريـّات .. ومعنا شباب من اهل الكويت (حضـر) جايين من رياض نجد خريم وتنهات وغيرها . . ومّروا علينا وخيـّموا في السدريـّات .. ذاك اليوم رحنا للـ قلتا .. اعتقد احد الشباب مدري والله منهو ذلحين .. كان حاط صورها في المنتدى . فـ رحنا نبّي نورّيهم أيـّاها .. يوم قرّب المغرب .. وقد معنا صلاه .. كلنا ندخـّن الا واحد معنا .. عجبـه .. مع انه مهوب اكبرنا لكنـّه كبير اشوي .. يوم حولنا من المواتر الا هو يكلـّم تلفون .. وتلفونه ابن الحلال ما يبرد !! المهم .. أقمنا الصلاه .. تقـّدم هو للأمـامه .. ويدقّ تلفونه .. ويحطـّه عالصامت .. يوم جاء يكبـّر .. رفع ايدينه للتكبير وقال ( آلـــــوووو ) بمدّ الواااو .. يعني كأنه يكبـّر !؟ حنـّا غدا الله علينا من الضحك بغيت اقوله ( الجهاز مغلق ) موقف ما انساه طول حيــاتي .. << ادري شقحه كبيره من الطفوله للشباب أول سنه لي في الجامعه .. كان الجدول ينزل لنا دايركت يعني مهوب انت اللي تسجل .. فـ كانت أول أيـّامي في الجامعه .. ما ادلّ الا كليـّتي الرئيسيه كانت في العديليـّه .. وفيه ماده طالع غلط في الشويخ .. المهم .. الماده ذيك كانت سبت اثنين اربعاء وكانت الساعه 8 على ما اظن . . الا أكيد مهوب على ماظن .. المهم أنا ماعمري جيت الشويخ الا في صالة القبول والتسجيل اول ما جيت اسجّـل .. وش حليلي قرينيس .. ماعرف الا المكان اللي اجيه .. المهم .. قبل ما تبدأ الدراسه وكانت السبت .. وحنا الخميس .. واروح للشويخ واضيـّع وادخل الصناعيه وعقبها ما خذيت الا انا عند حرس الجي ون .. المهم دخت ساعتين على ما عيـّنت الدرب اللي يوديني للجامعه .. ويوم الجمعه مثله .. بس ذالمره خلاص عرفت لي طريق والله معاد افهقه منــّي .. ويجي يوم السبت واروح للمحاضره الأولى .. وادوج في الجامعه وفي كبرها بلى .. وكان مكتوب لي ( ش2) يعني مبنى الشيوخ رقم ثنين .. وادورّ ادور .. وادخل قاعات الاداب ومدري وين وادخل سكن الدكاتره .. الوكاد اني دجيـّت لين جت الساعه تسع واشوي .. وابي الحّـق على محاضراتي في العديليه .. وانصاها مسرررع .. بس اشوى ادلّ طريق العديليه المهم اني على ذالحال .. لأسبوعين .. كنت استحي اسأل احد .. اذلّ انه يقول .. من صجك ما تعرف وين قاعتك والا يقعد ينقد علي وكذا .. فـ قلت الرسوب والسقوط ابرك ولا ضيعة الوجه يا ولد .. ويجي ذاك اليوم عقب (3 اسابيع ) لأني اخر الاسبوع الثاني والثالث معاد رحت لأني غسلت ايدي .. وفوق هذا كلـّيتي مافيها احد اعرفه وقتها .. ويجي ذاك اليوم اللي قرّرت أنـّي خلاااص لازم اعيـّن ذالقاعه اللعيـنه .. وابشـّركم .. وقفت عند ذيك البنايه في طرف المدينه الجامعيه .. واقوف موتري ولا فيه مواتر .. مابلا انا !!؟؟ وانتظر اشوي وتروح ربع ساعه من المحاضره وانا منتظر .. اخر شيء جاني واحد من الامن قال فيه شيء ؟ قلت ايه انتظر محاضرتي !! قال محاضرتك وين ؟ قلت في مبنى الشويخ 2 !؟ يعني المبنى هذا قال لا يا عمّ دا مبنى اتنين آآآآه بس مش مبنى شويخ 2 قلت اجل ذا وش؟ قال ده سكن طالبات !! يا رقال ئول غير دالهرق !! والله ولا خلـّيت المصري الا لين ركـّبته معي يدلـّيني أيـّاها وينزل معي .. وعقبه رجـّعته وثبـّت مكانها ... لكن عقب ما جاني انذار غياب وطبعا وضـّحت للدكتوره كانت اجوديه وكبيره اشوي واعلمها بسالفتي كلها .. والحمدلله شكلها قدّرتني حيــل لدرجة اني خذيت A في الماده * * ما اظن إن عاد للحديث حلقات آخـرى بس .. نقيـّل ونشوف المزاج العصـر