:
:
:
قيلوله محترمه امتدت للساعه 6 المغـــــرب <حشا مو قيلوله
شــــور منعش
" تفكيـــــر عميق " شنو اشرب علشان يكتمل الانتعاش ويتعدل المزاج" ..< راهيه
واذا بصوت اصاله " لاتخاف من الزمان الزمن ماله أمان خف من اللي كل أمانك في يديه وتامنه""
ألــــــو هلا ..
قعدتي انزلي وديني الفحيحيل ..<< مرسوم اميري
فحيحيل بهالغبار وعقب هالشور المحترم لا بالله اعتفس المزاج..!!<< طبعا في قلبي هالحجي
خيـــــر ان شاء الله ..دقايق وأنزل ..
من زود الزعل والتحلطّم
((سيده من فوق لباب الشارع للسياره ))
ألو انا برا بالسياره
انتي بالسياره وانا أدورج << حشا مو بنت صخلــــــه ضايعه 
دعاء الركوب
واشغل المارينا اف م !
شهالتناقض العجيب (( مو موضوعنا )) ..
المهم
أحلى مشوار.. على قلبي عسل.. مشوار للمنطقه العاشره !
الطريج طويل وهادي فرصه حلوه للاختلاء بالنفس واطلاق العنان للتفكير .. بس على شرط اللي معاك يكونون طرمان أو تفرض عليهم حظركلام بحركه بسيطه جنك تقول " انجعموا" شغل الراديو واندمج معاه ..
ياربي من يطلع بهالغبار شاللي حادنا ألحيـــــــن اكيد الفحيحيل فاضيه الله يستر عمليات الخطف كثرانه !< هالبنت جبانه وتفكيرها بوليسي الله يسلم mbc action
الملك فهد خط سريع بس عجيب مدري ليش أحبه ؟!
الشارع طبعا
هدوء ومحمد عبده جا بوقته يغني مدري شيقول خبري فيه قال شوق مدري اشتاق وعقبها ودعت وصرت في حالة غيبوبه واستمتاع مو طبيعيي والا ذاك الصوت يشق سكون الليل وهدوءه الجميل
والا ذيج الزفه المحترمه من الغاليه ...
((أقول حطيلنا سوالف(ن) زينه والا حديث ابـــــرك من هالاغاني ))
طيب طيب من وين اجيب السوالف أقول خلينا نسلم على المقبره وانسكر الراديو بالمره ...
محافظة الاحمدي ترحب بكم < الله يرحب بك أكثـــــر وياكثر غلا من سكن فيج ... شالسالفه!
الساعه 8 شهالزحمه شنو محد قعد ابيتهم والله منتي هينه يالفحيحيل !
قمت اتشيحط جدام الغاليه وادخلها دواعيس الفحيحيل (طرق مختصره ) << طبعا خبره !
كل الطرق مغلقه وزحمة ليلة العيد..!
بالموت وصلنا الموقع المطلوب
انزلت الغاليه
"شوفيلج مصفط وتعالي يمكني اخلص شغلي وانتي مالقيتي مصفط" طبعا شيخ باشا ما يقصر <سايقنا القديم !
شفت ذاك الرصيف الحلو اللي يشوّق وزني الشيطان وقال مالج الا هالرصيف والا اشحقه شاريه جيب ! < متعقده من هالسالفه وببيعه ..
توني اتلفّت واشوف الوضع والاذيج السياره مصكوكه بكابح محترم اهني تعوذت من الشيطان وفريت الدنيا علشان ألقى لي مصفط قريب وصفطت على بعد 20 م !< يالله العوض ولا القطيعه ..
يا ألله غبار ومشوار محترم وعليه العوض بالشور ..
دخلت المجمع وأول مره بحياتي اكتشف اني خبله طبعا انا ادري اني خبله بس مو لهالدرجه !
شايب عليه بشت قاعد عالارض ولما قربت شفتها يمه عجوز ولا بسه برقع
شفت شي ثاني شفت الانكسار شفت الغربال والله وصدقتي يا أصاله !
كنت احسبهم ناطرين احد ؟ مضطره امر منهم واصعد الدرج !
تعالي يا بنيه!
بس اهنيه اخنقتني العبره وقلت عسا ربــــــي يخليني للي معنيتني بهالجو من المنطقه الرابعه لحد الفحيحيل وعسا ربي يخليها لي
وعسا عيالي يبرون فيني مثل بري بوالديني
"" قولوا آميــــــــــــــن"
لاتخاف من الزمان الزمن ماله أمان ..
خف من اللي كل أمانك في يديه وتامنه..
لو حبيبك ما وفالك لو حبيبك فيك خان ..
ايش ترجي من زمانك النتيجه باينـــه..
!!!
اتهقون فيه ســـــــر بين نغمة موبايلي واللي شفته وكدرني ...
أسئله تحتاج الى اجابات انتظـــــــرها منكم ..
ليــــــش جذي ؟
وشالحل ؟
