إنشقآف الـعـجـمـي من مستقلة التربيه جامعة الكويت

[العنفوآن]

انشقاق في «مستقلة» التربية في جامعة الكويت



http://up3.up-images.com/up//uploads/images/images-45412a79c2.jpg (http://fashion.azyya.com). (http://uploadpics.a2a.cc). (http://www.a2a.cc)





كتب فراس نايف |

أعلن العضو العامل في قائمة المستقلة في كلية التربية في جامعة الكويت عبد الله عيد العجمي انشقاقه عن القائمة لسعي اعضائها للتكسب الانتخابي ولكسب الاصوات بأي منصب حتى منصب التنسيق.
وقال العجمي ان «قيادة القائمة المستقلة حرصت على تشويه صورة منافسيها في القائمة الاسلامية التربوية وعدم التزامهم بالمنافسة الشريفة وكان سعيهم الوحيد هو الفوز متخذين نظرية «الغاية تبرر الوسيلة».
وأضاف العجمي ان «جهود القائمة الاسلامية التربوية والجمعية التربوية للطلبة تبذل بكل جد وجدارة جهودا من اجل خدمة الطلبة، لافتا الى ان المستقلة اخذت تلتفت الى اي طريقة مشروعة او غير مشروعة لغاية في نفوس اعضائها.
وأكد العجمي انضمامه للقائمه التربوية الاسلامية، داعيا الجموع الطلابية في كلية التربية الى الابتعاد عن القائمة المستقلة وعدم التصويت لها.






http://www.alraimedia.com/Alrai/Article.aspx?id=201525&date=06052010


جريدة الراي يوم 6_5_2010

[بومهند]

كفو بن قذلان وماانشق إلا لتخاذل أعضاء مستقلة التربيه
وكما ذكر حتى بمنصب التنسيق !!


شكرا على نقل الخبر


والله يوفق الجميع

[نسل الطويل]

بسم الله الرحمن الرحيم

حقيقه انشقاق عبدالله العجمي

اولا الرجال كان مرشح قبل سنتين مع المستقله
ولكن فالوقت الحالي ليس عامل فيها او له صله فيها من قريب او بعيد


فخبر انه عامل فالمستقله غير صحيح فكيف يكون منشق ؟

هذا بالنسبه انه ينتمي للقائمه المستقله


اما بخصوص انه يمثل العجمان

فالرجال من سنتين وهو مع التربويه ومخلي صف العجمان اللي كانوا مجتمعين فالمستقله

فالرجال لا ينتمي للمستقله ولا يمثل العجمان فعلى اي اساس انشق ؟


وقبل هذا كله الرجال خريج صيفي فما مصلحته من التصريح هذا ؟؟

وحقيقه هذا الانشقاق الوهمي انه حركه متعمده من التربويه بعد ماشافت صف العجمان توحد وبالذات بعد ما التمست الحركه في اللجنه النسائيه للعجمان


واتمنى ان حنا نطبق قوله تعالى
(( يا أيها الذين ءامنوا إن جاءكم فاسق بنبأ فتبينوا أن تصيبوا قوما بجهالة فتصبحوا على ما فعلتم نادمين ...))

حتى لا نزعزع صف ابناء القبيله فالكليه ولا ناثر على خواتنا الطالبات فالاخبار الكاذبه :)


تقبلي

[عبـق أجدادي]

.












الأخ عبدالله لما إنضم للمستقلة
كان مؤمن بمبادئها وأفكارها وخطها وتوجهها .؟!

وإلا بس مشارك لأحل المشاركة .؟!





إن كان مؤمن بنهج القائمة المستقلة وواجه
إنحراف بأداء بعض أعضائها .. ليه يتخلى عن القائمة
بجريرة أشخاص .؟! .. المفروض يعتزل العمل النقابي
ويدعم القائمة من بعيد لأنه يعتقد بمبادئها وبنفس
الوقت إعتزلها لاختلاف وجهات النظر كما يفعل
أصحاب الفكر والثقافة الديمقراطيين





أما أن يترك القائمة بسبب خلافات شخصية
وفجأة وبين ليلة وضحاها تختلف مبادئه وأفكاره
بشكل كلي ويذهب للإنضمام للقائمة المنافسة
وينضم لها ..! .. بل ويتعدى ذلك إلى القدح بقائمته
السابقة وكيل المديح للأخرى فهنا يكمن العجب
فكيف تتغير مبادئنا وتتحول قناعاتنا
بهذه السهولة .؟!





أنا لا أعرف الأخ عبدالله ولست صاحب هوى إئتلافي
ولا توجه مستقل .. ولكن أستغرب من الحالات المتكررة
للتحول بين قائمتين تحملان فكرين مضادين ..!





المشكلة إن هذه النماذج تمثل نواة مجلس الأمة
للسنوات القادمة .. تلك تساؤلات تطرح أمامي
ولا أجد لها تفاسير ولا مبررات ..!





من يملك جواب لهذه الرؤى والتساؤلات يتقدم
أفتوني في رؤياي إن كنتم للرؤيا تعبرون ..!










سلام

[العنفوآن]

بسم الله الرحمن الرحيم

حقيقه انشقاق عبدالله العجمي

اولا الرجال كان مرشح قبل سنتين مع المستقله
ولكن فالوقت الحالي ليس عامل فيها او له صله فيها من قريب او بعيد


أهلين أخوي نسل الطويل..أولاً الأخ عبدالله العجمي كان مرشح سنة 2008 مع المستقله وكان يأيدهم ويصوت لهم ولايخفي على أحد ذلك ولكن ابتعاده عن جو الإنتخابات ككل لايعني انه لايمت للمستقله بـ صله لا من قريب ولابعيد فـ لربما انشغل بالدرآسه ..ويبقى تأييده للمستقله وعمله معهم قائم..وكذلك من حق أي شخص الإنشقاق والإعلان عنه بـ تصريح لأنه مجرد تأييد فكري للقائمه يحق له بالإنشقاق

فخبر انه عامل فالمستقله غير صحيح فكيف يكون منشق ؟

الأخ عبدالله العجمي معه فورمته عضوية بالمستقله :) وإن كنت غير متأكد فإطلبها منه فـ كيف يرشح نفسه وهو لايملك فورمة العضويه :)


هذا بالنسبه انه ينتمي للقائمه المستقله


اما بخصوص انه يمثل العجمان

فالرجال من سنتين وهو مع التربويه ومخلي صف العجمان اللي كانوا مجتمعين فالمستقله

فالرجال لا ينتمي للمستقله ولا يمثل العجمان فعلى اي اساس انشق ؟


وعلى أي أساس حكمت ان الرجل لايمثل العجمان؟! عجبي
وغير صحيح انه مع التربويه منذ سنتين واين الدلائل على وقوفه معهم؟ هل ترشح معهم؟
هل يملك فورمة عضويه بالتربويه؟


وقبل هذا كله الرجال خريج صيفي فما مصلحته من التصريح هذا ؟؟

الرجل حر بتصرفاته :/ هذا أولاً ثانياً:ممكن رأى تخاذلات بقائمة المستقله وأعلن إنشقاقه لمصلحة الجموع الطلابيه وانت اذا قرأت الإعلان جيداً ستجد انه دعا في نهاية التصريح الجموع الطلابيه إلى عدم التصويت لقائمة المستقله وحتى لو يكون متخرج هذا الكورس من حقه ان ينزل تصريح ويبصر الطلبه

وحقيقه هذا الانشقاق الوهمي انه حركه متعمده من التربويه بعد ماشافت صف العجمان توحد وبالذات بعد ما التمست الحركه في اللجنه النسائيه للعجمان

رجاءاً لاترمي التهم جزافاً فالتربويه لاتسيّر أحداً.,والأخ عبدالله العجمي لم ينشق بناء على طلب من التربويه ..,وأي لجنه تتحدث عنها؟ اللجنه النسائيه هل تمثل وتحوي الطالبات العجميات بالكليه؟لم تأتيني دعوه منها وتزكية شخص واحد عجمي لمنصب نائب رئيس من قبل 12 شخص فقط هل هذا معناته انه يمثل العجمان جميعاً؟ توكم تعترفون بالطالبات العجميات؟ ماخذيتوا حتى رآينا بالقائمه ولا فقط لأجل منصب عادي اجتمع 12 شخص وقال العجمان مع المستقله!! على أي أساس وأعداد الطالبات أضعاف أعداد الطلبه

واتمنى ان حنا نطبق قوله تعالى
(( يا أيها الذين ءامنوا إن جاءكم فاسق بنبأ فتبينوا أن تصيبوا قوما بجهالة فتصبحوا على ما فعلتم نادمين ...))

حتى لا نزعزع صف ابناء القبيله فالكليه ولا ناثر على خواتنا الطالبات فالاخبار الكاذبه :)


تصريح بجريدة رسميه وتقول أخبار كاذبه :)


تقبلي




على العموم أشكرك على المشاركه..,ويبقى ((الإختلاف في وجهات النطر لايفسد للود قضيه))

والله يوفق الجميع لما يحبه ويرضاه

[نسل الطويل]

أهلين أخوي نسل الطويل..أولاً الأخ عبدالله العجمي كان مرشح سنة 2008 مع المستقله وكان يأيدهم ويصوت لهم ولايخفي على أحد ذلك ولكن ابتعاده عن جو الإنتخابات ككل لايعني انه لايمت للمستقله بـ صله لا من قريب ولابعيد فـ لربما انشغل بالدرآسه ..ويبقى تأييده للمستقله وعمله معهم قائم..وكذلك من حق أي شخص الإنشقاق والإعلان عنه بـ تصريح لأنه مجرد تأييد فكري للقائمه يحق له بالإنشقاق



هلابش اختي غنوجه

ما اختلفنا انه مرشح سابق ولكن هل كل مرشح سابق يصبح عضو عامل ؟

لا وعبدالله عيد كان مرشح اعيدها للمره العاشره ولكن ليس عضو عامل فالوقت الحالي

ومن بعد ترشحه وهو ماله علم ولا يحضر اجتماعات القاعديه ولا ملتزم مع القائمه ماديا او معنويا حتى



الأخ عبدالله العجمي معه فورمته عضوية بالمستقله وإن كنت غير متأكد فإطلبها منه فـ كيف يرشح نفسه وهو لايملك فورمة العضويه


اختي غنوجه الفورمه يطلعها اللي بيترشح وتنتهي بمجرد الانتهاء من خوض الانتخابات
الا في حاله الفوز فانها تستمر سنه كامله مع استمرار الجمعيه
وعلى كلامش انه مرشح نفسه 2008 فحتى لونه فاز كانت لتنتهي في 2009 يعني شهر 9 اللي فات


وعلى أي أساس حكمت ان الرجل لايمثل العجمان؟! عجبي
وغير صحيح انه مع التربويه منذ سنتين واين الدلائل على وقوفه معهم؟ هل ترشح معهم؟
هل يملك فورمة عضويه بالتربويه؟



انا اقولش على اي اساس
لان الرجال ابدا التصرف من نفسه وهو يدري ان عجمان التربيه كلهم ملتزمين مع المستقله

فكيف لرجال تصرف من دون شور عيال عمه انه يكون يمثلهم ؟

والفورمه = الترشح استغرب من تكرارش للمصطلحات المترادفه

والدلائل خلي اللي اساله عن الفورمه يساله وين صوت السنتين اللي فاتت ويعرف الدليل :)




الرجل حر بتصرفاته :/ هذا أولاً ثانياً:ممكن رأى تخاذلات بقائمة المستقله وأعلن إنشقاقه لمصلحة الجموع الطلابيه وانت اذا قرأت الإعلان جيداً ستجد انه دعا في نهاية التصريح الجموع الطلابيه إلى عدم التصويت لقائمة المستقله وحتى لو يكون متخرج هذا الكورس من حقه ان ينزل تصريح ويبصر الطلبه



طيب هو حر بتصرفاته ماقلنا عكس كذا
والجموع الطلابيه على قولتش مو حره باختيارها من يمثلها ؟

الجموع الطلابيه دائما وابدا لها صوتها ولا مره سمعت احد يقول لا تصوت لقائمه الفلانيه الا ومعه دليل

فوش دليل عبدالله او التخاذل اللي شافه من المستقله ؟




رجاءاً لاترمي التهم جزافاً فالتربويه لاتسيّر أحداً.,والأخ عبدالله العجمي لم ينشق بناء على طلب من التربويه ..,وأي لجنه تتحدث عنها؟ اللجنه النسائيه هل تمثل وتحوي الطالبات العجميات بالكليه؟لم تأتيني دعوه منها وتزكية شخص واحد عجمي لمنصب نائب رئيس من قبل 12 شخص فقط هل هذا معناته انه يمثل العجمان جميعاً؟ توكم تعترفون بالطالبات العجميات؟ ماخذيتوا حتى رآينا بالقائمه ولا فقط لأجل منصب عادي اجتمع 12 شخص وقال العجمان مع المستقله!! على أي أساس وأعداد الطالبات أضعاف أعداد الطلبه

محشوم عبدالله من انه تسيره التربويه او غيرها :)

ولكن بنظره بعيده عن المثاليه المصطنعه وش فايده التربويه ينزلون خبر انشقاق شخص وهو خريج صيفي بالاساس مو عامل فالمستقله ؟

وهل الطالبات العجميات تجمعوا وسعوا لانهم يشكلون كتله انتخابيه ؟
واظن وصلتكم رسايل اللجنه الناسائيه وايميلها للتواصل معكم وسماع ارائكم
وان كانت هذي غلطتنا ان حنا غير متواصلين مع طالبات العجميات فكان الاحرى بكم وانتم تشكلون كتله انتخابيه انكم تسعون لتصليح الغلطه هذا ان كان فيه عاملات عجميات يهتمون في الانتخابات

وهل فيه لجنه عجميات مع اي قائمه ؟

اما بخصوص 12 واحد على قولتش
فاللي مزكين مرشح هم 17 رجال وهم عجمان الكليه كلهم
فكيف تنقصين من قدرهم ورايهم ؟
وهل تبينهم يزكون مثلا 5 اشخاص لمنصب واحد :)

ولو مو مهتم في بنات عمي اللي فالكليه ماكان شكلت لجنه من برا الكليه وسعيت عشان اللجنه تتواصل مع الطالبات باكبر قدر ممكن

وان كان فيه تقصير فارجوا السموحه لان اللجنه برا الكليه
ومن فالكليه ويحب يقدم يد العون جزاه الله خير :)



والخبر على قولتش نفيت انه يكون عامل فكيف ينشق ؟


وان شاء الله مامن من اختلاف

ولكن ملابسات اتمنى انه توضح لش


تقبلي

[العنفوآن]

^^


الطالبات يشكلون 90% من أعداد الكليه واجتماع 17 شخص لايمثل رأي أعداد المئات من
الطالبات العجميات ,, كان إمكانكم تستشيرونا عن طريق اللجنه النسائيه اللي تتحدثون عنها لأن في فرق انكم تاخذون رأي الأغلبيه قبل لاتنزلون مع اي قائمه عن انكم تختاررون وتخلصون وبعدين تتذكرون ان في طالبات عجميات معاكم بالكليه يعني بالتصويت نعم تحتاجونا:) ولكن في أخذ رآينا مثل مااجتمعتوا وخلصتوا لا ماتحتاجونا:) ولاتقول لي شلون طريقء التواصل مثل ماكلفتوا طالبات يقومون بعمل اللجنه النسائيه تقدرون تاخذون رآينا عن طريقهم..موتختارون اي قائمه وتطلبون منا نصوت لها على اساس رأي 17 شخص مقابل المئات وانا ماحطيت من قدرهم انتم اجتمعتوا مع بعض واخترتوا شخص ولكن ليس بالضروره إلتزام العجميات معكم لأن إحنا بإنتخابات كليه نصوت على حسب رأينا بالقائمه وجهدها مع الطلبه يمكن العاملات في قائمة المستقله أساءوا لنا يمكن القائمه إللي نزلتوا معها أغلبيتنا لانقبل بفكرها ولا بعملها ولا بالتصرفات اللا مسؤوله التي تصدر من بعض العاملين معهم..,يعني بالنهايه ما أود إيصاله هو الكل حر بـ صوته خصوصا إن في طالبه عجميه راح تترشح مع القائمه الإسلاميه التربويه لذلك الكفه متعادله :/


تحيتي

[متذوق شعر]

السلام عليكم

بصراحه انا طالب في الكليه قديييم واعرف كل تفاصيل اللعبه

اقول لعبدالله انت خريج يعني تصريحك وعدمه واحد لايهش ولاينش الا اللهم انه بيفرق اصوات ربعك

طبعا انا اعرف اللي اقنعك ونزلك التصريح شخصيا حتى ياثر على وحدت صف ربعك بصراحه

الرجال اللي يخلي يخوياه ويطلع منهم مافيه خير قبل ثلاث سنين جاني في دونيتي وكان

يحاول ومستذبح على المستقله وسبحان الله بقدرة قادر صار يصرح ويشق صف خوياه والمشكله

معاااادهو بطالب يعني حتى تصويت مايصوت اقول للعجمان كنكم ماسمعتو شي والتزمو مع خوياكم

[العنفوآن]

^^

الأخ عبدالله العجمي نكن له كل الإحترام والتقدير وهو حر بتصرفاته ,,سواء كان إنشقاقه يأثر أو ما يأثر هذا أولاً..,,ثانياً العجمان في الكليه عددهم 17 :)

والطالبات هم إللي راح يلعبون بالنتآيج والوعد قدام..,,~

[راكان السادس عشر]

نسل الطويل لا يهمونك هذه اساليب قائمة الاخوان دائما
بعد ما احسو بقوة المستقلة خصوصا الاتحاد العام الماضي والتحول الكبير في النتيجة
عموما دعهم يغردون ويلعبون اهم شي العجمان كلمتهم وحده ومن شذ جعله طريقه:)

[العنفوآن]

^^


إخوان مسلمين بس مو نتحالف مع شيعه يوزعون منشورات نكت على الصحابه يامستقله:)


والديل منسق المستقله العام في التربيه شيعي :) علي التركماني :)

[نسل الطويل]

اكيد اولا واخيرا كلا بصوته حر


وان وقفتوا مع ابناء عمومتكم من طيبكم ولا لكم الا كلمه العجمان فازوا بجهودهم وقفه بنات عمهم مو وقفه بنات اي قبيله ثانيه

وانتي عارفه القبيله اللي اقصدها :)

والعجب العجاب من سالفتش انه تشرهين ان حنا ما استشرناكم وانتي تقولين ان فيه طالبه بتنزل مع التربويه ؟

فتشرهين على رياجيل لانه ما استشاروا بنات ولا تشرهين على مره ما استشارت رياجيل لا والطامه انها تدري ان عيال عمها مع القائمه الثانيه ؟


واعيد سؤالي اللي ما جاوبتي عليه هل في لجنه من العجميات تتبع اي قائمه ؟

لان لو فيه لجنه لش حق تقولين ليه ما استشرتونا بس مالكم لجنه وتبين نستشير 195 طالبه ؟

يعني تبين اللجنه النسائيه تجمع 195 وحده وتاخذ رايهم ؟

وانتي ادرا في بعض البنات اللي ما يرضون لهم اهلهم يتدخلون فالسوالف ذي

وبسالش عن شعورش اذا سمعتي طالبه تقول لش ان حنا خسرنا العجمان وش شعورش حزتها ؟
مهيب قايله خسرنا 17 واحد مع انهم كل عجمان الكليه ولا خليناواحد الا وخذينا رايه

انتظر الاجابه ولا ودي اتوهم اجابه من عندي :)


و17 اللي مو مالين عينش لهم كلمتهم وثقلهم فالكليه ولا ياثر استنقاصش فيهم بشيء


والشيعه لمعلوميتش اول مره تسعى التربويه لانها تطلب من شيعي انه يترشح معها لكن رفضوا ماكدين التزامهم مع المستقله
وكلام قولي انه انا اللي قايله وانا اللي اتحمل عواقبه

وبعدين الائتلافيه قالت انها تقبل فالمسيحي يترشح معها فالشيعي مو اهون من المسيحي ؟

وكلمتش الوعد قدام كانش واقفه ضد العجمان وواقفه ضدي انا شخصيا ؟

فليش هل فيه سبب او فعل بدر منا حنا خلاش توقفين ضدنا ؟

ان كان فيه سبب ياليت تطرحينه عشان نحل الخلاف
وان كان مافيه سبب اترك تفسير وقوفش ضدنا لش انتي ؟



وتقبلي

[نسل الطويل]

كلا بعقله راضي

كفيت ووفيت وانا كنت متحفظ على الكلام اللي قاله لنا قبل التصريح بيوم !

لكن يبقى اخ وولد عم ولا تفرقنا الانتخابات



راكان
ليتك تشوف الهستيريا اللي صابتهم خصوصا عند الطالبات

وهذا اللي ياكد ان الحركه ذي مقصود فيها الطالبات العجميات اللي هم خواتنا وبنات عمومتنا :)

واللي يحز فالخاطر استجابت بعض الطالبات للخبر الكاذب




واعتذر لغنوجه لاني اعتبر الموضوع موضوعي وقمت ارد على كيفي لكن من اللي فيني والله :)

[متذوق شعر]

^^

الأخ عبدالله العجمي نكن له كل الإحترام والتقدير وهو حر بتصرفاته ,,سواء كان إنشقاقه يأثر أو ما يأثر هذا أولاً..,,ثانياً العجمان في الكليه عددهم 17 :)

والطالبات هم إللي راح يلعبون بالنتآيج والوعد قدام..,,~



انتي صادقه كل واحد حر في تصرفاته والله لو انه يصوت ولا له في العمليه ذرة نصيب كان قلنا براحته

رجال مقتنع وبصره مع انه خلا خوياه بس المصيييبه انها ماله في الموضوع لاناقه ولا جمل طالب وخريج

فيصرح وينشق على شنو هل هو يمثل البنات مثلا ويتكلم بصوتهم او شنو بالظبط يا اختي افهمي

الرجال حتى تصويت مايصوت فعلى ايش ينشق الهدف واضح ويومش تقولين البنات انتي صادقه

هم الغالبيه في الكليه وهم اصحاب الكلمه لكن انا اتمنى من بنات العجمان انهم يصفون مع عوال

عمهم ويصوتون للقائمه اللي اختاروها اخوانهم وعموما السنه الجايئه فيها مفاجآت واتوقع بيكون

الفوز اذا صار بشق الانفس ثانيا يومش تقولين العجميات انا اقولش صدقيني ما يصوت الا ربعهم

لكل القوائم مره ثانيه اقول لبنات العجمان يلتزمون مع خوانهم مثل العوازم اللي مرتين يعطونهم

الاتلافيه الرآسه وسبب توحدهم ويهملون العجمان واذا عطوهم عطوهم نائب رئيس ولا ينادونه

بجتماعاتهم لاجتمعو يعني بس شكل

نسل الطويل لاهنت وكلامك مزبوط

[شبراق]

كل انسان حر بتصرفااااااااته وهو غير رايه وقال اللي شافه وهو مسئول عن كلامه ويمكن أخذها من باب الامانه وتبريت ضمير والله يوفقه تراه مشهووور باخلاقه العاليه والله يهنيكم فيه ولا تاخذونه بالتعصب

[Stranger]

السلام عليكم يعطيش العافيه اختي الفاضله على نقل هالخبر
الحمدلله في واحد تحرك وتكلم والباقي ان شاء الله بالطريق :p

وايضا يعطيش العافيه على الردود وصادقه بكلامش وانا ايضا برد لي بكم كلمه عليهم مع انش كفيتي ووفيتي وانا ماني بهالكليه بس ما أرضى على الائتلافيه :D

نسل الطويل لا يهمونك هذه اساليب قائمة الاخوان دائما
بعد ما احسو بقوة المستقلة خصوصا الاتحاد العام الماضي والتحول الكبير في النتيجة
عموما دعهم يغردون ويلعبون اهم شي العجمان كلمتهم وحده ومن شذ جعله طريقه:)

اعوذ بالله ياناس شلي صاير فيكم كل ماجا واحد قال اخوان احنا كلنا سنه ونتبع الناس الملتزمين وانتوا تدرون انه الائتلافيه تجمع الاخوان والسلف باتحاد الائتلافيه والاتحاد الاسلامي جزاهم الله خير لاتخلون الليبراليين والشيعه يفرقونكم

ياخي حسستني انهم كفار لما قلت قائمه الاخوان ؟ وصادقه اختي الفاضله احسن من الشيعه
الشيعه ياشطار وين ما السنه المتمسكين بالدين موجودين يصيرون ضدهم وانتوا امشوا وراهم بحجه مناصب
عندكم رايحين مستقله عندنا رايحين وسط ديموقراطي (هندسيه ) مالهم توجه ولا فكر اللهم وين السنه احنا ضدهم
وانتوا رايحين مستقله على شنو قائمه كانت بس لعيال بطنها لعيال العوايل على قولتهم البيت الكويتي الاصيل وكلهم من ربع جويهل بس لي جات للانتخابات عرضوا على هذا منصب وعلى ذاك منصب وبس استغل اسمك وبكره يخلي الكليه هوليلا ومصخره واختلاط


يا اخوان لو تبون كل العجمان يصوتون لكم تراها مو غصب السالفه عالاقل اختاروا قائمه سنعه تمثل توجهه قبيلتكم عشان ذيك الساعه لكم حق انكم تعاتبون اللي يطلعون
بس احنا يالعجمان معروفين ناس دينه وملتزمه ولله الحمد ليه اخلي اهلي يصوتون لناس ما يمثلون فكرهم الملتزم ولا يمثلون توجه القبيله بس عشان 17 طالب من قبيله العجمان راحوا معاهم ؟ لو بناخذها بالديموقراطيه البنات ضعفكم بستين مره ماشاء الله وانتوا 17 منو الاحق هالثلاثميه طالبه ولا ال17 طالب ؟


لو رحتوا وسط قلت اهون عالاقل عندهم فكر مستقله شنو ؟ اذا بتدور على منصب وتبي ترفع اسم قبيلتك بالكليه ياريت تختارون القائمه السنعه مو مودين بناتنا عند الحضريات والشيعيات اللي نصهم سفور وتقولون صوتوا مع عيال عمكم ؟ خير ان شاء الله انت و17 واحد تبون كم منصب بالمستقله بناتنا شكو فيكم يلحقونكم وين مارحتوا رحتوا مستقله رحتوا اسلاميه"تبع الشيعه " (عادي تسونها ) رحتوا وسط مايهمهم
اللي يهم بناتنا انه صوتهم امانه وماتعطي صوتها لقائمه شعارها تبع الجويهل ولما دروا انه احنا لنا وزن بالجامعه قاموا يدخلونا خير ان شاء الله
بناتنا سنعات ودينات وعرفوا ينقون الصح بعيد عن التعصب اللي ماله امه داعي بالكليات


واللي نازله بالتربويه كفوا والله نفتخر فيها وبأمثالها من بنات العجمان الله يوفقهم ان شاء الله وتبقى الكليه ائتلافيه باذن الله


* للعلم قبيله العوازم في كليه الهندسه بسنه 2008 و 2009 انضم احد طلابها لقائمه تتبع الوسط الديموقراطي - ياترى طالباتهم شنو سوا ؟ ماسوا شي صوتوا للقائمه اللي تمثلهم وما مشوا ورى طمع وسوء اختيار ولدهم وصوتوا للائتلافيه


ومره ثانيه اشكرش اختي الفاضله على هذا الموضوع والله يوفقكم بانتخابات السنه الجايه

للعلم هالرد على الاخوان الافاضل جميعهم وليس فقط المقتبس كلامه وشكرا جزيلا

[نسل الطويل]

الحمدلله فيه واحد تحرك وتكلم <<< ؟؟؟؟؟

ياليت توضح جملتك اخ راشد يعني الباقي وش بالظبط ؟



بعدين كلمتش ارد عليهم ليش تحسسنا ان حنا خندقين ؟وان فيه حنا وفيه انتم
بالعكس كلنا واحد ومو الانتخابات والقوائم تفرق بين عيال العم :)


وانت على قولك ما ترضى على الائتلافيه يعني مطفي النور سواء صح او غلط معهم :)


بعدين فالاتحاد الشيعه لهم قائمه واللبراليين لهم قائمه شكو ياثرون علينا ؟

وليش يضايقك ان الائتلافيه اخوان ؟
ايه نعم اخوان وللنخاع بعد
ودامك ما ترضى على الائتلافيه شوف المناصب اللي فيها المناصب الكبيره اقصد :)
شوف من ماسكها اغلبهم من جمعيه الاصلاح << قول مو اخوان ذولي بعد

وحتى الائتلافيه تقنعني ان الطلاب يجونها يقولون حنا نبي مناصب وحنا نبي ؟
اكيد كل قائمه تجي وتعرض المناصب اللي عندها للقبيله او للاشخاص اللي تبيهم

بعدين سؤال لك وابيك تجاوبني عليه وتحلل اجابتك

ايهم اكبر القبيله او القائمه ؟
ياخي بالعقل اصلا مافيها مجال مقارنه وشلون تبي قبيله تمثل توجه قائمه ؟

وان كان قصدك الاخلاق كل واحد يمثل خلقه اللي تربا عليه ولاتغيره قائمه او غيره :)

بعدين لو تبيها بالديموقراطيه الحقه انت مالك شغل في اهلك وين يصوتون ؟
يعني ما تجبرهم هنا او هنا لان هذا قرارهم وهم يختارون من يمثلهم

ونفس الكلام اللي قلته لغنوجه اعيده لك << ياليت قبل لا تجادل تقرا وتفهم

الطالبات 185 (مدري شلون صاروا 300 :) )وشلون تبيني انا يامرشح استشيرهم ؟ وفيه بنات ما يرضون لهم اهلهم حتى يصوتون شلون اخذ رايهم فالقائمه ؟

وانت جاي تلوم 17 رجال ماخذوا فراي بنات ولا لمت بنت ماخذت فراي 17 رجال ؟ وش ذا التناقض عندك ؟


ونفس السؤال اللي سائلته غنوجه ولا جاوبت اسالك اياه << بما ان كلامكم واحد

هل في لجنه من العجميات تتبع اي قائمه ؟؟ لان اذا فيه ولا استشرناها لك ولغيرك حق يلوم ويشره

لكن اجمع 185 طالبه وغير اللي مايتدخلون فالانتخابات لظروف عائليه ؟

فعذر انك ما استشرت البنات عذر وااااهي وانت تدري انه مستحيل ولكن من باب تضعيف موقف الطرف الاخر :)

بعدين بما انك تنتمي لقائمه اسلاميه وما شاء الله :)
مالك حاجه تكلم في البنات صح ولا لا ؟ حتى لو كانوا سفور والا مايلبسون عبي ؟؟
هذا تخصص اهلهم ولا له علاقه فموضوعنا ؟ << والا نظام لقيت ملاحظه على القائمه ما اراعي مباديئي؟

واخلاق البنات ما نتكلم فيه << مدري ليه مصر تخلي الدعوه اخلاقيه انت :)
وكلن فيه صالح وطالح وكلن فيه طيب وردي

وانت كلامك ما فيه منطق ولا فيه اهتمام بمصلحه القبيله << يعني لا حميا ولا عقل :)
بس مجرد انا ما ارضى على الائتلافيه اذا انا ضد المستقله

واستغرب انك تكلم بلغه الطالبات اللي فيه من يمثلهم فالمنتدى ويقدر يتكلم ولكن هوس الائتلافيه اعماك عن المنطق والتفكير قبل لا تحط نفسك في ذا الموقف


ولا تقارن التزام العوازم بغيره وهذا شي واضح للكل وتثبته الارقام << ولا طريت العوازم الا انك تدري انهم فالمستقله وتبي تضعف من موقفهم معنا

وعموما اكرر جملتي اللي في اخر كل رد
كلن حر بصوته وفي نفسه قبل صوته

ولك كل الاحترام اخي راشد :)

تقبل

[Stranger]

الحمدلله فيه واحد تحرك وتكلم <<< ؟؟؟؟؟

ياليت توضح جملتك اخ راشد يعني الباقي وش بالظبط ؟

غصب يعني اطلع اتكلم واغلط عليكم لاحول ولا قوه الا بالله
اللحين الاخ اللي انشق مو مستقله اوكي الحمدلله انه تكلم وتحرك وان شاء الله الباقي بالطريق ينشقون عن المستقله ,واضح ؟


بعدين كلمتك* ارد عليهم ليش تحسسنا ان حنا خندقين ؟وان فيه حنا وفيه انتم
بالعكس كلنا واحد ومو الانتخابات والقوائم تفرق بين عيال العم :)

)) يا ليل يعني الواحد مايصير ينقل المايك من إلى ؟:p ياخي انتوا اللي تفرضون النوايا السيئه ماغلطنا عليكم انا ماحب المستقله مو ما احب عيال عمي ؟

وانت على قولك ما ترضى على الائتلافيه يعني مطفي النور سواء صح او غلط معهم :)
لا منو يقول ؟, يعني انا احب قائمه خلاص ارضى بالغلط لا مو صحيح

بعدين فالاتحاد الشيعه لهم قائمه واللبراليين لهم قائمه شكو ياثرون علينا ؟
انا تكلمت على الاتحاد ؟ جبت طاري الاتحاد بشي ؟ انا اكلمك عن الجمعيات بالكليات وانت تدري انهم بكل كليه يصوتون للقائمه اللي ضد الائتلافيه والاتحاد الاسلامي

وليش يضايقك ان الائتلافيه اخوان ؟
ايه نعم اخوان وللنخاع بعد
انت تدري انه الائتلافيه قائمه الاخوان والسلف انا يضايقني انك تقول اخوان ومادري شنو كأنهم كفار ولا خطر على ملتنا ؟ اللحين تتحد مع الشيعه والليبراليه بالمستقله وتطلع لي بعذر انه الائتلافيه اخوان اووه قويه مانقدر نصوت لهم ؟! شسالفه ؟ وهالاخوان يتفقون معانا بالتوجه والفكر هالاخوان يسعون لمنع الاختلاط اللي المستقله مره تصير معاه ومره ضده على حسب نسبه الليبراليه اللي فيها بكل كليه وبكل سنه ؟ والوسط مو بكل الكليات نازله وانت تدري فلا تقول لي عذرك القديم انه لهم قائمه بالاتحاد وانت تدري اني اتكلم عن الكليات

ودامك ما ترضى على الائتلافيه شوف المناصب اللي فيها المناصب الكبيره اقصد :)
شوف من ماسكها اغلبهم من جمعيه الاصلاح << قول مو اخوان ذولي بعد

خير يبا انتوا تدرون اي شي ؟ انزين من جمعيه الاصلاح جمعيه الاصلاح بشنو ضرتك ؟ بشنو أذتنا حنا ؟عجيب أمركم


حتى الائتلافيه تقنعني ان الطلاب يجونها يقولون حنا نبي مناصب وحنا نبي ؟
اكيد كل قائمه تجي وتعرض المناصب اللي عندها للقبيله او للاشخاص اللي تبيهم

بعدين سؤال لك وابيك تجاوبني عليه وتحلل اجابتك

ايهم اكبر القبيله او القائمه ؟
ياخي بالعقل اصلا مافيها مجال مقارنه وشلون تبي قبيله تمثل توجه قائمه ؟

حنا عيال القبايل اغلبنا ناس محافظه وملتزمه صح ولا انا غلطان ؟ اللحين انا توجهي اسلامي محافظ وين اروح ؟ اروح وسط ؟ لا , اروح اسلاميه ؟ لا , اروح مستقله ؟ لا , اروح ائتلافيه نعم , ها ان شاء الله وصلت الفكره ؟ القبيله ماتمثل توجه قائمه , القائمه تمثل توجه الناس ومن هالناس هالقبيله

وان كان قصدك الاخلاق كل واحد يمثل خلقه اللي تربا عليه ولاتغيره قائمه او غيره :)

مو قصدي اخلاق

بعدين لو تبيها بالديموقراطيه الحقه انت مالك شغل في اهلك وين يصوتون ؟
يعني ما تجبرهم هنا او هنا لان هذا قرارهم وهم يختارون من يمثلهم

اهااا يعني انت و17 واحد مالكم شغل بهالبنيه اللي اختارت التربويه , انتوا تدرون بتوجه اغلب بنات القبيله ليش تغصبونهم على توجه مو لهم ؟ انتوا تدرون انه اغلبنا نصوت للائتلافيه ليش تروح وتختار قائمه ماتمثلنا وعقب تقول انها غلطانه ؟


ونفس الكلام اللي قلته لغنوجه اعيده لك << ياليت قبل لا تجادل تقرا وتفهم
كلامك متناقض مره كذا ومره كذا ولله الحمد حنا نقرى ونفهم :)


الطالبات 185 (مدري شلون صاروا 300 )وشلون تبيني انا يامرشح استشيرهم ؟ وفيه بنات ما يرضون لهم اهلهم حتى يصوتون شلون اخذ رايهم فالقائمه ؟
وانت جاي تلوم 17 رجال ماخذوا فراي بنات ولا لمت بنت ماخذت فراي 17 رجال ؟ وش ذا التناقض عندك ؟
انا قلت اني مو بكليتكم وكان الرقم افتراض على انه البنات اكثر منكم
اي ادري وانا ماقلت لك استشيرهم انا قلت انت تدري انه توجه العجمان اسلامي محافظ شكو رايح مستقله , ياخي انا الومكم يوم انكم تجون وتوزوعون مسجات على بنات العجمان وتقولون حنا مستقله ومادري شنو يعني غصب طيب صوتوا لنا خير يبا رايح قائمه ضدنا وتبينا نصوت لك ؟ انت غلطت بالاختيار بناتنا شكو فيك ؟


ونفس السؤال اللي سائلته غنوجه ولا جاوبت اسالك اياه << بما ان كلامكم واحد

هل في لجنه من العجميات تتبع اي قائمه ؟؟ لان اذا فيه ولا استشرناها لك ولغيرك حق يلوم ويشره

لكن اجمع 185 طالبه وغير اللي مايتدخلون فالانتخابات لظروف عائليه ؟

فعذر انك ما استشرت البنات عذر وااااهي وانت تدري انه مستحيل ولكن من باب تضعيف موقف الطرف الاخر

وليش تصير لجنه من العجميات ؟ مافي لجان قبائل ضمن القوائم
ومره ثانيه اقولك انا ماقلت لك استشيرهم بس لاتتخذ قرار عنهم مثل ماسويتوا وطلعتوا البنيه غلطانه اللي بالتربويه خير يبا ؟ لا تتخذ قرار عنهم ولا تقول لهم صيروا مع عيال عمكم وهالسوالف لي رحتوا قائمه سنعه ذيك الساعه تكلم مو رايح لمستقله وتقول لبناتنا ادعموا عيال عمكم مثل العازميات


بعدين بما انك تنتمي لقائمه اسلاميه وما شاء الله :)
يلا الفال لك :D

مالك حاجه تكلم في البنات صح ولا لا ؟ حتى لو كانوا سفور والا مايلبسون عبي ؟؟
هذا تخصص اهلهم ولا له علاقه فموضوعنا ؟ << والا نظام لقيت ملاحظه على القائمه ما اراعي مباديئي؟

واخلاق البنات ما نتكلم فيه << مدري ليه مصر تخلي الدعوه اخلاقيه انت
وكلن فيه صالح وطالح وكلن فيه طيب وردي


ياخي انت اللي عيب عليك مقولني حكي عن البنات متى تكلمت باخلاقهم ؟
انا قلت على السفور انت تبي اهلي يصوتون لناس تمثلهم مو صحيح ؟ انزين منو يمثلهم بهالقائمه ؟ بناتهم نصهم سفور مايمثلون بناتنا فلاتطالب منهم يتبعونكم وين مارحتوا مع اي قائمه اختاروا عدل وتعالوا طالبوا عقب


وانت كلامك ما فيه منطق ولا فيه اهتمام بمصلحه القبيله << يعني لا حميا ولا عقل
بس مجرد انا ما ارضى على الائتلافيه اذا انا ضد المستقله

اكيد كلامي مافيه منطق دامني ضدك ماراح يصير يعجبك

ياخي انتوا اللي ماتهتمون بمصلحه القبيله اللحين شدخلها القبيله بانتخابات كليه ؟ المصلحه بس بتجيك انت وربعك اللي تترشحون لمناصب بهالقوائم وغصب تدخلون القبيله بهالامور ؟
ومره ثانيه اقول كلامي لاني اخاف على قبيلتي ومابي تصير نفس العوازم اللي طالب ينقي وين المنصب ويدخل قبيلته بين الشيعه والليبراليه بس عشان منصب ,
اي ماارضى عالائتلافيه شعندك ؟ اللحين لاني مع الائتلافيه خلاص صرت مو عجمي ماحب العجمان لانك انت وربعك قررتوا انكم تدخلون بالمستقله بالتريبه ؟ استغفر الله


واستغرب انك تكلم بلغه الطالبات اللي فيه من يمثلهم فالمنتدى ويقدر يتكلم ولكن هوس الائتلافيه اعماك عن المنطق والتفكير قبل لا تحط نفسك في ذا الموقف
خير يبا اللحين انت وربعك داشين عالاخت الفاضله بشراع وميداف ولي جيت ودافعت لما مصختوها صرت مالي شغل وبس اتكلم بسبه هوس
بتكلم باللي اشوفه صح يا نسل الطويل وماراح اسكت عن الحق حتى لو كان ضد الائتلافيه قائمتي العزيزه
ومااعتقد في قرار يمنع اني اتكلم عن اخواتي الطالبات دام اني اشوفكم غلطانين بحقهم


ولا تقارن التزام العوازم بغيره وهذا شي واضح للكل وتثبته الارقام << ولا طريت العوازم الا انك تدري انهم فالمستقله وتبي تضعف من موقفهم معنا
لا يبا مادري عن العوازم وقلت لك اني مو بكليتكم انتوا اللي طريتوا العوازم وانا جبت لكم مثال عن اللي عندنا انه مو دايما البنات يتبعون الشباب لانه الشباب يركضون ورا المناصب ومايفكرون باغلبيه طلبه وطالبات قبيلتهم شنو توجهم وجبت لك مثال عن عوازم الهندسه وشنو سوا ومادري لا عن كليتك ولا منو يمثلها

وعموما اكرر جملتي اللي في اخر كل رد
كلن حر بصوته وفي نفسه قبل صوته

ولك كل الاحترام اخي راشد :)
ولك مثله كذلك:)


تقبل
تقبلت

[ابو بطاح]

كل القوائم فيهاسيئيين تخرب عليها
لكن تبقى الائتلافيه افضل الاسوء

[kj99]

بالرغم من اني عضو بالقائمه الائتلافيه سابقا...الا انها حركه مالها داعي من الاخ المنشق...

[ذهب]

الـسـلام عليكم ورحمة الله وبركاته



أولاً بما إن الموضوع الأساسي عن إنشقاق عبدالله العجمي:
اوافقك اختي غنوجه الرأي فالإنسان حر بتصرفاته وجزاه الله خير ان انشق من قائمه بلافكر
حتى لو كان هالإنشقاق بالوقت الضايع بما انه سيتخرج
وللعلم فقط عبدالله العجمي مشهود له بأخلاقه العاليه بأوساط الكليه وانضمامه ودعوته
للأوساط الطلابيه للتصويت للإسلاميه التربويه مكسب لهذه القائمه المميزه





أما بالنسبه لدعوة الاخوان العجميات إلى التصويت للمستقله بما اني عجميه وادرس بكلية التربيه واعرف بنات عمي وكلهم خواتي ورفيقاتي اقول لهم صدقوني الكل مع التربويه
قائمه نهجها إسلامي وسطي وتتحالف مع السلف بإنتخابات الإتحاد ماتبونا نصوت لهم
هذا من باب التوجه
اما من باب الخدمات الطلابيه راح نصير ناكرات جميل اذا ماصوتنا لهم هالقائمه احتضنتنا من اول مادشينا الجامعه وقدموا لنا من الإنجازات وفتح الشعب وغيره وغيره الكثير الكثير

وبالمقابل ماذا رأينا من المستقله؟؟

اذا بتكلم عن كليتي بنات المستقله مايحترمومنا واقولها لكم بصريح العباره واكثرهم حضريات وشيعيات ويكفي سالفة توزيع الشيعه لمنشورات نكت على الصحابه واعتراف المنسق العام السابق محمد المطوع وقدام الكل ببرنامج على قناة الوطن وقال احنا نملك الشجاعه ونعترف واذا تبون الدليل ترى الحلقه محفوظه باليوتيوب


وبالنسبه لقولكم الإخوان وشفيهم الإخوان مسلمين سنه ومحافظين واحنا قبيلتنا محافظه
ومانبي نصوت لقائمه اعيال بطنها ربع الجويهل والشيعه إللي يسبونا الصحابه رضوان الله عليهم


فالقضيه قضية فكر ومبادىء الله راح يحاسبنا على الصوت

لذلك نقول لكم اسمحوا لنا


الصوت إجباري


للإسلاميه التربويه



والله ينوّر بصيرتكم وتنشقون من هالقائمه

واحنا والله يعز علينا ان اعيال عمنا في قائمه ونصوت لغيركم


لكن رضا الله أول


والله يهدي الجميع يارب

[العنفوآن]

^^

جزاج الله خير,,وجميع من شآرك وأبدى رآيه بالموضوع شكراً



والله يوفق الإسلآميه التربويه>>ويوفق كل قائمه اتخذت الإسلآم شعاراً ومنهجاً