السلام عليكم ورحمة الله وبركاته ...
بدون مقدمات ادعها تعبر عن نفسها 
واتمنى ان تسمحوا لها بالمرور
انت وينك فقدتك ؟؟ ياسبايب هناي=ومافقدت بغيابك غير لب وخفوق
الغروب فبعادك قام يبكي شقاي=يدري حزة غروبك ماوراها شروق
لاعزفنا غرامك والحزن ,, صوت ناي=ماتقولي ياغالي ,, وش بقى للطروق؟؟
من كثر ما احبك ,, ما اكره الا سواي!!=ومن كثر مافقدتك ,, مدري وشلون افوق!!
اسأل سراج بيتك عن وفاي وغلاي=كم حفظلي ملامح ,, كان تبغي حقوق
شافني عند بابك كيف رايح وجاي!!=قال : هذا يبيك ,, وغيره قالوا سروق
والا انا ما اتمنى غير شوفك عشاي=افهق الغيم واطلع ,, خاطري لو اروق
انتظر منك طله !! لجل ابلل ضماي=وانتظر منك نظره!! لجل تبري فتوق
انت ثمر القصايد .. وانت مصدر هواي=دونك الشعر ماصخ .. بس وياك ذوق
الليالي توفر دمعها من بكاي!!=ياخي متاك تشفق؟؟ او متاك بتتوق؟؟
لاتركت المشاعر ,, لا اتجاهل نداي=وانت بينك وبين الشوق عدة فروق
من كثر ماخسرتك صرت اشوفك وراي=ودي انزف ,, ولكن مابقالي عروق!!
بدري على المشاعر ,, لاتحاول معاي=!!روح لحف خفوقك ,, وخله ينام فوق!!
توك اتحس فيني ؟؟ ياوفآآآك ووفاي=يا ما جرحت خافق ,, يا ما سيّلت موق
الله يبيح قلبي والغلا في حشاي,,=لايصبحك حب ,, ولايمسيك شوق
كل ما قلت احبك ,, رد صوتي صداي:=!! خل حبك فقلبك ,, زين عندك خفوق !!
وسلامتكم // مبارك المجروب