السلام عليكم وعيدكم مبارك
حبيت اواصلكم تواصل مغترب 
_________
حي ذا الطاري وذا العين من شوف الربيع = وجعل يسقى لاسلت نفسي من احزانها
الخيام بصهيد ٍ كنه الروض الوسيع = ثبتوا بطنابها وعدلوا عمدانها
سعد عيني .. والله يبيض وجيه الربيع = زينوها زين .. والزين في زيـٌـانها
الطرب في ( هبة الريح ) و ( الذوق الرفيع ) = وكل نفس ٍ تنطرب لا لقت خلانها
ضو .. ودلال .. وشراع .. وسوالف من صديع = والمعاميل تغلي والحليب اوزانها
ليلة ٍ قمرا ونسناسها فوق البديع = حاذفين همومنا ودينها لديانها
والمـســٌـير لابغى الوصف ؟ .. ماوالله يضيع = قلت : له ( شف خيمة ٍ تجهرك ضيانها )
يمكن انك تشوفها وانت بالخط السريع = ضونا شبوبها .. ماهدى دخانها
الفطور ( كـبـيـدة ٍ ) ونتخاشرها جميع = ونتغدى ( كـبـسـة ٍ ) غايب ٍ شيطانها
والعشا ( لـبـيـنـي ) .. كن لحمته بيـٌـدك تميع = وجمعة رجال ٍ على الطيب يزهى شانها
والسهر سمرة علوم ٍ برضوان السميع = والقصايد جزلها .. والهروج سمانها
والله انها شف من كان له جرح ٍ ضليع = غير الاعمال بخواتيمها ميزانها
انكشف هم ٍ سترته !! .. على العالم جميع = وافضحتني عبرة ٍ مت .. من كتمانها
كن هم ٍ ساتره ,, جادل ٍ ترعى قطيع = يوم ناطحها الهوى ,, بينت سيقانها
الهقاوي خابت .. وطاح راعيها صريع = والبنادق خافتت .. واخطت بنيشانها
الحمل بين الحنايا ماهو ( بحمل ٍ وديع ) = والعباد اللي ابتلت زادت بأيمانها
والله ان بعض الرياجيل في ( حسن الصنيع ) = ودها بالغانمه غير مالله عانها
المراجل ماتجي عند عيار ولكيع = والاصيله ماركبها ياكود حصانها
اتحاشي اهل النميمه . ولاسمع ولا اطيع = خابر ان الصمت يكفلني بحقرانها
(غربة الانسان ) في ( ديرته ) شي ٍمريع = كنه رايح ( وجهة ٍ ) ماعرف عنوانها ؟
الكرامه ثروة اللي يبي القدر الرفيع = وواحد ٍ ماعز نفسه ؟ ترى هو هانها
لعنبو من لام شالح على فرقا الفديع = من يلوم ؟ العين لافارقت حيانها
ياكثر صبرك على الظيم يالصدر الوسيع = وياكبر حزنك على الحاجه وفقدانها
كن بيني وبين بعض العرب سد ٍ منيع = وكن مابيني ومابينها .. بيبانها
الهنوف اللي جذبتني من الطرف الفضيع = وش جنت من سفك دمي ؟ بسحر اعيانها
اقبلت مثل البراءه على وجه الرضيع = وادبرت مثل السفينه مع ربانها
القناعه سلعة ٍ من شراها مايبيع = والنصيحه درة ٍ غاليه بأثمانها
يازمن حملتني فوق مالا استطيع = اه لو تدري بروح ٍ طغى حرمانها
( واللذي بيديه نفسي ) وقلبي له ضريع = ان نفسي ماشكت غير !! .. من عصيانها
العزا بأن الجماله لأهلها ماتضيع = دام ربي يجزي النفس ضعف حسانها
ماعرف قدر الوفا غير .. من قلبه شفيع = ولاعرف قدر الامانه .. سوى من صانها
وطــــــولــة عـــمــاركــــــم