للمشـاعر حق ..! [الأرشيف] - ::. مـنتدى قبيلـة العجمـان .::

ناصـر محمد المجروب

27-12-2009, 04:17 AM

ماتموت المحبه .. لو يطول الغياب
........................دام لي قلب وافي .. مايخون العهود
صاحبي والمعنّا مايدوّر عتـاب
.........................مايبي غير شوفك مهتني بالوجود
وش تفيد الأماني دام قربك سراب
........................ويش قيمة وعودك وانت خنت الوعود
لاتوصي طيوفك بالجفا والعذاب
.........................خير صدك كثير .. وماعلى الضيق زود

ناصـر محمد المجروب

27-12-2009, 04:18 AM

يلي عيونك وانـا غايب تهـل الدمع
............................ كفكف دموعك ترا قلبي غدى قاسي
من بعد ماكنت صوبي ماتلد السمع
........................... الحين تسأل .. وش اللي غيّر احساسي .؟

ناصـر محمد المجروب

27-12-2009, 04:18 AM

يومك توادعني وانا عند بابك
.......................... وش فايدة شعري ومعاناة ليلي ؟
دام المدامع تشتكي من غيابك
......................... أجبر أحاسيسي بـ كلمة ( خليلي )
ودام العذر عندك يشابه عتابك
........................ وش له تحطمني وانا شاد حيلي ؟

ناصـر محمد المجروب

28-12-2009, 09:53 PM

لاتحاول تعتذر ... يابن الحلال

................... تبطي وتشره ترا مالك عذر

عذرك اني قاطع ٍ حبل الوصال

................ دام ذا عذرك .. يجيب الله مطر

ناصـر محمد المجروب

29-12-2009, 03:48 AM

حـاول انك ماتطـوّل بالكلام
................... ولاتعاندني وانا مافيني حيل
كامل ٍ بالزين واسلوب الغرام
.................. بس مشكلتك هي : لسانك ثقيل..!

ناصـر محمد المجروب

30-12-2009, 06:42 AM

http://a3.img.v4.skyrock.net/a3d/hob-jarh-ichtiya9-wada3/pics/2329840419_small_1.jpg

ما للموادع قلب .. ينبض بالإحساس ..

............................ وجروح أهل الحب.. ما تقبـل الشرح

ياجارحه .. هاتي خفوقي ولا بـاس

........................... ولا هانت إيدينش .. وشكـرا ً على الجرح !

ناصـر محمد المجروب

31-12-2009, 03:21 AM

قالت : أبي أدفى من البرد وانام

................................... قلت : أفرشي في وسط صدري ونامي

ناصـر محمد المجروب

31-12-2009, 03:30 AM

لك يطول الليل ويهل السحاب
.................يافريد الوصف من بين البرا

لو تمر البال في ليل الغياب
.................والله انك أغلى من مرّ وطرا

ولو تغث القلب في كلمة عتاب
.................تبري جروحه لو إنه ما برا

ناصـر محمد المجروب

31-12-2009, 03:32 AM

الموادع ليل ... والفرقا ليال=ومابقى لي غير شعري والظروف
والله اني ماتوقعت المحـال=لين شفت البعد في عين الهنوف
لابغيت تصد وتشّد الرحال =لاتودعني.. وانا عيني تشوف

ناصـر محمد المجروب

03-01-2010, 06:07 AM

أنا أنام الليـل متضايق
.............. وانته تنام الليل متهني

ســعـــد عيـــنك :)

ناصـر محمد المجروب

03-01-2010, 06:09 AM

ماتنوّمني سوى كلمة : غرام
........................ وماتقعدني سوى كلمة : صلاه

:)

ناصـر محمد المجروب

04-01-2010, 05:46 AM

كنت أشوفك في حياتي شي غير=نور هـ الدنيـا .. وخيـر صدوفهـا
مـادريت إنك على غيري .. تغيـر=لين صدّقت العيــون .. وخوفهـا
يا عزيز النفس .. ما عنـدك ضمير=جتني الفرقا .. وجات ضيوفها
ليتني من قبل أشوفك مستخـير=كان ما عافت عيوني شوفها

ناصـر محمد المجروب

07-01-2010, 12:29 PM

الدنيا حسايف

حياك الله طال عمرك ..

مرورك أسعدني ..

لاهنت

ناصـر محمد المجروب

07-01-2010, 12:35 PM

يا للأسف طحت من عيني
................. من بعد ماكنت تسواها

كنت أحسبك ( أجمل سنيني )
,,,,,,,,,,,,, وأثرك من أكبر خطاياها

ناصـر محمد المجروب

07-01-2010, 01:34 PM

حبيبـي .. لاتباطيـتـه=وأنا في قمة أحزانـي .!
أروح ووجهتـي بيـتـه=وأقول : الشوق ناداني ..

ناصـر محمد المجروب

10-01-2010, 03:30 AM

لاتحسب إني بكيت لـ خاطر عيونك !!

.................................. أبكي على وقت قضّيته مع خاين

ناصـر محمد المجروب

14-01-2010, 12:07 AM

بصد عنّـك وانـا زعـلان
===========يمكن على يـوم تنسانـي

تعبت وآنـا بـلا عنـوان
===========ودي أحبـك ولا أمـدانـي

أقول لك ضايـق وولهـان
===========تقوللي : wait خط ثاني ..!

ناصـر محمد المجروب

14-01-2010, 12:11 AM

يازمان الصمت حار الصمت فيـك=ياطريق الحب .. تاهت خطوتي ..!
ياجروح الصـد.. طوّلتـي يديـك=والجفا صعـب ٍ تشيلـه قدرتـي
لا بغيت أحـب غيـرك وانتهيـك=صاح قلبي .. لا تخرّب سمعتـي
سال دمعي يوم قلتي : ما أبيـك .=ومات قلبي يوم طاحـت دمعتـي

ناصـر محمد المجروب

16-01-2010, 08:27 PM

مابين دمع العيـون وطـاري غيابـك=قضيت ليلـي اواسـي دمعـة الفرقـا
واذكر لقانـا وموعدنـا علـى بابـك=واذكر عيونك وهي بدموعهـا غرقـا
رحتي .. وكل المشاعر تنطر عتابـك=والدمع وده يشوفك .. ينـزل ويرقـا
لامن غشى الدمع عينك والحزن صابك=ارقد بصدري .. وخل دموعك الزرقـا

ناصـر محمد المجروب

19-01-2010, 02:08 AM

http://alajman.net/up/uploads/38f93e8d01.jpg

لا ذكـرنـا وفـاتـك .. يـا أمـيـر الـقـلـوب
.................... نكتب الحزن .. بأحساس الوجيع الكسير

غبت عنا .. ونورك عن حضورك ينوب
.................... كـل رجّــال .. نـعـرف قـيـمـتـه بـ الأخـيــر

كافي إنك رحلت .. وديــرتك والدروب
.................... عشـت فـيهـا كـبيـر .. وغبت عـنهـا كبيــر

ناصـر محمد المجروب

23-01-2010, 09:13 PM

لو كل من حبيت يبقى .. حبيبي ؟

...............................ما شفتني أضحك .. وانا كلي أحزان

ناصـر محمد المجروب

02-02-2010, 11:21 PM

المفارق برد .. ووصالك دفا=والاماني مالها غيرك مكان
يابديع الحسن .. يانبع الوفا=معْك أحس أن المشاعر في امان
من يلوم القلب لاذم الجفا=شاف فيك الحب وكفوف الحنان

ناصـر محمد المجروب

08-02-2010, 05:27 AM

صاحبك ياصاحبي وضعه صعب
......................... عايش ٍ ما بين ضيقات وهيــام

لا تـزّعلني .. بدون أيـة سبب
......................... عـ الأقل عطني مجال ٍ للكـلام

ناصـر محمد المجروب

14-02-2010, 11:20 AM

مات صمتي وأبتدى وقت الكـلام=لي متى والحب عنك بستـره ؟؟
والله انـي ماتعـوّدت الـمـلام=وكل غالـي مايبينـي اخسـره
لاخسرتك .. وش بقالي بالغرام؟=ولانسيتك .. منهو الي بذكـره ؟
وانت تدري ما لغيرك أهتمـام=أعتبرني طير .. والحب شجره
واعتبر شاعرْك لاناح الحمام=يابعد قلبه وعينه ونظره
أطيب الي حب من بين الانام=واصدق الي هام من نظرة مره
خل حزنك يسكن بصدري .. ونام=وليلك القاسي .. انا اللي بسهره
لاتشيـل الهـم وتزيـد المـلام=غالي .. ومثلك غلاتـه تعـذره

ناصـر محمد المجروب

14-02-2010, 11:24 AM

تاهت .. [ أقدام رجلي ] .. في دروب الغـرام
..................................وماتت [ ورود حبي ] .. تحت رجل السنين ..!

واصبح الحب .. في صدري [ بقايـا حطـام ]
..................................وضاعت حقوق قلبي .. من [ قساوة ضنين ]

احبس (الدمـع بعيونـي) .. واخـاف الكـلام
..................................خايف اصير .. [ لقمة حلـق ] للعاذليـن ..!

ياجفـون المفـارق .. لـو يمـرك مـنـام
..................................مـا لقيتـي خفوقـي .. ظامـي ٍ للحنـيـن

ارسل اشواق قلبي مـع [ طيـور الحمـام ]
..................................ما لقيت الجواب الـي .. [ يبشـر سجيـن ]

طال صمـت الكـلام وطـال صمـت المـلام
..................................وسال دمع الخفـوق وبـاح سـر ٍ دفيـن ..

وانت خاطـرك هـذا .. [ يارفيـع المقـام ]
..................................بعض الاحيان زين .. وبعض الاحيان شين ..!

ولا انا خاطري مابيـن .. [ ضيـق وهيـام ]
..................................لابغيـت اتناسـا صـاح قـلـب ٍ حـزيـن

جفني الـي شكـى دمعـه .. تـرا مايـلام؟
..................................كاره الدمع من كثـر .. [ البكـا والونيـن ]

أعشقـك بـس .. والله مالقيـت اهتـمـاااام
..................................من غيابك حصادي .. [ جرح ودموع عين ]..

مايواسي دموعي .. غيـر [ ظلـم الظـلام ]
..................................ومايصبر خفوقي غير .. [ بوح الكنيـن ] ..

ناصـر محمد المجروب

16-03-2010, 08:36 AM

الغالي اللي غايب ٍ قدله اسبوع=لايحسب إني عن محبتْه سالي
ياليت ربي ماخلق حزن ودموع=عشان ما أبكي على فقد غالي
او ليت قلبي دونه ابواب ودروع=ماكان شفت القلب ماهو بخالي

ناصـر محمد المجروب

23-04-2010, 11:30 AM

أخطيت في حقها ..و ماني مراضيها
وانا على اني حزين وضايق ٍ صدري

جتني والاشواق من بعدي تبكيها
ماكني الي مزعلها وانا مدري ؟

ناصـر محمد المجروب

23-04-2010, 11:31 AM

متذوقه للشعر واتابع الساحه

................................ماتدري ان الشعر كله تذوقها

:)

ناصـر محمد المجروب

30-04-2010, 04:16 PM

يا ( فهد ) .. ماعاد عندي لك :- جديد

............................. المشاعر [ ماتسرك حالها ]

ناصـر محمد المجروب

30-04-2010, 04:54 PM

كني أشوف :- بـ عيونك .. ( ملامح فراق )=من مابعد مادريت أني ,, أحب وأغير ..!
من يداري خفوقي .. لاتألم ّ وضـاق ..؟=غلطتي ,, ماحسبت حساب (فرقا و هجير )

ناصـر محمد المجروب

08-06-2010, 05:35 AM

مابقى بي شوق واحساس وشعور ؟
من بعد ماجارت الفرقـآ عليّ

ناصـر محمد المجروب

08-06-2010, 05:49 AM

http://farm1.static.flickr.com/140/367331436_0501acee15.jpg

تخيب الظنون ومابقى بالرجا باقي
بكيت وغفى حلمي على وسادة الاقدار

ألا يا حمام الدآر أرسل له أشواقي
و وصّه على وصلي ألا ياحمام الدار

ناصـر محمد المجروب

12-06-2010, 04:38 AM

http://www.msnar.com/vb/imgcache/1350.imgcache.jpg

يا ليله الموحش :- أبي منـْك .. خدمه !
خله ينـام .. ولا تسبب له إزعاج

خذني بداله / سـاهرك ,, قلّ عـزمه
وأبسهرك كلك .. إذا مابه أحـراج

ناصـر محمد المجروب

12-06-2010, 08:16 AM

أنا أسيـر الشوق :-/ وعيونـه السـود ..!

ناصـر محمد المجروب

12-06-2010, 08:29 AM

لو بيني وبينك ./ مسافه طويله
بجيك وانسى كل زله وما فات

على دروبك عندي أفضل وسيله
أغاني ٍ تقصر طوال المسافات

( مشتاق لك بس المسافه طويله )
و ( مقدر أعيش الواقع المر بسكات )

:)

ناصـر محمد المجروب

13-06-2010, 09:42 PM

ضاقت بي الدنيا وحارت مدامعي
وقفّت أمانييّ وعيني تخيلها

تحطمت أحلام عمري ولا بقى
الا جروح ٍ وسط صدري أشيلها

في صدري أشواق ومعاناة حجمها
أكبر من ضلوعي وودي أزيلها

ما للضلوع الا ذعاذيع ضيقتي
وما للعيون الا مدافيق سيلها

تعبت من طرد الاماني ودربها
وسمحت منها يوم جاني قليلها

ذكرت يوم ان المحبه تعيش بي
مع طفلة ٍ ماتعشق الا خليلها

ألطف من النسناس واحساس كلمتي
لامن عطت تعطي وتنسى جميلها

من عطرها الورد النديّ عاف ريحته
والليل يسكن في خصايل جديلها

لاهب نسناس الهوا مال عودها
ماتشبه احد ٍ من غرانيق جيلها

تقطف من احساسي بقايا عذوبته
واكتب لها بيتين شعرْ وتشيلها

راحت وانا عايش مع جور وحدتي
ولاني براضي ياتي احد ٍ بديلها

ببقى مع شعري وضيقات خاطري
لعلها تسمع قصايد عليلها

فـ إن مت من سبة جفاها وبعدها
قولولها لاتنصدم من قتيلها

ناصـر محمد المجروب

14-06-2010, 08:30 AM

ياصاحبي والله بإنك على البـال=لكن ظروف الوقت صعبه علينا
إتبعّد الاحبـاب ../ وتبدّل الحـال=وظروفنا ماهي بـ راحة يدينـآ
غلاك مابين المحاني .. ولا زال=عايش .. لو إنك ماتمر وتجينا ..!

ناصـر محمد المجروب

15-06-2010, 03:56 PM

ماعاد باقي بي احاسيس ودموع

من يوم مافارقت . . أغلى الحبايب

ناصـر محمد المجروب

18-07-2010, 05:31 PM

ياداعج العين عينك لاتكحلها
من رمشك الليل ياخذ شكله ولونه

يـ اغلى من احلامي الي ماوصلت الها
و يـ اوفى من احساسي الي عشت من دونه

دنياي من دون شوفك ما اتحملها
ما غير اعيش الجفا واغنّي لحونه

خذني من الحزن وجروح ٍ أعابلها
لو للحزن قلب .. ما كثّر من طعونه

من أول اسهر من الفرقا واقابلها
واسهّر الليل .. لين يغمض عيونه

مليت منها ومن قسوة تعاملها
ودي أعيش الوصل وأهيم في كونه

من حولي الناس تضحك لي وازعلها
ما همنّي لو تنام الليل محزونه

أرقد بـ صدري بعيد ٍ عن مشاكلها
وأجمع من ضلوعي الحرمان وشجونه

واسق المشاعر من اشواقك ووابلها
مبطي وهي ترقب الاحساس ومزونه

أحلامي أكبر من أني اتأملها
وأمالي إني أحبه واصدق ظنونه

ناصـر محمد المجروب

03-08-2010, 11:55 PM

فتنة الجيل أخذي مابقى من كلام
الوصايف بزينك تعلن اعجابها

يشرق الصبح من وجه ٍ يبيد الظلام
ويبتدي الليل لامن قطت حجابها

:)

ناصـر محمد المجروب

11-09-2010, 11:07 AM

الوصل لا مات وش قيمة طموحاتي
..................ذي ( دروب الحب ) ما نعرف نهايتها

دامها راحت ولا قدّرت ( دمعاتي ) ؟
..................( والجفا ) دمعة غلا ضاقت , وهلتها

ياخفوقي لا اتضايق واسمع الآتي :-
..................وانت تعرف طيب ( نيتها , وغايتها )

كل غالي لويجيني حسب مشهاتي
..................شفتني ما ألعن الفرقـا وساعتها !

.

ناصـر محمد المجروب

11-09-2010, 11:43 AM

http://www.3sl3.com/up/upfiles/VGR96242.jpg

العيد دونك .. كلّه أحزان وهموم
............................ يا كاسب ٍ قلبي وصدق أحترامه

الناس تفرح به وتلبس له هدوم
............................ وانا لبست من الحزن ذا البجامه

:)

.

ناصـر محمد المجروب

12-09-2010, 10:49 PM

ليه تجرح شعوري .. وانت كلك براءه ؟
..........................زيدني ( جرح ثاني) .. عـ الأقل أذكرك به !

.

ناصـر محمد المجروب

12-09-2010, 11:07 PM

يا (بداية حياتي) , جعلني فدوة ٍ لك
........................كل ماشفت زولك قلت : ياسعْد عيني

انت ظلي .. وانا يا غايتي مثل ظلّك
........................والله اني بدونك , ضاعت أكثر سنيني !

.

ناصـر محمد المجروب

12-09-2010, 11:52 PM

صاحبي .. ( ما ألومك) لاجفيت البلاد
..........................أدري إنك ( كريم ) .. وبالمشاعر بخيل

إن تباطيت ( نورك ) صار نورك , سواد
..........................وان عشقت المدينه صرت عابر سبيل

ياكثر ( ما عطيتك ) من شعور و وداد
..........................وانت (تعطي جروح) ,وما لجرحك مثيل

ما أبي من جروحك , غير وقفة حياد
..........................( تنصف الحب ) , و تدّور لـ قلبي بديل

من كثر ما شكيت من الجفا والبعاد
..........................ودي ( أقضي حياتي )دون حب وخليل

.

ناصـر محمد المجروب

13-09-2010, 05:01 PM

انا عطيتك كل شي بـ حياتي :-
.......................حبي , وتقديري , وقلبي , وشوقي

بس المقابل مالقيت أمنياتي
.......................( الله يقدّرني ) ,, وأرجّع حقوقــي

.

ناصـر محمد المجروب

13-09-2010, 06:55 PM

بـ غيابها ماعاد تفرق لو أموت
مـ أتخاف من حزني ولا من ربّها

لو تبتعد عني غلاها مايموت :
.................................أحبها
................................وأحبها
................................وأحبها

.

ناصـر محمد المجروب

13-09-2010, 07:13 PM

( من غير قاصر ) . بالعذارى والبنات
...........................هذيك فارق بالحلا , ترتيبهـا

اوصافها : رمـان , مع ( سكر نبات )
...........................ومع كل هذا , بالوصل ياطيبها

بنت الدلع بنت الحسن بنت الحلات
...........................( حبيبتي ) , وانا بعد حبيبها

.

ناصـر محمد المجروب

13-09-2010, 07:24 PM

( نظارتش تقليد ) , بس حلوه عليش
............................أشوفها ( Ray . Ban ) ولاّ ( Cartier ) !

:)

.

ناصـر محمد المجروب

13-09-2010, 10:07 PM

لا مرّني , طاري الفرقا ونسناسه
............................(غمّضت عيني) , وافكر في علاقتنا

اخاف لا ينهدم بيت الغلا وساسه
............................( ونبكي من البعد ) , ونودّع محبتنا

.

ناصـر محمد المجروب

14-09-2010, 01:14 AM

كانك ( نسيت المحبه ) , ماني بـ ناسي
............................مثلي اذا ( حب حاجه ) , ما يخليهـا

قلبك , لو انه خذى من طيبة احساسي
............................يمديك , تذكر ( محبتنا ) , ( وتحييها )

.

ناصـر محمد المجروب

14-09-2010, 11:17 AM

تدري حياتي بدونك ويش تعني لي ؟
..................................(بيني وبينك) , حياتي مالها داعي !

.

ناصـر محمد المجروب

14-09-2010, 12:39 PM

http://www.almlf.com/get-9-2010-almlf_com_qwhceoj6.jpg

(تدري شسوي) , اذا شوقي تولجني ؟
................................(أمسك تليفوني) , واقرى رسايلـها

.

ناصـر محمد المجروب

14-09-2010, 02:30 PM

الحزن في غيبتك , ما عاد يتركني !
.............................ياليت وصلك , مثل وصل الحزن وافتك

والشوق في غيبتك ياليت ينفعني
.............................او ليتني رافض ( الدعوه ) , ولا ضفتك

.

ناصـر محمد المجروب

14-09-2010, 03:56 PM

عسى ربي يسامحها
انا ماكنت , جارحها
,
وتجرحني وتنساني , ولا حسّت بـ أحزاني !
عسى ربي يسامحها ,
,
نسيت الناس وياها
..............ضامي وشحّت بـ ماها

عسى ربي يسامحها !
عسى ربي يسامحها !
عسى ربي يسامحها !

ناصـر محمد المجروب

14-09-2010, 04:08 PM

دامها راحت ولا حسّت بـ أحزاني
.............................سمّح الله دربها , ( والله يوفقها ) .!

ناصـر محمد المجروب

15-09-2010, 02:54 PM

لا تسافر , كان لـي عندك قدر
.............................الغياب , أبشع ( أساليب الغرام )

أخذني وياك لو ( جنطة سفر )
.............................لا تخلـيني , تـرا والله حـراااااااام !

.

ناصـر محمد المجروب

15-09-2010, 04:44 PM

فقير المشاعر , ( لو أحبه ) تناساني !
.............................لأنه ( عديم احساس ) و بالصد متقوّي

وكريم المشاعر , ممكن يحب له ثاني
.............................وانا بينهم محتار , مدري وش أسوي ّ ؟

ناصـر محمد المجروب

16-09-2010, 09:22 PM

العين تضمى شوفتك , والشوق مامنه مفر !
.............................بالحالتين القلب , متبهذل وماتسوى عليه

ما عاد باقي بي صبر , ياوين أبلقى ذا الصبر ؟
.............................منهو ( يسلفني صبر ) , الله يرحم والديـه ؟

ناصـر محمد المجروب

18-09-2010, 04:45 AM

لو أبيّن لك , كثر شوقي عليك
.............................ما تـصـد , ( وتبتعد ) عن نـاظري

والله إني أعشقك , واموت فيك
.............................وقلبي بـ بعدك كسر لي خاطري

ناصـر محمد المجروب

18-09-2010, 05:13 AM

ألعب على قلبي , تنكسّ تنكسّ
.............................دامه حلالك , ألعب بـ كيف كيفك

:)

.

ناصـر محمد المجروب

19-09-2010, 06:38 AM

عرفت ( معنى المحبه ) , يومني معها
.............................وانا أحسب إن المحبه , ( كنّـها كوره )

يا جعلني ( ما أنحرم منها) ,ولا اقطعها
.............................( أبترك أحزاني ) , و ببقى مع نـــوره

.

ناصـر محمد المجروب

19-09-2010, 07:23 AM

لا غشاك الشوق , لا تبطي عليّ
.............................أجمع أشواقك , وواعدني بـ مكان

( بيني وبينك ) , ترا ما فيها شي ّ
.............................( لا تواعدنا ) , وحسيت بـ حنـان

.

ناصـر محمد المجروب

20-09-2010, 05:39 AM

بان الجفا , وانت ماتنلام
.................فراقنا , ( عامل انساني )
طبع الوفا فيك , طير وحام
.................ودّي أحبك , ( ولا أمداني )
عطيتك , (أوفى وفـا) والهام
.................وعطيتني , حـزن مجّـاني
يلعب بي الشوق والانسام
.................من يوم , حبيت لك ثـآني
الواقع أكبر , ( من الاحـلام )
.................( جدد جروحي ) , واحزاني
دام الحزن في ضلوعي دام
.................شـ المشكله ؟ كل ٍ يعاني
( أيامنـا ) , ( كلّـهـا أيــام )
.................بعيشها , قدر الامكـاني

.

ناصـر محمد المجروب

21-09-2010, 07:01 AM

(عطني عهد), وأنسى خطاك وتماديك
.............................لا تلومني , ماعاد بيدي ولا شـي ّ

(أبحرت بـ عيونك) , وضـاعـت شواطيك
.............................مات الوفـا , بين الحنايا وانا حـي ّ

ناصـر محمد المجروب

22-09-2010, 07:58 AM

كانك نسيت الغلا , وش قيمة الشوق ؟
.............................( بعض المشاعر ) , قصيرات ٍ يديـهـا

ليتك تعذّرت لي , في حسن منطوق
.............................شف حالتـي , من غيابك لك عليهـا

ناصـر محمد المجروب

30-11-2010, 01:41 AM

سجل على صفحة غرامك حضوري
صرت أكتب أشعاري على شان ترضى

دامك تتابعني وتبغى ظهوري
وش لي بـ غيرك , كلهم ناس مرضى

:$

ناصـر محمد المجروب

23-12-2010, 02:23 PM

ماعادت صدورنا رحبه ولا به مجال=للحزن والذل والتقصير يادارنا
حقوقنا دونها سيل ٍ يهد الجبال=والي براس الجبل لا يامن أضرارنا
للأرض مطلق ولانا ماعليها جدال=نفديش بأموالنا ولا ّ بأعمارنا
ومتوننا مالها غير الحمول الثقال=وان ثقلت حمولنا ماتنطفي نارنا
حنا هل الاوله لا صك جال ٍ بجال=انذود عن عرضنا لا صاحت ديارنا

ناصـر محمد المجروب

19-02-2011, 01:59 AM

واقف ٍ دون روض الحب قد لي سنه
مـا لـقـيـنـا و رود ٍ مـايـشـمـونـهـا

ليـن مـر الـغـزال الـي تـرك مـوطـنـه
واسـتـحـل الـحـنايـا ماوقف دونها

ناصـر محمد المجروب

08-07-2011, 01:44 AM

الشعر صوت ٍ يناديني وانا ما ابغى آجيه .!

ناصـر محمد المجروب

04-05-2012, 11:47 PM

عيوبنا فرقتنا ، عن محبتنا
من بعد ماكانت احزانك هي احزاني

كنا نقول الحزن ما هو يفرقنا
واليوم بالذات محدٍ يذكر الثاني

ناصـر محمد المجروب

04-05-2012, 11:48 PM

من عيونك ما جنيت الا ضياعي
يومني لا ضعت ملجاي لعيونك

لا تناديني وتطلبني وداعي
وانت تدري مقدر اكمّل بدونك

ناصـر محمد المجروب

06-05-2012, 12:34 AM

الامل انت مفتاحة وبيته
ما تعداك لو سقفة حدودك

مانسيتك لو ان حلمي نسيته
ماتزين الحياة الا بوجودك

عاشقك ما كتب الا وصيته
واحفظيها مع كثرة وعودك

ناصـر محمد المجروب

19-02-2013, 07:04 PM

اعتذارك عن غيابك شي لا يعنيني
العذر لا صار ما هو في محله غلطه
,
ما أقول ان الغياب ابطى واثّر فيني
بس خلاني بعد فرقاك ( شاعر قلطه )

ناصـر محمد المجروب

19-02-2013, 07:07 PM

من يلوم الحلم لا علّق عليك اماله
ما لقاله قسمة ٍ تغني وتملى عينه
,
اكفله من قسوة الواقع وسوء اعماله
واكسب اجره جعل ربي يحفظه ويعينه
,
كل شوقٍ بيننا ما يقطعون حباله
الوفا منزل جمعنا والمحبه طينه
,
عاشقك مايملك الا غترته وعقاله
لا تلومينه على حاجه ولا تنسينه

ناصـر محمد المجروب

19-02-2013, 07:15 PM

وش لي انا بالضيق من بعد السعه
ماعاد باقي كلمة ٍ واقولها
,
بنتٍ تهيضني لا جات مفرعه
( تلعب في بركة خافقي برجولها)
,
مجدولها لا جات تقعد ترفعه
واليا انعست توسدت مجدولها

ناصـر محمد المجروب

19-02-2013, 07:16 PM

اعذريني مابقى للحب قيمه
دامش ارخصتي حناني وابتسمي
,
دوريني فالبدايات القديمه
واذكريني كل ماجيتي ورحتي

ناصـر محمد المجروب

19-02-2013, 07:17 PM

المحبه تختلف مثل الدروب
حب عذري وحب ابوساعه لذا
,
والله اني اعشقش من كل صوب
ان بغيتيها كذا ولا كذا !

ناصـر محمد المجروب

19-02-2013, 07:19 PM

لا تعرّض عشرتي صلف الهبوب
وانت ألطف من نسايم ليلها
,
كل ما لاح برق ٍ من جنوب
اتذكر طلته واخليها
,
فتنة ٍ في صوب والعالم بصوب
فارقه في حسنها عن جيلها
,
كل ما جيت اطلب الرحمه واتوب
جاتني تضحك وشدة حيلها