ديــــــــــــــ الشاعر ضيدان بن قضعان ـــــــــــوان

[(سعد بن محمد)]

هزك الشوق



هيه يالي اغراك الليل واغراك النديم
هيه يالي هزك الشوق والمسرى ضياع
وقفي بين الخطأ والصراط المستقيم
وقفي بين التراحيب وكفوف الوداع
سولفي مثل المشاريه في صوت الحشيم
واسكتي مثل الشفايف لاطاح القناع
واضحكي مثل النواويير في روضة خريم
واغربي مثل المزاجات في غرب الرفاع
وابعدي مثل المتاهات في حلم اليتيم
واقربي بين السوالف وكتفي والذراع
وانظري لي نظرة الشوق للشي القديم
واغرقي بالدمع الازرق مضاليل وساع
واصبري مثل المسافات في صبر الحليم
واسمعي صوت الهوى يوم فليت الشراع
يوم صرتي عود ريحان ورضاي النسيم
واصبري يانجمة الصبح مال الصبح داع
قد طلبت الله وانا بين زمزم والحطيم
شوفتك ياغلا سميه لاصرتي رباع
العيون تجوع تجوع والله العظيم
والعشى في عيونك السود وعيوني جياع
ان عطيتي مايرد الكريم الا الئيم
وان بخلتي قلت تكفيني والدنيا متاع
اقبلي يامثل التباشير في وجه الكريم
وارحلي مثل التعازي على موت الشجاع

رديـّة مع الشاعر سلطان بن وسـّام


يامرحبا عد مالاح بارقها
بالصاحب اللي تعنى علشاني
كانه رفيقي على اللين والشده
كله علشان لاحي وليحاني
ياالهاجري بندقك لاتعلّقها
مادام في ديرة القوم عرجاني
واللي مع الهاجري مايقف ضده
كله علشان لاحي وليحاني
ياراعي الساعة اللي دقايقها
أطول من أيام غره وشعباني
بالله لاتحسب الوقت وتعدّه
كله علشان لاحي وليحاني
ياليت لك حلة ماتفارقها
مادام أنا وانت صربي وشيشاني
والحلف لابده يزول لابده
كله علشان لاحي وليحاني
أم الكبائر بعد شاب مفرقها
طبت على حيد ناري ودخاني
ضربة بلنتي وهجمات مرتده
كله علشان لاحي وليحاني
سلمت لحيتك لأحمد وحلّقها
الشغل مجان والموس مجاني
لكن لاترخي الحبل واشده
كله علشان لاحي وليحاني
ياملفق السالفة لاتلفقها
أرجوك لاتِزعل قبور جداني
والوقت قاسي والأوضاع مشتده
كله علشان لاحي وليحاني
وان شفت أنا القوم رزت بيارقها
وابي على نطحة القوم وصاني
أُقدم وكلٍ يوقف على حده
كله علشان لاحي وليحاني

بنت الشيوخ

بنت الشيوخ اللي يسمون العنود
من كثرها يا زين حتى قلها
وان ذعذعت لي بالهوى مع كل نود
يا مل عيني بالهوى يا ملها
البارحه هبت على صوت الرقود
وأنا على ميعادها شفقٍ لها
طرقا بهمستها تعدّيني الحدود
مير أحترم مقامها وجلها
ما في مواريث الفهود إلا الفهود
وأنا مواريد الذياب أدلها

أضحى الضحى


أضحى الضحى وأنا على رجمٍ بديته من عصير
أدرى خواطر كايد العجمان من منقودها
رجمٍ جنوبي طلعة العشّار شرق أبو ظهير
غربٍ من الصرار والونان أشوف حدودها
ومحمد بن سعود بن حثلين غير الناس غير
إمّيزه ربي خوال وقدها وقدودها
حفيد من جابه معزي كنه الداب الضرير
مع ابن لامي والدويش اللي يقود فهودها
عمود حمران النواظر كلهم قايد مطير
يوم الفغم والسور حراس البلد وجنودها
النوخذه



العذر لويحسب على الرجل تقصير
فرضٍ ليا اخطا للرياجيل يبديه
وبعض الخطايا تحتملها المعاذير
وتدمح وتحسب شبه غلطه وتنبيه
وبعض الخطايا مالها اي تبرير
ولاعاد فيها لا لماذا ولا ليه؟
لكن على شان الرجال المناعير
يدمح خطا المخطي من الهيه للهيه
الا ليامن عادها عقب تحذير
واخطا علي بالعمد مالله بحاديه
واصبح بحلقي من حساب الزارير
وبذ الخفا واطغى غروره تماديه
آقف واضيع كل حشمه وتقدير
ومن قال ياضيدان؟ ماقلت لبيه
واجيه لو دونه جموع وطوابير
واسوي اللي ماتمنيت اسويه
واللي يصير يصير ويصير
لابو صبيٍ مايعادي معاديه
واهل النخل لوحسبوا للعصافير؟
ماتهيوا ماء بيرهم في سواقيه
والنوخذه لو ما احتمل للاعصاير؟
امداه لاقفى يقطع الياس راجيه



الجادل

حببتي والقلم يشره على أوراقي
وأوراقي البيض للمشروه خضاعه
خذت القلم والعيون تخيل براقي
وأمطر قصيدي على صيفه ومرباعه
هلت سحايب قصيدي فايح اشواقي
وانبت جمالك قصيدي باجمل انواعه
يامن جماله تعدا هقوة الهاقي
خلا قصيدي على النفنوف دراعه
واقول للناس هذي عز ميثاقي
اللي لها لين اموت السمع والطاعه
الجادل اللي من اهل المستوى الراقي
رفيعة الذوق للمعلوق مزاعه
الله فرقها على زينات الاخلاقي
بيت الشرف بيتها وتعيش برباعه
بنت الترف واسم ابيها درعها الواقي
والخال شيخ يحوش الطيب بذراعه
من ماكر مالجابه كل نعاقي
ماكر حرار تشوق العين طلاعه
ريحانة في ظلال وتحتها ساقي
من دونها الموت والسلال واتباعه
خذت من اوصاف يوسف كل ما لاقي
زعيمة الحسن مياسه وجزاعه
ان اقبلت قلت ماتت لوعة افراقي
وان دبرت قلت عاش البين واوجاعه
وان وقفت وقفن تلعات الاعناقي
وان عرضت من لمحها دق باصباعه
يخضع لها الراهب العاصي وينساقي
وقلوب الابطال منها شبه مرتاعه
حبيبتي والغلا ماعاد ينطاقي
شرواي ماتدركه فزعاة فزاعه
انتي مدار الفلك وعيونك افاقي
وانا الذي عاش حبك باربع ارباعه
لبيه...لبيه يافيي ومشراقي
ياغلا غلا في حياتي يااثمن بضاعه
يالذ من فرحتي بك لحظة عناقي
قلب وهبته عيونك ترفض ارجاعه
مدامني لك مليك وترفض اعتاقي
قلب يكسب الكنز عاش ومات ماباعه
حبيبتي والقلم يشرب من اعماقي
عساي بينك وبين الشر واطماعه
لا يابعد عمري اللي راح والباقي
ياجعل يومي قبل يومك لو بساعه





العمر مشوار

يا لله ياللي اليا ضاقت تفرجها
يا فارج الهم والضيقات والكربه
يامخرج العبد لا ضاقت مخارجها
عن موقفٍ يطحن السربه ورا السربه
افرج لمن كايد الطرقات ينهجها
لو ماش بكره ولا مزهب ولا قربه
بمرك يهوم الدروب ايلين يسهجها
ولولا الرجابك قصر ممشاه عن دربه
ثم الرجا في رجالٍ ما يخالجها
في نفوسها شك والطيب تفاخربه
شرواك ياللي اليا صكت نعرجها
صوبك شمال الشموخ وشرقه وغربه
ننصاك نرثعبها ولا ندرجها
ومن شاف وجهك نسى الهم وتباشربه
يامن تسر النظر والنفس تبهجها
أنا أشهد ان العيون لشوفتك طربه
لو حدها عنك شيءٍ قام يحرجها
من علةٍ جات والاوضاع مضطربه
والعله اللي نحولي من نتايجها
ليه أتعبر بها يالهرجه الذربه
لا صار صبري عليها ما يعالجها
ماعاد لي عذر وش عاد أتعذربه
هب الهوى والسفينة قام يدرجها
موج يهول العقل في جمبها ضربه
اما نطحها الهوى ولا تولجها
ولا كل من غربوا عادوا من الغربه
البحر غدار وامواجه تموجها
يخفي المنايا وصوت الموت يجهربه
الاقدار تخفى نجومٍ في توهجها
ويموت ميعادها اللي كان تظهربه
قلته والايام مدخلها ومخرجها
ماهوب مثل الجمال اللي تظاهربه
عادات الايام لو يغري تغنجها
لا بد بين الضلوع تمكن الحربه
ومن لا يشد الرسن بيده ويسرجها
ويضرب بها كل ربعٍ كايدٍ ضربه
يموت من ونةٍ ماأحتال يزعجها
وحسبه على اللي عن اليمه تياسربه
وكثر القنوات ومتابع برامجها
ما تلحق الرجل مقصودٍ يفكربه
والايام كثر الترف فيها يسمجها
والعمر مشوار والرجل إيتعبر به




سديري وطاقية


كفى يا الأمير أرجوك يكفي كفا يا أمير
ترى الخال مايسمع نصيحة بناخيَه
وترى يا طويل العمر ما عادني بصغير
كبرت ودريت بما عليَه..وماليَه
وترى يا طويل العمر ما ينفع التفكير
على واحد ٍ ماله عن اللي يبي نيَه
أقوله وأنا يامير ما عادني ببخير
على بنت ٍ شيخ في عبايه ملوكيه
طموح ٍ على شاني وأنا شايم ٍ عن غير
هواها..ولا فكرت في ذي ولا ذيَه
وإلى هب نسناس الهوى للحزين عصير
وربط غترته من تحت حلقه بأياديَه
ويم بوجهه للهوا وقم حومة الطير
وتنهد..وون..وحط ايديه بمخابيَه
تذكر ذعاذيع الهوا يوم كان صغير
يوم ان أكبر احلامه سديري وطاقيه
وقفَا وهو مابين واقف وبين يسير
ووقف..من جديد وحط ايدينه فأذانَيه

ياباشة الروم


يا باشة الروم لا تطلع على متني
اطلع على متون رومك وانت شرواها
انا مسير فقط والرجل جابتني
من دار حكام نجد اللي انت بحماها
يما اكرم الضيف باول فوح لا يثني
والا اترك الداب وشجرته ودعواها
لو ادرى مجلسك والبرد بيتني
ماني من ربعك اللي تفهم لغاها
جعلك فدا وقفتي لو جلستي حتني
وحبة خشم وانت قاعد جعلك فداها
مابيع نفسي لو الايام باعتني
ولا جيت ادور الإهانه واتمناها
الحاجه اللي على شرواك حدتني
والا انت مانت بقد النفس ورضاها
ياللي على دارة الأقدار ساقتني
ميز هدير الجمال وميز رغاها
بداية الدرب عن تاليه كفتني
بشعب ذلولي عشاه يطيب مسراها
من يوم شفتك الامام وتشرب التتني
حرمة اصلي ورا اللي تجلد لحاها




يامرحبا




يامرحبا ترحيبةٍ كلها لش
تكسيش من راسش ليا حد ماطاش
من قلب مهيومٍ بحبه صفا لش
يلعب به الغربي ليا سمع طرياش
يفرح ليا من قالش كيف حالش
ولولا غلاش وحشمتش كان ما جاش
وان قلتي انه غايتش شف بالش
كأنه ملك يعرب من الطاش للطاش
يابري حالي كيف مالي ومالش
لا والله الا لي ولش لعنبا اللاش
من هامتي لي محزمي لش حلالش
بيتش فديتش واسكني وسط الجاش
اما ابتلشتي بي وانا فيش بالش
غديت كأني من شرى علته كاش
انا في وجه امش وابيش وخوالش
ما اجيش لي حاجه واعود على ماش !

خطر غصن القنا

أنا .. أنا وأعوذ بك يارب من كلمة أنا
عبد وهبته من بديعات المواهب ماوهبت
آمنت بك وأسلمت لك أمري وأناوأنا وأنا
المنتهي كل أربعاء والمبتدي في كل سبت
أخاطب عقول الرجال الفاهمه وانا هنا
وان شاء ربي ثم أمرني ماتحاكيت وكذبت
أجمل نساء الارض غنت لي بصوت ((الله لنا))
وأنا الفقير اللي رزقه الله بمرعى كل نبت
طرقا عرض فستانها الازرق خطر غصن القنا
نازل على الوادي بنا يشرب وانا قبله شربت
حبيتها لين انفرط سلسالها بعد وعنا
وأبعدت عنها في حياتي كثر ماعنها قربت
قولوا لها يا أجمل نساء الارض ((أما آن لنا))
أن ننهي الحلم القديم ونكبت الغايات كبت

لبّا عيونك


لبّا عيونك ولبّا خدّك وخاله
ولبّا المحيّا ولبّا الليل والشّفّه
فديت عمرك بتجريحه وغرباله
لو تشربه لارض غيره والبحر جفّه
هلّي كما البدر غيضي كل حفّاله
وسجّي عن الليل لا يلهيك في صفّه
وهزّي على صوت رجف القلب وهباله
الطار قلبي وكفٍ توجعه شفّه
يا شفّة العين قبل تجين جمّاله
وجيتي ولا شفت غيرك لو رفع كفّه
كنّك لحالك حضرتي الحفل فالصاله
ولا شفت غيرك بشر يا قمّة العفّه
أنتي زعيمٍ رفع للقوم فنجاله
وكلٍ تعذّر شروبه ليلة الزّفه
وانتي بيمنى الحلا والناس بشماله
ثقيلة العقل فيك الدم يا خفّه
احيي قصيدٍ بغيت ابكي على اطلاله
في غيرك يموت لو أحييه وازفّه
وان عوّدت للغلا غلاك بلحاله
أنتي بكفّه باقي الناس في كفّهلبّا عيونك


يا وجودي


ياوجودي كل ماهب نسناس الشمال
وجد من حدّه زمانه على اللي ما يبيه
وياوجودي كل مااغفيت ثم مال الظلال
لاغفت عيني ولاذقت شيٍ مشتهيه
وجد من قفّى وهو في رجا كلمة تعال
والتفت من عقب مااقفى ولحدن لدّ فيه
وياعذابي لادنا الليل من روس الجبال
وانتهى يومٍ من العمر ماعاد ارتجيه
وانتي ابعد من سما الحلم ووصالك محال
يابعد من هلّ دمعي ضحى الفرقا عليه
ياغناتي لاتحسبين دمعي يوم سال
ضعف والاّ خوف والاّ كذا والاّ كذيه
والله اني من رجالٍ يضدون الرجال
لكن الحظ الردي ساق دمعي كلبيه
ووالله اني كل مادار حوليك الجدال
قمت كن الموت يشر على قبري يإيديه
ووالله ان قد لي وانا اصد لاجالك مجال
صدّت اللي لاتضايق تذّكر قبر اخيه
ومن سألني قلت مدري واذا عاد السؤال
قلتله تكفى سؤالك ترى ماهو وجيه
وش تبيني اقول عماََ ترى ذبحي حلال
والخطا منها علي صرت احبه واهويه
عذرها لو ماتعذر مثل واضرب مثال
واحدن مايعرف الحر الأشقر يشتويه
وان رجعنا للتواصيف لله الكمال
لا انتهى ليل المزايين جاتك تبتديه
كنها غفلٍ مع البدو طاويها الحيال
ما يميز وصفها الاّ نبيهٍ من نبيه
واهني اللي وصلها وذاق امن الزلال
رشفةٍ مع غفلة الناس من فيها لفيه
واعزتي للي سواتي عشق ما لا يطال
ويوم طاله ضيع الحلم بين أمه و ابيه
يااول احلام الطفوله على حد الخيال
الرجا بللي حمى البيت من حملة بريه
حال دونك سيف عنتر وتاسع حول حال
باثر حولٍ حال دونك وانا ادعي هيه هيه
هيه يللي غرك الحسن واطغاك الجمال
والله ان اموت ماشفت لاوصافك شبيه
لو يسام الحسن والتيه بجنيه وريال
مابقى في سوق غيرك لا ريال ولاجنيه
كيف اهدك للمقابيل وانتي راس مال
راس مال ومال والماال مايعطى السفيه
حافظك حفظي لعيني ورمشي لك جلال
وانتي تشحّين بالما وانا شفّي مويه
شايفن ظلمك وساكت وطال الليل طال
لاتركتي طعن قلبي وانا ماقلت ليه ؟
لو بقا للهيل صبرن على فوح الدلال
مابقى للقلب صبرن على شيٍ يجيه
كنت احسب ان الغلا زال واثره لايزال
في الحشا ماكنه الا دخيلٍ في وجيه
ساقني حبك على الموت وسنيني هزال
والظروف اقسى من الظلم للعرض النزيه
وانتي تسوقين عقلي على حد الهبال
تحسبين ان من بغى شي يقدر يشتريه
والاّ انا ياوجد حالي وجودن مايقال
وجد من ضحى بغاليه لرضا والديه
وياوجودي يااول العمر قبل ألبس عقال
وجد من باع آآخر العمر في رغبة ذويه
وياوجودي كل ماهب صوتش من شمال
وجد من حدّه زمانه على اللي مايبيه


بـرج الـعاج

الدلو والميزان والقوس والحوت
ماغير برج العاج تغري وصوفه
وبرج بقلبي برج لولو وياقوت
لا يا بعد برج الحمام ورفوفه
ما يسكنه غيرك من السيف للكوت
لو ينتحي راس الولد عن كتوفه
علم وكيد بالمواثيق مثبوت
ما هو عذر اللي يفرك كفوفه
والله لا سافر لك لو ارجع بتابوت
وانا من اللي ما ربوا في مروفه
على الشقا لاع الهوى كل شفلوت
وانتي تلوعين الحشا بالطروفه
والوقت للجاحظ والايام هاروت
والقلب حاتم وانتي اغلى ضيوفه
يا مرحبا ترحيبة عقاب يا نوت
والحي يلحق لو تحده ظروفه
صوتك يكفيني عن الشرب والقوت
وشوفك غناتي والحياه مخلوفه
يااقوى من اللوعات واسخف من التوت
وابلغ من البيت الاخير وحروفه
رجل تنادينه ولا يسمع الصوت
خسارة سمعه وصوته وشوفه
ورجل يضمك بين اياديه ويموت
والله ما يلحق حياته حسوفه



المصرعيه


يقول من وقع على تندت الجيب
عصر الخميس بفيضة المصرعيه
عزي لمن جاففوه روس المعازيب
واضحت يدينه من حزامه خليه
ياوجد حالي وجد شالح على ذيب
على طويق اللي ركونه ذريه
وين أنت ياريف الخوي منبع الطيب
يوم ولد اللاش يضهد خويه
ياعين لاتبكين ترا البكا عيب
حتى ولو صكات بقعاء قويه
ويارجل لو جبارتك للعراقيب
ابداية المشراف حقك عليه
لابد ماتجبر اكسورك وأنا أطيب
بإذن الله الرحمن رب البريه
وأبدي عصير بنايفات المراقيب
وأجر صوتي عادها الشمس حيه
وأن كان ماهيضت غيري فلانيب
كفوا تلاحي صوتي الراعبيه
من طلعتي لين أمتلا عارضي شيب
وأنا ورا الهقوات عيني شقيه
أرقى بلعبي فوق لعب اللواعيب
ومن المطالع طلعتي عالميه
أغوص غبات البحر نكس وأجيب
غناة نفس من صباها غنيه
مانيب من يقنع بهزل المكاسيب
ولانيب من يجزي الحساني بسيه
القلب غير الحب مرتاع أصاحيب
والنفس غير العز ماهي دنيه
والكف غير الجود تندا مواجيب
والراس غير الشعر يقدح حميه
عادة هل السمراء هل الشيخ وعضيب
لادخنت يردون حوض المنيه
وإن ساقت الدنيا السرايا مراكيب
تنطح سراياها سريه سريه
علم لمرواسه تساق المناديب
ولا تجيه الصبح وإلا قفيه
وأنا ولد منصور عطب المضاريب
اللي كفوفه في الشدايد نديه
لويالدن مع الخشوم الرعابيب
ماجابن اللي جابت الجابريه



سكر الخط


سكر الخط صبري وصل حده
او تراجع لو الخاطر كسرته
صرت تلعب بقلب منت قده
غربلته الليالي وانت بورته
عقب ذيك الموده صرت ضده
ولو تجاهلت حبك مانصرته
بين مزح الزمان وبين جده
لا قبلت الغرام ولا نفرته
كنت اقدر غلاك وكنت اوده
قبل ساعات لكني خسرته
حتما انسى الغلا لو بعد مده
وان ذكرته نسيته ماذكرته
شي عادي وسد الخط سده
يلعن الليل كان أني سهرته
ويلعن الحب ويلعن جد جده
انتهينا وسعيك ماشكرته
يمر القلب



يمر القلب من دار وراء الخفجي طريق ودرب
وامرك يالطريق اللي لك اقدامي مصخرها
واذا مريت مع ذاك الطريق اللي يجي من غرب
ذكرت أحلى ليالينا من اولها لآخرها
ومريت الحشى بالونه اللي ماجذبها طرب
ومريت العيون بعبرتن للدرب ذاخرها
وشفتك في خيالي بين طيات الدفى والقرب
وناديتك فديتك خل ايدينك لا توخرها
عفى الله من ظميان حصل الماء في الطريق وشرب
وعفى الله عن ليالي ماجهلنا في اواخرها
عقلنا وألتطم حب المواجه يالعفيف الذرب
كما موج لطم في غبة واغرق بواخرها
وسقت الرجل صوبك ياحبيبي والليالي جرب
ولا اهتميت في ناس تبي ترفع مناخرها
حبيبك ياحبيبي من سلالة اهل دروع وحرب
ولايعشق من اصناف الجواهر كود فاخرها
تفاخر يابعد من حطله بين الحنايا درب
تفاخر وأفتخر واغلى القصايد فيك اصخرها
واذا مريت مع ذاك الطريق اللي يجي من غرب
تذكرت احلى ليالينا من اولها لآخرها



هبايب نجد



ذعذعي يا هبايب نجد لاطاب نوم السالي
وانعشيني بريح من رضى نجد للشرقيه
رحمة الله نسناسك على غترتي وعقالي
كأنه الوصل والبيد شهباء والدير محميه
مرحبا يا هبايب ياهلا وان خطر في بالي
صاحبن مانساني مرحبا به على طاريه
يحسب اني نسيته وانجلا همي وغربالي
واثرني مانسيت اللي سبا بالهوى عانيه
وكل ماهب نسناس الغلا من ديار الغالي
هب في القلب من ريح الصبا عبرتن نجديه
وان جحدت الدموع من الملا آه واعزالي
وان غشتني دموعي لعنبا الحب والحنيه
والله اني صبور والبلا ياصرايم حالي
لاتذكرت دمع ماغبى لو جحد راعيه
واحدن ماجحد حبه ولا شمت العذالي
جاهر بالغلا حلو النبا من صفات النيه
كان ماله سوا تاج الحلا واسم جد وخالي
وصار بلقيس وفؤادي سبأ والحشا واديه
وله جموع تنادي بالولاء منتخبته الوالي
في خفوق حماه من الظبا واحرمه وسميه
ولي عيون تحدى وتخلى من كراه الحالي
كأنها تقول للنوم تهبى منت بكفو ليه



الشرفه

البارحه يوم شمس الشعر تسطع بي
وانا أتحرى لشمس الله من الشرفه
ولعي على واحد قبلي تولع بي
مايوم غنى ولا أسهر للهوى طرفه
الين حتى تولع بي وولع بي
نار من الشوق صاليها لحق طرفه
من بعدها ياشقى حالي ويا تعبي
نفسي عن الشعر واهل الشعر منصرفه
مانيب يم الشعر يالشاعر الشعبي
يا بتوع مش عارف !! وشي ما أعرفه
تبي تهز الجبل بمسدس لعبي
والناس من وارد المنصور منجرفه
لاتستفز القصيد ولا ترفع بي
الشعر ماهوب مهنه لأجل تحترفه
وأن كان يا محترف تقدر على لعبي
خلك على جنب لين اشوف لك صرفه
ما أحد عبالك ولا لك عندنا معبي
يا كود باب مداه أكبر من الغرفه
وأنا من الناس ياسهلي ويا صعبي
بحر تشوفه ولاتقدر على غرفه
مسكون بالشعر من راسي ليا كعبي
والشعر ملكي وكل الناس معترفه
أنا (ملك) مير يوم أصبحت من شعبي
حذفت تاج القصيد وصابني قرفه




انعست عين الغلا


انعست عين الغلا والهوى هدا
خانت الايام والملح والعشره
وابتديت تشوف نفسك وتتحدا
وأنت ماكنت تتغلى ولا تشره
كنت مجروحي وصرت الدوا والدا
كنت آآه صرت آآهات منتشره
غلطة اللي بالمحبه أخذ وأدا
واعترف لك بالغلا وابصمت عشره
الهوى جاب الغلا والهوى ودا
وأنت وجروح الزمن بالحشا خشره
يابعد من مابعد جا ومن هدا
ويابعد من ساج روض الحشا نشره
يوم صار الحب جزيه ولك تدا
والقصيد اسهل من كتابته نشره
خذ قصيدي ياشذا الورد لاندا
وأنتبه لي واستمع موجز النشره
والله أنك بالغلا فارق جدا
مثل فرق الابتسامه عن الكشره



العيون

يا مرحباً ترحيبةٍ تجرح الروح
لا ني بقايلها ولا ني بساكت
تقولها عيني وأنا اصد ما بوح
من الزعل وورود الاحباب شاكت
باللي لفت عقب البطا تلعن النوح
بعيونها لو كان هي ما تحاكت
عينٍ لعيني تشكي البعد وتفوح
بدموعها والعين الأخرى تراكت
على الجفون وما لها أي مصلوح
سوى رضى اللي في لقاها تشاكت
كنت أحسب اللقيا مسرات وفروح
واثر العيون ليا تلاقت تباكت

حي الله اللي



حي الله اللي ليا ابطى واق له ويقه
حيى بها اللي من الوحده نفد صبره
البارحه ليلٍ اغفي منه وافيقه
كني عليل يوايق به على قبره
واخوي سلطان مثلي ناشفٍ ريقه
جاني كتابه وزود عبرتي عبره
يالله يا كافلٍ عيشة مخاليقه
عليك ياللي عليك الحل والدبره
والشمل يابو محمد لم تفريقه
للمعتبر يا رفيع المنزله عبره
وان كان ما الله وفقنا بتوفيقه
لو نشبر ايامنا ما هي بمنشبره








صفحات الشقاء


يلي على وجهي قريتي كل صفحات الشقى
اقري وأنا باكتب قصيدة واشعل الساحة حريق
باقي كثر ما راح واللي راح نصف اللي بقى
وان ماوصلت لغايتي باموت في نصف الطريق
يابنت يوم امطر غلاك بقلب ضيدان وسقى
تدرين وش سبة شقاه وسبة الجرح العميق ؟
شقاه من يمناه واسم الشيخ والنفس امحقى
والجرح منك ياأعذب العذبات يالموت الرقيق
يا بنت ما دام البدو تخلف هقاوي من هقى
وانا بدوي مني يشيل من الزمن ما لا يطيق
ابفتخر حنا بدو نعشق على وضح النقا
حنا بدو فينا الولد للقمة العليا عشيق
حنا بدو فينا الولد لو شاف موته ماأتقى
حنا بدو فينا الولد يرقا ولو ماله رفيق
حنا بدو فينا الولد لا من رقا رقا رقا
الين يوصل غايته لو كان في قمة طويق
يابنت جيتك والثمن عمري ابي ليلةٍ لقا
يما كذا والا بلاش من الصداقة والصديق
وساعة تبسمتي وشفت الجمر والثلج اصدقا
قلت أشهد أن الموت حق وصحت لك صيحة غريق
واعتقت دمعي والزعل والحزن لرضاك أعتقا
وأغفت عيوني في عيونك ياعساها ما تفيق
وامنت باللي سخرك تقرين صفحات الشقا
واشعلت بردي في دفاك وشبت الساحة حريق





يالشاعر الشعبي


البارحة يوم شمس الشعر تسطع بي
وأنا أتحرى لشمس الله من الشرفه
وألعي على واحد قبلي تولع بي
مايوم غنى ولا أسهر للهوى طرفه
الين حتى تولع بي وولع بي
نار من الشوق صاليها لحق طرفه
من بعدها ياشقى حالي وياتعبي
نفسي عن الشعر وأهل الشعر منصرفه
مانيب يم الشعر يالشاعر الشعبي
يابتوع مش عارف!!وشي ما أعرفه
تبي تهز الجبل بمسدس لعبي
والناس من وارد المنصور منجرفه
لاتستفز القصيد ولا ترفع بي
الشعر ماهوب مهنة لأجل تحترفه
وان كان يامحترف تقدر على لعبي
خلك على جنب لين أشوف لك صرفه
ما أحد عبالك ولا لك عندنا معبي
ياكود باب مداه اكبر من الغرفه
وأنا من الناس ياسهلي وياصعبي
بحر تشوفه ولا تقدر على غرفه
مسكون بالشعر من راسي ليا كعبي
والشعر ملكي وكل الناس معترفه
أنا(...) مير يوم أصبحت من شعبي
حذفت تاج القصيد وصابني قرفه




الغرام انواع

أه ياغفوت الاسحار ماقبل الطلوع
وأه ياشي ذكرت وعلى بالي طرى
العيون ليا ضمت شوف تسقيها الدموع
وان روت من دمعها العذب يظماها الكرى
والقلوب تذوب بصدور صلفين الطبوع
والغلا يذكر على الما من البدو اقصرى
والهوى لاهب في قلب رجال جزوع
والله ان يصبر برى الجرح ولا مابرى
والحياة افراح وأهات والفرقا تلوع
والمحبة لاسرتني سرى ليل سرى
لين اغني للفراشات في عيد الشموع
وتهتف لي كل شمعة ورى ورى ورى
واذكر اني مانسيتك ويغريني الرجوع
ياغرام تنشد الناس وينه ياترى
والغرام انواع والقلب مدهل كل نوع
والله اعلم منهو اللي من الحدب وورى
وانت ياللي منزلك ماورا حدب الضلوع
تدري انك من وراها وغيرك مادرى
تمتلكني يا اطرق العود من عادك فروع
قبل تغريك المدينه ويطغيك الثرى
يوم عادك تكره السبت وتحب الربوع
والمواجه كان مسموح والوصل اجهرى
جعل تسقي ذيك الأيام سجدات وركوع
رحمة من رب طيبة ورب ام القرى
رحمة تغفر خطا الفجر ما قبل الطلوع
يالزمان اللي ذكرت وعلى بالي طرى



نجوم الصبح
بانت نجوم الصبح واللي في عيوني من عصر
ماهوب دمع لا تضايقت آتنهت واسكبه
لا والله الا حلم شيخ عن طموحه ما قصر
لو قصرت سود الليالي من يمينه وشنبه
وانا لو اني ماتعلمت الهزيمه والنصر
ماكان ذقت في الهوى مره واعذبه
شاعر وعصري فاتني واعيش في أغرب عصر
لا الوقت وقتي والزمن مابيني وبينه شبه
لكن هنوف مثلت دور العزيزه في مصر
قدت قميصي واسرفت في وصلها قبل انتبه
يوم انتبهت استشهدت ضدي بحراس وقصر
قلت ارحمي عزيز قوم ذل وارخى منكبه
ماني نبي الله اقاوم حسن خصرك لا انصهر
أنا بشر..عبد ضعيف وكل برق يجذبه
قالت وهي توي تثنى كن مافيها خصر
الشعر يا ضيدان ورث جدود ولا موهبه؟!
قلت الشعر سحر يسخر لي القلوب ويختصر
عمر المسافات الطويله والسنين المجدبه
والحب شي لو حصرته في ضلوعي ما انحصر
يطغى على حدب المحاني لين ابيحه واكتبه
وان علمتني الفاتنه وشلون اسير بلا بصر
علمتها الفنجال وشلون اتحدى واشربه
وعلمتها إني كذا طال الزمن ولا قصر
وان اعذب الحب اصدقه وان اعذب الشعر اكذبه





موجز النشره

إنعست عين الغلا والهوى هدا
خانت الأيام والملح والعشره
وابتديت تشوف نفسك وتتحدا
وأنت ما كنت تغلى ولا تشره
كنت مجروحي وصرت الدوا والدا
كنت أه وصرت أهات منتشره
غلطة اللي بالمحبه أخذ وأدا
واعترف لك بالغلا وأبصمت عشره
الهوى جاب الغلا والهوى ودا
وأنت وجروح الزمن بالحشا خشره
يابعد من بعد جا ومن هدا
ويابعد من ساج روض الحشا نشره
يوم صار الحب جزيه ولك تدا
والقصيد أسهل من كتابته نشره
خذ قصيدي ياشذا الورد لاندا
وانتبه لي واستمع موجز النشره
والله انك بالغلا فارق جدا
مثل فرق الابتسامه عن الكشره





معلوق معلوق

طلي علي من شرفه القصر من فوق
وتبسمي لي واضحكي في وداعي
أومي بكفين الغلا ؛واشعلي الشوق
في قلب شيخ جاك في ثوب راعي
حده غلاك يجيك ياشيخة الذوق
لو كان ما للحب والذوق داعي!
واقفى يتل القلب معلوق معلوق
في درب فرقا ما وراها اجتماعي
مايتبع المقفين ياكود مطفوق
وانا رصيدي ماتحوشه ذراعي
لو كنت ضايع..كل مطرود ملحوق
يكفيني انك كنت سبة ضياعي




ضيدان بن راكان

سلام الله من ضيدان ابن منصور ابن قضعان
على ضيدان ابن راكان ابن ضيدان ابن حثلين
سلام الله سلام مايساق إلا على ضيدان
يليق بهيبته وجدوده الاقصين والادنين
سلام مايساق إلا لبيت امارة العجمان
لبيت ثايت ساسه وسوره مثل سور الصين
سلام عطره الكادي وريح المسك والريحان
تسوقه من هبايب خاطري يمنى وقلب وعين
سلام احلى من الما لا تدفق في ظما الظميان
واغر من الخزامى لا انثنت عقب اليسار..يمين
وارق من النسايم في عتيم الليل للسهران
والذ من المواصل واللقا مع هجعة السالين
على ذاك الامير الشامخ اللي للزعامة بان
سلام الله مابانت نجوم الليل للسارين
سلام ذعذعت به للولا والشكر والعرفان
ذعاذيع القصيد اللي تذعذع بين حين وحين
وانا شاعر ليا جات الحقايق واسخر القيفان
على صفحات ابو الطيب دروس أقلام طه حسين
وابذكر في قصيدي للفخر ضيدان ابن راكان
وابكتب له حروف من ذهب تبقى ليوم الدين
ابو خالد وريث المجد والتاريخ والصمان
وريث اهل الشدايد اللي عليه العلم الى ذالحين
ابو خالد ذرانا لا اختلف وجه الزمان وشان
لنا ذخر وذرى فالنايبات..وفالقسى واللين
ذرى كل القبيله في ذرى الله ثم ذرى سلمان
ولد عبدالعزيز اللي ذراه يذري القاصين
ذرى نجد وذرى الشعب وذرى الدين وذرى ضيدان
عسى عمره طويل ابو فهد يا السامعين آمين
تحت ظله وسيفه قالها ضيدان بن قضعان
سلام الله على ضيدان بن راكان بن حثلين



الدنيا حظوظ

المثل حده الأدنى بعوض
قول رب لما أنزل حفيظ
له سجود النوافل والفروض
وله دموعي من الخشية تفيض
احتمى القيظ والميراد حوض
والظوامي تهيض وتستهيض
مايبل الظما برق ينوض
ولايسد الرمق ريح النجيض
والخطا سر والسر معروض
والعذر حق والسفهه تغيظ
وانت ياللي لك السرامحفوظ
عاذرك مثل عذري للمريض
لا لعب فيك تسديد القروض
ولا لعب بك من الشرد غضيض
يلعب الحظ والدنيا حظوظ
والحظيظ انت مانيب الحظيظ
انت ترعى الربيع بكل روض
والا انا من شتاي العز قيظ
يقصر الهرج عن ظلم العروض
ويشهد الله وجيه القوم بيض
والنهايه ونور البدر يوض
ودي أقول بلسان غليظ
(ف)الكسير ترى الرده تعوض
قلتها كاش بالخط العريض




الحجاج السمح

ياصاحبي غابت علي الشمس باطراف النخيل
وامسيت اشوف الباسقات اللي تميل عذوقها
وانا علي بشتٍ حساوي لا قصير ولا طويل
والمزنه الغرّا على راسي تلوح بروقها
والعالم الله يدرك العطشان منها سلسبيل
والا يوقّف يومه الموعود قبل يذوقها
ياصاحبي ياناس ياللي فوق يالوزن الثقيل
لد النظر للعالم اللي ماتبل حلوقها
والعمر مرّه والقلوب البيض ما تبغي دليل
والناس اذا طابت نواياها..تطيب وفوقها
لو كل من سمّا نبيل يصير مثل اسمه نبيل
سمّيتها ليلى على ليلى وانا معشوقها
كذا..كذا ياحرفة التمويه في نعش القتيل
ياصاحبي غمّض عيونك وادفنه في موقها
وانا تعبت من الحجاج السمح والكف البخيل
ولا عاد عندي حل اعالجها واخيط افتوقها
صحيح انا ممكن أسوّيها واسوّي المستحيل
لكن رجلي في هوى نفسي ماعاد اسوقها
وشلون ابرّر موقفي واجزا جميلك بالجميل
وانا يديني في فم الحيّه ورجلي فوقها


البتول


يابسم الله على قلب البتول وحسنها الفتان
عليها ذكر ربي من قدمها لين هامتها
أسمي كل مامرت علي بأسم الله الرحمن
على من تجمع قلوب الأوادم في محبتها
لها القلب وغلاه ورحمته والشوق والتحنان
ملاك أبدع الرحمن في تركيب صورتها
وهبها الحسن من فضل ملايكته على الأنسان
عسا ربي يعديها العيون وشر نظرتها
عليها يشبهون أغلا الذهب واللول والمرجان
وهي ماتشبه إلا ماتشوفه في مرايتها
أنا لو شفتها مهره لها فوق السحاب عنان
متى ماهب ذعذاع النسيم تفل غرتها
ماشافوا المترفات أحلى وصوف شافها ضيدان
من الغيره عيون غمضت وعيون شافتها
يحق ألها التباها بالجدود وعودها الريان
وانا مالي حقوق إلا محبتها وضحكتها
محبتها حياة وبعدها عن ناظري حرمان
وش أسباب المحبه فالحياة إلا ابتسامتها
يا ذكر الله على وجه البتول وحسنها الفتان
يابسم الله عليها من ذكاها لي براءتها



يا عظيمه

ياعظيمه كل شئ له حدود وله نهايه
لكن انتي ماوقفتي عند حدك ياعظيمه
استلذتي بطعناتي واخذتيها هوايه
كن مالك حرة توجع وطعنات ٍ اليمه
آه ليتك ماتماديت بطعنات البدايه
لين صار لكل طعنه في الحشى معني وقيمه
الله يبيحك ولكن كيف في اغرب روايه
تكتبين الحب كذبه والهوى دقه قديمه
وانتي الي كل مالدة عيونك في المرايه
مالحمتي لليتم الي خذت قلبه يتيمه
واليتيمه في اليتامي ماهل حق الوصايه
الوصيه عودها الغض وناياها السليمه
لكن انتي صار لك حق الوصايه والولايه
واستبديتي واضحو البدو واضحيتي مقيمه
مارحلتي لين حطمتي بمافيه الكفايه
عاقل حب الجنون وصوت ناره في هشيمه
استبحتي حرمة المجنون بإدراك وعنايه
والتفيتي له بعقلك وارتكزتي في صميمه
امتلكتي غايته لو ماكان لك غايه
وانتصرتي في عيونه واعترف لك بالهزيمه
من كثر مايعشقك ماقال لك بالحب رايه
خايف الايام لاتطلع عواقبها وخيمه


وكالة بالبيد ( قصيده في الجمس )


راكب الي ماتجيبه وكالة بالبيد
ولايجيبه بهبهاني ولا وضيحي قطر
ادهم وسم الجميح على جنبه جديد
مهبل الي يوم عرض يحسبنه شفر
جمس شكمانين وملقبينه با الوليد
من سرابه ما يغبط القصيبي والجبر
كاتبين في ضمانه حديده ما يبيد
تمرةٍ قاري عليها حفيد ابوبكر
كن وجهه لانطحته تشعشع يوم عيد
وانقفيته كنه السيل لاسال وحدر
وان عرض لك في مزاياه من عنق الفريد
وان ركبته تحسب انك على سطح القمر
دقته نغمة عبادي على سلم فريد
لا عزف الاول وجاوب عاشر وتر
لاشتغل قالت شكامينه اركد يا حديد
والقزوز تقول للقاع روح يا فقر
كن في الشكمان الايمن صدا عبدالمجيد
وكن في الشكمان الايسر صدا نايف صقر
والبلوف تقول للكهربه هل من مزيد
والسيور تقول للمروحه اين المفر
كل اغانيهم علىدرب واصل يا عنيد
لين تلفي قصر شيخ على العليا شهر
سايقه من صلب ربعي وله باس شديد
ما يخاف البعد والليل والموت الحمر
من صناديد ال عرجا هل العلم الوكيد
لابة من جن تمشي على هيئة بشر
ديوان ضيدان بن قضعان

وسلامتكم[/center[/CENTER]][/SIZE]