السلام عليكم ورحمة الله وبركاته
يالربع اللي نسمعه ان الامير عبدالعزيز بن متعب قتل في احدى كرات الخيل في معركة روضة مهنا
القصة اللي اعرفها هي ان الامير عبدالعزيز بن متعب رحمه الله قبل تبدا المعركة طلب من الملك عبدالعزيز
ان يطلع له ويبارزه عشان يقنون دم الرجال من الطرفين لكن عبدالعزيز ال سعود رفض لانه كان متأكد
من انتصاره وقال للمرسول قال لبن رشيد ( مايقابل الحي الجنازه ) ولما دارت الحرب كانت الهزيمه لجيش
ابن سعود وفي المعمعة كان الامير عبدالعزيز بن رشيد يعتزي ويهاجم المقاتلين وكل ما طلح واحد تحت سيفه
اشطره ويقتحم الصفوف وهي عادته ماهي بس بالمعركة هذي ولقب ( الجنازه ) اطلق عليه لانه يقتحم الصفوف
ويضربها بالنص مثل اللي مايبي عمره ( يعني للتوضيح اكثر ( بايعها 
) واطلقوا عليه الجنازه وعشان كذا قال
له عبدالعزيز ال سعود ( مايقابل الحي الجنازه )
نرجع لمقتله
وفي المعمعه وهو يعتزي بعد هزيمة جيش ابن سعود سمعه وشافه واحد من البوارديه فرماه فقتله
اخواني من ردودكم تقولون انه خرج بالليل عشان يقضي حاجته وضيع بين معسكره ومعسكر ابن سعود
اولا : اخواني الجيوش قبل لاتقابلة تخلي بينها مسافه على الاقل عشره كيلوا منها ليضمنوا غدر العدو ومنها
المنطقه الوسطيه تكون ميدان القتال في الصباح لو كان المسافه بين الجيشين 5 كيلوا مثل ماتفضل احد الاخوه
شوفوها بالعقل يالربع كان امرحت الجيوش مع بعضها
ثانيا : تقولون انه الامير عبدالعزيز ضيع معسكره وشلون يالربع حتى لو قلنا المسافه 5 كيلوا لا يمكن انه يمشي
خمسه كيلوا بدون لايحس بنفسه نعم انا ايضا سمعت ان الامير عبدالعزيز كان خجول لكن الخجل ماراح يخليه
يمشي 5 كيلوا لو كانت المسافه صحيحه بدون لايحس كيلوا واحد وخلاص يصير بعيد من الناس
تحياتي لكم