[عزوف]

البارح قضيت ليلتي عادي مثل الليالي اللي تسبقها ..

لكـــن هالليله غير او يمكن لازم تكون غير ..

حالة ترقب وانتظار او اقدر اقول لحظة خوف ..

بيدي الموبايل وأقلب المسجات أو يمكن الاسماء بس ما أقدر أواجه نفسي .. لسته كبيره من الاسماء ما شاء الله.. صارت الساعه 12 لاحس ولاخبر كأن هالموبايل مفصول عن الخدمه .. معقوله هذا حصادي من كل هالسنين من كل هالحب صدمـــه ..

أعرف وحده كل ما مر سنه قالت " من أعمارنا " وكنت أكره هالكلمة وأتضايق وبصراحه أتشائم من صاحبتها .. بس اكتشفت في ليل البارحه انها فعلا صادقه مرت سنه او يمكـــــن سنين وجا وقت تصفية الحسابات واعداد جدوله جديده لسنه جديده عالاقل نشوف الخساير والارباح !

وللاسف اكتشفت إني أفلست من هالسنه صج " من أعمارنا " !!! وراحت خساره .. تحسب أصحابك أو تبحث عنهم فلا تجدهم وتقول في نفسك مثل صاحبتنا " من أعمارنا" ... وخيرها بغيرهــــــا .. تفكر على كثر ما عطيت ما بيّــــــن وراح أدراج الرياح بس يالله " من أعمارنا"... سو خيـــــــر وقطه بحـــــــر ويمكن تكون خيره ! ..

وفي هدوء وصمت ليل البارحه

جـــــا صوت المسج " لديك رساله جديده " كانت الساعه تقريبا وحده وهالوقت المفروض أكون في سابع حلم !

لكن ليلة البارح غيــــــر...

رساله متوقعتها وكنت انتظرها وبصراحه فقدت الأمل في وصولها ! لكنها وصلت أحبها وأغليها ومو هي الوحيده بالعكس عندي الكثير غيرها .. بس تأكدت إن المحبه احيانا لا نستطيع التعبير عنها بصوره مباشره وعرفت إن الدنيا تلاهـــــي وظروفها خلتنا جــد ونفقد أشياء صغيره لكـــــن كبيره بمعناها..

قريت حروف المسج حرف حرف وقفت عند كل كلمه " كل عام وانت بخير يا قلبي وعسالله لايفرقنا والله مشتاقتلج موووت "

فرحت بالمسج وحروفه واسم صاحبته يزين بدايـتــــــه .... عساني ما أنحــــــــرم منها

ياطــــول ليلة البارح ياهي بعثرتنـــــــي وجيت كلـــــــي