أنا اللي مابقى عندي عقل من كثرة التفكير
وأنا اللي مابقى فيني على كتم الحزن طاقة
أحاول أرخي أعصابي وأقول اللي يصير يصير
وترى ذا الوقت ماهو يستوي إلا لخلاقة
ولا أسمع قلبي إلا يوم يجذب ونته ويحير
بعيني دمع حزن" عزتي ماتقبل إعتاقه
شوي أتكي شوي أقعد شوي أوقف شوي آسير
شوي قايم" بالباب وشوي" على الطاقة
ماني ببخير لا والله ماني ذا المسا ببخير
وماعاد أقول غير الله يجيب الصبح وأشراقه
لعل الصبح لاصحصح من انعاسه وغنى الطير
يجدد بي أمل عمر" ذبل وأحترقت أوراقه
ياكثر قلوب تطمح للعلا لكن وش التدبير
إذا المقسوم في وجه الطموح مشمر" ساقه
دعيت وماوصل صوت ,, كتبت ولانفع تعبير
كيف يجيبني من لاعرف جرحي ولا ذاقه
أنا تعبان أنا عندي قلق مايدركه تصوير
أنا متعبني الواقع وشين الدهر وأخلاقة
ياوين ألقى وطن خالي مابه ظلمى ولاتعكير
ياوين ألقى نفوس" جرمها إنها بس عشاقة
ثمان سنين ياليل الرياض أدور التحرير
متاهات" تكاد تجث خفاقي ومعلاقه
لأني حر ما أقبل حياة القيد والتعزير
إذا غيري رضا بالذل خوف الجوع والفاقه
لأني داري" ماني بلاش ,, ولابنافخ كير
ولا قامح ولا عاثر ولا يمناي بواقه
لا والله غير رجل" لي مع أهل المعرفة تقدير
إذا جيبي مخيبني فجودي ذاك براقه
ألايالله تصبرني تعوضني بعد طول الصبر ذا خير
يارب" مايخاف الجوع عبد" وأنت رزاقه
لحيث" مابقى عندي عقل من كثرة التفكير
ولاحتى بقى فيني على كتم الحزن طاقه
الشاعر : إبن سميطان اليامي
